ചർമ്മത്തെ മനോഹരമായി സൂക്ഷിക്കാൻ മാത്രമല്ല, പല തരത്തിലുള്ള ചർമ്മ പ്രശ്നങ്ങൾ അകറ്റാനും സിറം ഉപയോഗിക്കുന്നത് വഴി സാധിക്കും. ഇന്ന് റെറ്റിനോൾ സിറം ചർമ്മത്തിന് നൽകുന്ന ഗുണങ്ങൾ എന്തൊക്കെയെന്നും ഇത് എപ്പോൾ എങ്ങനെ ഉപയോഗിക്കണമെന്നും മനസിലാക്കാം.
കുറച്ച് കാലമായി ചർമ്മ സംരക്ഷണ ഉൽപ്പന്നങ്ങളുടെ വിപണിയിൽ ഏറെ ജനശ്രദ്ധ ആകർഷിച്ച ഒന്നാണ് റെറ്റിനോൾ. ചർമ്മത്തെ ബാധിക്കുന്ന പല തരം പ്രശ്നങ്ങൾ അകറ്റാൻ റെറ്റിനോൾ സിറത്തിന് അപാര കഴിവുണ്ട് എന്നാണ് വിദഗ്ധർ പോലും പറയുന്നത്.
മുഖക്കുരു, മുഖത്തെ പിഗ്മെന്റേഷൻ പ്രശ്നങ്ങൾ, കറുത്ത പാടുകൾ എന്നിവയ്ക്കെല്ലാം നല്ലൊരു പ്രതിവിധിയാണ് റെറ്റിനോൾ. കൂടാതെ ചർമ്മം കൂടുതൽ മൃദുലമാക്കാനും ഇതിന്റെ പതിവായ ഉപയോഗം സഹായിക്കുന്നുണ്ട്.
പ്രായമേറുന്തോറും ചർമ്മത്തിലും അതിന്റെ മാറ്റങ്ങൾ പ്രത്യക്ഷപ്പെട്ട് തുടങ്ങും. നെറ്റിയിലും കണ്ണിന് ചുറ്റും ചുളിവുകൾ, വരകൾ എന്നിവയൊക്കെ വന്നേക്കാം. ഇതെല്ലാം കുറയ്ക്കാൻ സഹായിക്കുന്ന മാന്ത്രിക മരുന്നാണ് റെറ്റിനോൾ.
കൊളാജൻ ഉത്പാദനം മെച്ചപ്പെടുത്തി ചർമ്മത്തിന് കൂടുതൽ ഇലാസ്തികത നൽകി ചെറുപ്പം നിലനിർത്താൻ സഹായിക്കുന്ന മികച്ച ആന്റി ഏജിങ് സിറം ആണ് റെറ്റിനോൾ. അതുകൊണ്ട് തന്നെ ഇതിനെ ചർമ്മ സംരക്ഷണത്തിലെ ഓൾ - റൗണ്ടർ എന്ന് വിശേഷിപ്പിക്കുന്നതിൽ തെറ്റില്ല.
റെറ്റിനോൾ പുരട്ടേണ്ടതിന് പ്രത്യേക രീതിയുണ്ട്. രാത്രി ആണ് ഇത് ഉപയോഗിക്കേണ്ടത്. നന്നായി വൃത്തിയാക്കിയ ചർമ്മത്തിൽ വേണം ഇത് പുരട്ടാൻ. രണ്ടോ മൂന്നോ തുള്ളി സിറം മാത്രമെടുത്ത് മുഖത്തും കഴുത്തിലൂടെ പുരട്ടി കൊടുക്കുക.
റെറ്റിനോൾ പുരട്ടിയതിന് ശേഷം ഒരു മോയിസ്ചറൈസർ പുരട്ടാൻ മറക്കരുത്. ഇല്ലെങ്കിൽ ഇത് ചർമ്മത്തെ വരണ്ടതാക്കും. കൂടാതെ രാവിലെ പുറത്തിറങ്ങുമ്പോൾ സൺസ്ക്രീൻ നിർബന്ധമായും ഉപയോഗിക്കുകയും വേണം.
റെറ്റിനോൾ എല്ലാ ദിവസവും ചർമ്മത്തിൽ പുരട്ടാൻ വരട്ടെ. ആദ്യം ആഴ്ചയിൽ ഒന്നോ രണ്ടോ തവണ മാത്രം പുരട്ടി നിങ്ങളുടെ ചർമ്മത്തെ പതുക്കെ റെറ്റിനോൾ പരിചയപ്പെടുത്തി കൊടുക്കുക. അങ്ങനെ പതിയെ ആഴ്ചകളുടെ സമയമെടുത്ത് എല്ലാ ദിവസവും എന്നതിലേക്ക് വരാം.
ഏതൊരുൽപ്പന്നമാണെങ്കിലും ചർമ്മത്തിൽ പ്രവർത്തിച്ച് ഗുണം ലഭിക്കാൻ കുറച്ച് സമയമെടുക്കും. റെറ്റിനോൾ സിറം അതിന്റെ ഗുണങ്ങൾ നിങ്ങളുടെ ചർമ്മത്തിന് നൽകാൻ കുറഞ്ഞത് രണ്ടോ മൂന്നോ മാസമെങ്കിലും എടുത്തേക്കാം.