​ വഴിത്തിരിവായത് ആ ചോദ്യമായിരുന്നു! വിവാഹശേഷം ആ വ്യക്തിയെ കണ്ടതിന്റെ സന്തോഷം പങ്കിട്ട് മാളവികയും തേജസും

മിനിസ്‌ക്രീന്‍ പ്രേക്ഷകരുടെ പ്രിയപ്പെട്ട റിയാലിറ്റി ഷോകളില്‍ ഒന്നായിരുന്നു 'നായികാനായകന്‍'. പുതിയ ചിത്രത്തിലേക്ക് നായകനെയും നായികയേയും കണ്ടെത്തുന്നതിനായി ലാല്‍ ജോസായിരുന്നു ഷോ സംഘടിപ്പിച്ചത്. കുഞ്ചാക്കോ ബോബനും സംവൃതയുമായിരുന്നു മെന്റേഴ്‌സ്. ഈ ഷോയിലൂടെ ജീവിതനായികയേയും കണ്ടെത്തുകയായിരുന്നു തേജസ്. വിവാഹശേഷം സംവൃതയെ കണ്ട സന്തോഷം പങ്കിട്ടെത്തിയിരിക്കുകയാണ് ഇരുവരും.

സംവൃതയ്‌ക്കൊപ്പം ചിരിച്ച് പോസ് ചെയ്തുള്ള സെല്‍ഫിയാണ് മാളവികയും തേജസും ഇന്‍സ്റ്റഗ്രാം സ്റ്റോറിയായി പോസ്റ്റ് ചെയ്തത്. ഫാന്‍സ് പേജിലൂടെയായി ക്ഷണനേരം കൊണ്ടാണ് ചിത്രം വൈറലായി മാറിയത്. വിവാഹശേഷം വിദേശത്തേക്ക് ചേക്കേറിയ സംവൃത ഇടയ്ക്കിടയ്ക്ക് നാട്ടിലെത്താറുണ്ട്.

നിങ്ങള്‍ നല്ല ജോഡികളാണ്, ജീവിതത്തില്‍ ഒന്നിച്ചാല്‍ അടിപൊളിയായിരിക്കുമെന്ന് സംവൃത പറഞ്ഞിരുന്നു. ഒന്നിച്ചുള്ള പെര്‍ഫോമന്‍സിനിടയിലായിരുന്നു മാളവികയ്ക്കും തേജസിനും ഈ കമന്റ് കിട്ടിയത്. കുഞ്ചാക്കോ ബോബനും ലാല്‍ ജോസും അത് ശരിവെച്ചിരുന്നു.

നായികനായകന്‍ കഴിഞ്ഞ് വര്‍ഷങ്ങള്‍ക്കിപ്പുറം തേജസും മാളവികയും ജീവിതത്തില്‍ ഒന്നാവുകയായിരുന്നു. അറിയാവുന്നൊരാള്‍ തന്നെ ജീവിതസഖിയായി വരുന്നത് നല്ലതായിരിക്കുമെന്ന ചിന്തയാണ് ഇവരെ ഒന്നിപ്പിച്ചത്.

ജാതകവും പൊരുത്തവുമൊക്കെ നോക്കിയാണ് വിവാഹം തീരുമാനിച്ചത്. അമ്മയ്ക്ക് ജാതകപ്പൊരുത്തം നിര്‍ബന്ധമുള്ള കാര്യമായിരുന്നു. തേജസ് പ്രൊപ്പോസലിനെക്കുറിച്ച് പറഞ്ഞപ്പോള്‍ ജാതകം പരിശോധിക്കാനായിരുന്നു മാളവിക പറഞ്ഞത്.

സ്‌ക്രീനില്‍ മാത്രമല്ല ജീവിതത്തിലും മികച്ച ജോഡികളാണ് നിങ്ങള്‍ എന്നായിരുന്നു ആരാധകരെല്ലാം പറഞ്ഞത്. വിവാഹം നിശ്ചയിച്ചത് മുതലുള്ള വിശേഷങ്ങളെല്ലാം മാളവിക യൂട്യൂബ് ചാനലിലൂടെ പങ്കിടുന്നുണ്ട്.

തേജസേട്ടനൊപ്പം ഒന്നിച്ച് യാത്ര ചെയ്യാന്‍ പറ്റുന്നതില്‍ സന്തോഷമുണ്ട്. അമ്മയേയും കൂടെക്കൂട്ടാനായതില്‍ ഇരട്ടി സന്തോഷം. ദീപുവേട്ടനും കുടുംബത്തിനുമൊപ്പമായിരുന്നു ദുബായിലെ കറക്കം.

അഭിനയം മാത്രമല്ല പാട്ടും ഡാന്‍സുമൊക്കെയായി സജീവമാണ് മാളവിക. എനിക്ക് ഡാന്‍സ് പറ്റുന്ന പണിയല്ലെന്നാണ് തേജസ് പറയാറുള്ളത്. മാളവികയുടെ ഡാന്‍സ് വീഡിയോകളെല്ലാം കൃത്യമായി പകര്‍ത്താറുണ്ട് തേജസ്.

തേജസിനൊപ്പമെത്തിയതിന് ശേഷമുള്ള ആദ്യ പിറന്നാള്‍ ഗംഭീരമായിരുന്നു. തേജസിന്റെ വീട്ടിലെ പിറന്നാളാഘോഷത്തിന് ശേഷം ദുബായിലെത്തിയപ്പോഴും ആഘോഷം തുടര്‍ന്നിരുന്നു. അടുത്തിടെ വണ്‍ മില്യണ്‍ നേട്ടം സ്വന്തമാക്കിയതിനെക്കുറിച്ചും മാളവിക പറഞ്ഞിരുന്നു.