ഉപ്പൂറ്റി വിണ്ടുകീറുന്നത് തടയാൻ വീട്ടിൽ ചെയ്യാവുന്ന എളുപ്പവഴികൾ

ഉപ്പൂറ്റി വിണ്ടുകീറുന്നത് ഇന്ന് പല ആളുകളും നേരിടുന്ന ഒരു പ്രശ്നമാണ്. മഞ്ഞുകാലത്താണ് ഈ പ്രശ്നം കൂടുതലായി കണ്ടുവരാറുള്ളതെങ്കിലും മഴക്കാലത്തും പാദങ്ങൾ വിണ്ടുകീറാറുണ്ട്. പാദങ്ങൾ വിണ്ടുകീറുന്നത് തടയാൻ എന്താണ് മാർഗ്ഗം?

കാലാവസ്ഥയിലെ മാറ്റങ്ങൾ കാൽപാദങ്ങൾ വിണ്ടുകീറുന്നതും പാദങ്ങൾ വരണ്ടു പോകുന്നതിനും ഒരു പ്രധാന കാരണമാണ്. കാലുകൾക്ക് നൽകുന്ന അമിത സമ്മർദ്ദവും മറ്റൊരു കാരണമാണ്. ഇതൊന്നും കൂടാതെ മറ്റ് പല ആരോഗ്യപ്രശ്നങ്ങൾ മൂലവും കാലുകൾ വിണ്ടുപൊട്ടാം. ​

ഉപ്പൂറ്റിയിലെ തൊലി കട്ടി പിടിച്ചിരിക്കുന്നത്, വിണ്ടുകീറുമ്പോഴുണ്ടാകുന്ന അസഹനീയ വേദന, രക്തസ്രാവം തുടങ്ങിയ പ്രശ്നങ്ങളൊക്കെ നിങ്ങളും നേരിടാറുണ്ടോ? ഉപ്പൂറ്റി വിണ്ടുകീറുന്നത് തടയാൻ സഹായിക്കുന്ന പല പ്രകൃതിദത്ത മാർഗ്ഗങ്ങളുമുണ്ട്.

കിടക്കുന്നതിന് മുമ്പ് കാലുകൾ വൃത്തിയായി കഴുകിയ ശേഷം തുടച്ചുണക്കുക. ഇനി പാദങ്ങളുടെ അടിയിൽ അല്പം വെളിച്ചെണ്ണ പുരട്ടി മസ്സാജ് ചെയ്ത് കൊടുക്കാം. അതിന് ശേഷം സോക്സ് ധരിച്ച് ഉറങ്ങാൻ പോകാം.

പാദങ്ങൾ മോയ്സ്ചറൈസ് ചെയ്യാൻ ഏറെ ഉത്തമമാണ് തേൻ. തേനിൽ ആന്റി ബാക്റ്റീരിയൽ സവിശേഷതകൾ അടങ്ങിയിട്ടുണ്ട്. ഒരു ബേസിനിൽ പാദങ്ങൾ മുങ്ങാൻ പാകത്തിന് ചെറു ചൂടുവെള്ളം എടുത്ത് അതിലേയ്ക്ക് അര കപ്പ് തേൻ ചേർത്ത് 20 മിനിറ്റ് മുക്കി വെക്കാവുന്നതാണ്.

നന്നായി പഴുത്ത പഴം ഉടച്ചെടുത്ത് പദത്തിനടിയിൽ പുരട്ടി ഒരു പത്തോ പതിനഞ്ചോ മിനിറ്റ് കഴിഞ്ഞ് കഴുകി കളയാം. ഇത് വരണ്ട ചർമ്മത്തിന് പരിഹാരമാണ്. കൂടാതെ വിണ്ടുകീറുന്നത് കുറയ്ക്കാനും ഇത് ഫലപ്രദമാണ്.

ധാരാളം ആരോഗ്യ സൗന്ദര്യ ഗുണങ്ങളുള്ള കറ്റാർവാഴ ജെൽ ഉപ്പൂറ്റിയിലെ വിണ്ടുകീറൽ അകറ്റാൻ സഹായിക്കുന്ന മികച്ച പോംവഴിയാണ്. അല്പം അലോ വേര ജെൽ കൊണ്ട് ഉപ്പൂറ്റിയും പാദങ്ങളും മസ്സാജ് ചെയ്യുക.

നല്ല ഒരു സ്‌ക്രബ് ആണ് പഞ്ചസാര. കുറച്ച് പഞ്ചസാര അല്പം ഒലിവ് ഓയിലിൽ ചാലിച്ച് കാലിന്റെ അടിയിൽ പുരട്ടുന്നതും ചർമ്മം സോഫ്റ്റ് ആകാനും വിണ്ടുകീറൽ കുറയ്ക്കാനും നല്ലതാണ്.

നാരങ്ങാനീര് കൊണ്ട് പാദങ്ങളും ഉപ്പൂറ്റിയുമൊക്കെ മസ്സാജ് ചെയ്യുന്നതും വിണ്ടുകീറുന്നതിന് പരിഹാരമാണ്. അല്പം നാരങ്ങാനീര് മാത്രമായോ, നാരങ്ങാനീരും ഒലിവ് ഓയിലും യോജിപ്പിച്ചോ പാദങ്ങളിൽ പുരട്ടാവുന്നതാണ്.