Happy Navaratri: ഭക്തിയുടെ നിറവിൽ നവരാത്രി; ആശംസ സന്ദേശങ്ങൾ കൈമാറാം

ആത്മീയതയുടെയും കലകളുടെയും ഉത്സവമാണ് നവരാത്രി. ഹൈന്ദവര്‍ ഈ ഒൻപത് രാത്രികള്‍ നീണ്ടുനിൽക്കുന്ന ഉത്സവത്തെ വ്യത്യസ്തമായ ആരാധനാക്രമത്തിലൂടെയാണ് ആഘോഷിക്കുന്നത്. ആദിപരാശക്തിയുടെ ഒൻപത് രൂപങ്ങളെയാണ് നവരാത്രി ഉത്സവത്തിൽ ആരാധിക്കുക. ആദ്യ മൂന്നു ദിവസം ഭഗവതിയെ പാര്‍വ്വതി ദേവിയായും അടുത്ത മൂന്നു ദിവസം ലക്ഷ്മിദേവിയായും പിന്നീട് വരുന്ന ദുര്‍ഗാഷ്ഠമി നാളിൽ ദുര്‍ഗയായും വിജയദശമിയിൽ സരസ്വതിയായും ആരാധിക്കുന്നു. നവരാത്രിയുടെ അവസാന നാളായ വിജയദശമിയോടെയാണ് ആഘോഷങ്ങള്‍ പരിസമാപ്തിയിൽ എത്തുന്നത്. ഈ ദിനത്തിൽ കുട്ടികള്‍ വിദ്യാഭ്യാസത്തിലേക്കു തുടക്കം കുറിക്കുന്നു എന്ന സങ്കൽപ്പത്തോടെ ആദ്യാക്ഷരം കുറിക്കുന്നു. സെപ്റ്റംബർ 29 മുതൽ ഒക്ടോബർ എഴ് വരെയാണ് നവരാത്രി ആഘോഷങ്ങൾ.

നവരാത്രിയിലെ പ്രധാന നാളുകളാണ് ദുര്‍ഗാഷ്ടമി, മഹാനവമി, വിജയദശമി. മഹാദേവൻ്റെ നിര്‍ദ്ദശ പ്രകാരം ദുര്‍ഗ്ഗാദേവിയായി അവതരിച്ച പാര്‍വ്വതീദേവി 9 ദിവസത്തെ യുദ്ധത്തിനൊടുവില്‍ മഹിഷാസുരനെ വധിച്ച ദിവസമാണ് മഹാനവമി. മഹിഷാസുര വധത്തിന്മേലുള്ള വിജയാഘോഷമാണ് വിജയദശമിയായി ആഘോഷിക്കുന്നത്. ഈ നന്മയുടെ നാളുകളിൽ നമുക്ക് ആശംസകൾ കൈമാറാം.



ആശംസ സന്ദേശങ്ങൾ

''ഈ നവരാത്രി നാളുകളിൽ സർവ്വൈശ്വര്യവും സരസ്വതിദേവി താങ്കൾക്കു നൽകി അനുഗ്രഹിക്കട്ടെ''

''എല്ലാവർക്കും ഹൃദയം നിറഞ്ഞ നവരാത്രി ആശംസകൾ''

''സരസ്വതി നമസ്തുഭ്യം
വരദേ കാമരൂപിണി
വിദ്യാരംഭം കരിഷ്യാമി
സിദ്ധിർഭവകു മേ സദാ...''
നവരാത്രി ആശംസകൾ

''അറിവിൻ്റെ ആദ്യാക്ഷരം കുറിക്കുന്ന കുരുന്നുകൾക്ക് നവരാത്രി ആശംസകൾ...''