ഓണസദ്യയിലെ അവിയല്‍ മാഹാത്മ്യം

ഓണത്തിന് പരമ്പരഗാത സദ്യയ്ക്കാണ് പ്രധാന്യം. ചിലയിടങ്ങളില്‍, പ്രത്യേകിച്ചും വടക്കോട്ട് പോകുമ്പോള്‍ നോണ്‍ വെജ് വിഭവങ്ങളും ഇലയില്‍ ഏറെ പ്രധാനം തന്നെയാണ്. ഏതു സ്ഥലത്തെങ്കിലും അല്‍പം വ്യത്യാസങ്ങള്‍ വിഭവങ്ങളില്‍ വരുമെങ്കിലും പരമ്പരാഗത സദ്യക്കൂട്ടുകള്‍ക്ക് വ്യത്യാസമുണ്ടാകുന്നില്ല. സാമ്പാര്‍, അവിയല്‍, കാളന്‍, ഓലന്‍, കൂട്ടുകറി ഇവയെല്ലാം തന്നെ പരമ്പരാഗത വിഭവങ്ങളുടെ കൂട്ടത്തില്‍ പെടുന്നവയാണ്. ഇതുണ്ടാകുന്ന രീതിയില്‍ ചെറിയ വ്യത്യാസങ്ങള്‍ വരുമെങ്കില്‍ പോലും. ചിലയിടങ്ങളില്‍ ചില പ്രത്യേക പച്ചക്കറികള്‍ ചേര്‍ക്കും. ചിലയിടങ്ങളില്‍ ഇതു ചേര്‍ക്കില്ല. മസാലകളുടെ കാര്യത്തിനും വ്യത്യാസമുണ്ടാകും.

ഓണസദ്യയില്‍ പ്രധാന വിഭവമാണ് അവിയല്‍. അവിയല്‍ പരുവം എന്നൊരു വാക്കു തന്നെയുണ്ട്. പല തരം പച്ചക്കറികള്‍ ഇട്ടുണ്ടാക്കുന്ന ഒന്ന്. ബാക്കി വിഭവങ്ങള്‍ക്കെടുത്ത് ബാക്കിയാകുന്ന എല്ലാ പച്ചക്കറികളും ഇടാന്‍ പാകത്തിനുളള കറിയെന്നതാണ് ചുരുക്കം. ഒരുമാതിരിപ്പെട്ട എല്ലാ പച്ചക്കറികളും ഇതില്‍ പോകും. ബാക്കി വന്ന പച്ചക്കറികള്‍ ഇട്ടു വയ്ക്കാവുന്ന രുചികരവും പോഷക സമൃദ്ധവുമായ കറിയെന്നതാണ് ഇതിന്റെ നിര്‍വചനം. എരിവും അല്‍പം പുളിയും തേങ്ങയുടെ ചെറു മധുരവുമെല്ലാം കലര്‍ന്ന ഒന്നാണിത്. Also read: 5 മിനിറ്റില്‍ കുഞ്ഞിന്റെ പനി കുറയ്ക്കാം

അവിയല്‍ വെറുമൊരു കറി മാത്രമല്ല, ചില ഐതിഹ്യങ്ങളുമായി ബന്ധപ്പെട്ടു കിടക്കുന്ന ഒന്നു കൂടിയാണ്. ഇത് ഹൈന്ദവ പുരാണമായ മഹാഭാരതവുമായി ബന്ധപ്പെട്ടു കിടക്കുന്നു. പാണ്ഡവര്‍ കൗരവരോട് ചൂതുകളിയില്‍ പരാജയപ്പെട്ടതിനെ തുടര്‍ന്നുണ്ടായ ഒരു വ്യവസ്ഥ അജ്ഞാതവാസമായിരുന്നു. ഒരു വര്‍ഷം അഞ്ജാത വാസം എ്ന്ന വ്യവസ്ഥയെ തുടര്‍ന്ന് മറ്റുള്ളവര്‍ക്ക് തിരിച്ചറിയാനാകാത്ത വേഷങ്ങളില്‍ പാണ്ഡവര്‍ ഒരു വര്‍ഷം കഴിഞ്ഞു. ഇതില്‍ ഭീമന്‍ പാചകക്കാരനായാണ് കഴിഞ്ഞത്. ഒരു ദിവസം എല്ലാവരുടേയും ഭക്ഷം കഴിഞ്ഞ സമയത്ത് ദുര്‍വാസാവ് മഹര്‍ഷി കൊട്ടാരത്തില്‍ സന്ദര്‍ശനത്തിനെത്തി. ഇദ്ദേഹത്തിന് കഴിയ്ക്കാനായി ഭക്ഷണം ബാക്കിയുണ്ടായിരുന്നില്ല. ഇതു കൊണ്ട് ഭീമന്‍ കയ്യില്‍ കിട്ടിയ പച്ചക്കറികളും തേങ്ങയുമെല്ലാം ചേര്‍ത്തുണ്ടാക്കിയ വിഭവമാണ് അവിയല്‍ എന്നാണ് കഥ. ഈ കറി കഴിച്ച് മഹര്‍ഷി സംപ്രീതനാകുകയും ചെയ്തും.


കാര്യമെന്തൊക്കെ പറഞ്ഞാലും അവിയില്‍ ആരോഗ്യത്തിന് ഏറെ ഗുണം നല്‍കുന്ന ഒന്നാണ്. ഇതിലെ പല തരം പച്ചക്കറികള്‍ ശരീരത്തിന് ആവശ്യമായ മിക്കവാറും പോഷകങ്ങള്‍ നല്‍കുന്നു. ചേന, കായ, ക്യാരറ്റ്, പയര്‍ തുടങ്ങിയ പച്ചക്കറികളുടെ ഒരു നിര തന്നെയുണ്ട്, ഇതില്‍. വൈറ്റമിന്‍ എ മുതല്‍ കെ വരെയുളളവ ഇതിലെ വിവിധ പച്ചക്കറികളില്‍ നിന്നും ലഭിയ്ക്കും. ഓണസദ്യ ഇലയില്‍ ഇങ്ങനെ വിളമ്പണം

തൈരും തേങ്ങയുമെല്ലാം ഇതിലെ മറ്റു ചേരുവകളാണ്. തൈര് വയറിന്റെ, കുടലിന്റെ ആരോഗ്യത്തിന് മികച്ചതാണ്. ആരോഗ്യകരമായ ബാ്ക്ടീരിയകളുടെ വളര്‍ച്ചയ്ക്ക് സഹായിക്കുന്ന ഇത് ഗ്യാസ്, അസിഡിറ്റി പ്രശ്‌നങ്ങള്‍ക്കുള്ള നല്ലൊരു പരിഹാരം കൂടിയാണ്. കാല്‍സ്യവും പ്രോട്ടീനുമെല്ലാം അടങ്ങിയതാണിത്. ഏതു പ്രായക്കാര്‍ക്കും കഴിയ്ക്കാവുന്ന ഒരു വിഭവം. വെളിച്ചെണ്ണ, കറിവേപ്പില എന്നിവ മറ്റു ചേരുവകളാണ്. തേങ്ങയും ആരോഗ്യത്തിന് നല്ലതാണ്. കറിവേപ്പില പ്രമേഹം അടക്കമുളള രോഗങ്ങള്‍ക്ക് പരിഹാരമാണ്. ഇതെല്ലാം ഒരുമിച്ചു ചേരുന്ന അവിയല്‍ ആരോഗ്യത്തിന് മികച്ചതുമാണ്.