എപ്പോഴൊക്കെ വെള്ളം കുടിക്കണം എന്നറിയാമോ?

ഉണ്ട്. ദാഹം തോന്നുമ്പോൾ മാത്രമല്ല, അല്ലാതെ വെള്ളം കുടിക്കേണ്ട ചില സന്ദർഭങ്ങളുമുണ്ട്. ദാഹം തോന്നിയില്ലെങ്കിലും ഇനി പറയുന്ന സമയത്ത് വെള്ളം കുടിച്ചാൽ അത് നിങ്ങളുടെ ശരീരത്തിനാവശ്യമായ ദൈനംദിന ആവശ്യകത നിറവേറ്റും. ഈ സമയങ്ങളിൽ അല്ലാതെയും വെള്ളം കുടിക്കാം, കേട്ടോ.

രാവിലെ ഉറക്കമുണർന്ന് വന്ന പാടെ ഒന്നോ രണ്ടോ ഗ്ലാസ് വെള്ളം കുടിക്കുന്നതിനും നിറയെ ആരോഗ്യ ഗുണങ്ങളുണ്ടെന്ന് പലർക്കും അറിയില്ല. രാത്രി മുഴുവൻ ഫാസ്റ്റ് ചെയ്ത ശേഷം രാവിലെ ആദ്യം തന്നെ ഒരു ഗ്ലാസ് വെള്ളം കുടിക്കുന്നത് ശരീരത്തിലെ ഉപാപചയ പ്രവർത്തനങ്ങൾ മെച്ചപ്പെടുത്തുന്നതിനൊപ്പം ദഹനാരോഗ്യം മെച്ചപ്പെടുത്താനും സഹായിക്കും. കൂടാതെ രാവിലെ ടോയ്‌ലെറ്റിൽ പോകാൻ ബുദ്ധിമുട്ട് നേരിടുന്നവരാണെങ്കിൽ രാവിലത്തെ വെള്ളം കുടി ഈ പ്രശ്നവും പരിഹരിക്കും.

ആഹാരം കഴിക്കുന്നതിന് മുമ്പായി ഒരു ഗ്ലാസ് വെള്ളം കുടിക്കുന്നത് നിങ്ങളുടെ ശരീരഭാരം കുറയ്ക്കാൻ സഹായിക്കുമെന്ന് അറിയാമോ? തടി കുറക്കാനുള്ള ടിപ്പ് ആണിത്. ഇങ്ങനെ വെള്ളം കുടിക്കുമ്പോൾ വയർ നിറഞ്ഞിരിക്കുന്നതായി തോന്നുന്നത് കൊണ്ട് നിങ്ങൾ അമിതമായി ഭക്ഷണം കഴിക്കില്ല.

വ്യായാമ സമയത്ത് ധാരാളം വിയർക്കുന്നതിനാൽ അങ്ങനെ ജലാംശം നഷ്ടപ്പെടുന്നത് പരിഹരിക്കാനായി വെള്ളം കുടിക്കേണ്ടതുണ്ട്. പക്ഷെ ഒരുപാട് വെള്ളം കുടിച്ച് വ്യായാമത്തിലേർപ്പെട്ടാൽ കൊളുത്തി പിടിക്കൽ അനുഭവപ്പെടാം. പകരം ഒന്നോ രണ്ടോ സിപ്പ് മാത്രം എടുക്കുക. വ്യായാമത്തിന്റെ ഇടവേളയിലും ഒരുപാട് വെള്ളം കുടിക്കുന്നതിന് പകരം ഒന്നോ രണ്ടോ സിപ്പ് മാത്രം കുടിച്ചാൽ മതിയാകും. വ്യായാമത്തിന് ശേഷം ആവശ്യത്തിന് വെള്ളം കുടിക്കുക.

ഇത് അധികമാരും ശ്രദ്ധിക്കാത്ത ഒരു കാര്യമാണ്. എന്നാൽ ഒരു ഗ്ലാസ് വെള്ളം കുടിച്ച ശേഷം കുളിക്കാൻ പോകുന്നത് രക്തസമ്മർദ്ദം ഉയരാതെ നോക്കാൻ സഹായിക്കും.

വ്യായാമം ചെയ്യുമ്പോൾ മാത്രമല്ല വിയർക്കുക. വിയർക്കുന്ന സാഹചര്യം ഉണ്ടാകുന്ന ഏതൊരു സന്ദർഭത്തിലും ധാരാളം വെള്ളം കുടിക്കാൻ ശ്രദ്ധിക്കേണ്ടതാണ്. വിയർത്ത് ശരീരത്തിൽ നിന്ന് നഷ്ടമാകുന്ന ജലാംശത്തിന് പകരം ഉടൻ തന്നെ ജലാംശം എത്തിക്കാൻ വെള്ളം കുടിക്കുന്നത് വഴി സാധിക്കും.

ഒരുപക്ഷെ നിങ്ങളുടെ തലവേദനയ്ക്ക് കാരണം നിർജ്ജലീകരണം അഥവാ ഡീഹൈഡ്രേഷൻ ആകാം. ശരീരത്തിൽ ജലാംശം കുറയുന്നത് മൈഗ്രൈൻ പോലുള്ള പ്രശ്നങ്ങൾക്ക് കാരണമാകാം. അതിനാൽ മൈഗ്രേൻ ഉള്ളവരും തലവേദന അടിക്കടി ഉണ്ടാകുന്നവരുമൊക്കെ എപ്പോഴും ഒരു കുപ്പി വെള്ളം കയ്യിൽ കരുതാൻ മറക്കരുത്. ​

മസിലികൾക്ക് അയവ് വരുത്താൻ മസ്സാജിന് മുമ്പ് വെള്ളം കുടിക്കുന്നത് സഹായിക്കും. ശരീരത്തിലെ ദുഷിപ്പുകൾ നീക്കം ചെയ്യാനായി മസ്സാജിന് ശേഷവും ധാരാളം വെള്ളം കുടിക്കുക.

വിമാനയാത്രയ്ക്കിടയിൽ വായ വരണ്ടുണങ്ങുകയും ദാഹം തോന്നുകയും ചെയ്യുന്നത് ശ്രദ്ധിച്ചിട്ടുണ്ടോ? ഇത് ഡീഹൈഡ്രേഷൻ സംഭവിക്കുന്നതിനാലാണ്. വിമാനം ഉയരുന്തോറും ക്യാബിൻ എയർ വരണ്ടതാകുന്നു. തന്മൂലം യാത്രക്കാർക്കും ഡീഹൈഡ്രേഷൻ അനുഭവപ്പെടാം. ഇത് തലവേദന, മനംപുരട്ടൽ തുടങ്ങിയ പ്രശ്നങ്ങൾക്ക് കാരണമാകും.

രാത്രി മുഴുവൻ ശരീരത്തിൽ ജലാംശം നിലനിർത്താൻ ഉറങ്ങുന്നതിന് മുമ്പായി വെള്ളം കുടിക്കാറുണ്ട് ചിലർ. എന്നാൽ ഈ ശീലത്തിൽ തെറ്റൊന്നുമില്ല. പക്ഷെ ഉറങ്ങുന്നതിന് തൊട്ടുമുമ്പായി വെള്ളം കുടിക്കുന്നത് ഉറക്കത്തിനിടെ മൂത്രശങ്ക ഉണ്ടാക്കുകയും അത് ഉറക്കത്തെ തടസ്സപ്പെടുത്തുകയും ചെയ്യും. അതിനാൽ ഉറക്കത്തിന് രണ്ട് മണിക്കൂർ മുമ്പായെങ്കിലും വെള്ളം കുടിച്ച് മൂത്രമൊഴിച്ച ശേഷം ഉറങ്ങാൻ പോകാം.