ഉദ്ദിഷ്ടകാര്യ സിദ്ധിയ്ക്ക് ഷഷ്ഠി വ്രതം അനുഷ്ഠിക്കാം

ഓരോ മനുഷ്യന്റെയും മനസ്സിനെയും ശരീരത്തെയും വാക്കിനെയും പ്രവർത്തിയെയും നേർവഴിക്ക് നയിക്കുവാൻ വേണ്ടി ചിട്ടപ്രകാരം ദൈവത്തെ ആരാധിക്കുക എന്നത് തന്നെയാണ് വ്രതങ്ങൾ കൊണ്ട് അർത്ഥമാക്കുന്നത്. ഹിന്ദു ദൈവ വിശ്വാസങ്ങൾ പ്രകാരം ഓരോ ദൈവത്തെയും പ്രീതിപ്പെടുത്തുവാൻ അനുഷ്ഠിക്കുന്ന ഓരോ വ്രതങ്ങൾ ഉണ്ട്. അവയിൽ തന്നെ പ്രധാനമായും സുബ്രഹ്മണ്യ പ്രീതിയ്ക്കായി അനുഷ്ഠിക്കുന്ന ഒന്നാണ് ഷഷ്ഠി വ്രതം. സൂര്യോദയത്തിനു ശേഷം ആറുനാഴിക ഷഷ്ഠി ഉള്ള ദിവസമാണ് പ്രധാനമായും ഷഷ്ഠി വ്രതമനുഷ്ടിക്കേണ്ടത് എന്നാണ് വിശ്വാസം.

ഒരിക്കൽ ശൂരപത്മാസുരനും സുബ്രഹ്മണ്യനും തമ്മിൽ ഘോരമായ യുദ്ധമുണ്ടാവുകയും മായാശക്തിയാൽ അസുരൻ സ്വയം അപ്രത്യക്ഷനാവുകയും സുബ്രഹ്മണ്യനെ മറ്റുള്ളവർക്കു മുന്നിൽ അദൃശനാക്കി മാറ്റുകയും ചെയ്തു. തുടർന്ന് സുബ്രഹ്മണ്യ ഭഗവാനെ കാണാതെ ശ്രീപാർവ്വതി ദേവി വിഷമിക്കുകയും ദേവിയോടൊപ്പം ദേവഗണങ്ങളും അന്നദാനം ഉപേക്ഷിച്ച് വ്രതമനുഷ്ടിക്കുകയും ചെയ്തു. തുലാം മാസത്തിലെ ഷഷ്ഠിനാളിൽ ഭഗവാൻ സുബ്രഹ്മണ്യൻ ശൂരപത്മാസുരനെ വധിച്ചുകൊണ്ട് ദേവന്മാർക്ക് മുന്നിൽ പ്രത്യക്ഷനായി. തുടർന്ന്
ശത്രു നശിച്ചതു കണ്ടപ്പോൾ എല്ലാവരും ഷഷ്ഠി നാളിൽ ഉച്ചയ്ക്ക് വ്രതമവസാനിപ്പിച്ച് വയറുനിറയെ ആഹാരം കഴിക്കുകയും ചെയ്തു. ഇതാണ് ഷഷ്ഠി വ്രതത്തെ സംബന്ധിച്ച് ഹൈന്ദവ വിശ്വാസപ്രകാരം പ്രചാരത്തിലിരിക്കുന്ന ഒരു പുരാണ കഥ.

കൂടാതെ, ഒരിക്കൽ പ്രണവത്തിന്റെ അർത്ഥം അറിയണം എന്നാവശ്യപ്പെട്ട് സുബ്രഹ്മണ്യൻ ബ്രഹ്മാവിനെ തടഞ്ഞു നിർത്തി. എന്നാൽ 'എന്നും ഞാൻ ബ്രഹ്മമാകുന്നു' എന്ന ബ്രഹ്മാവിന്റെ മറുപടിയിൽ തൃപ്തി ലഭിക്കാതെ സുബ്രഹ്മണ്യൻ കയറുകൊണ്ട് ബ്രഹ്മാവിനെ വരിഞ്ഞു കെട്ടി.
ഒടുവിൽ ശ്രീ പരമേശ്വരൻ നേരിട്ട് എത്തി കാര്യങ്ങൾ ചോദിച്ചറിയുകയും ബാല സുബ്രഹ്മണ്യന് ഭഗവാൻ ബ്രഹ്മ രഹസ്യം പറഞ്ഞു മനസിലാക്കി കൊടുക്കുകയും ചെയ്തു. തുടർന്ന് തന്റെ തെറ്റു സ്വയം ബോധ്യപ്പെട്ട സുബ്രഹ്മണ്യൻ പരിഹാര പൂർണ്ണം സ്വയം സർപ്പവേഷം പൂണ്ടുകൊണ്ട് നടക്കുകയും ചെയ്തു. പുത്രന്റെ സർപ്പരൂപം കണ്ട പാർവതീ ദേവി പതിയുടെ നിർദേശപ്രകാരം ഷഷ്ഠി വ്രതം അനുഷ്ഠിക്കുകയും വൈരൂപ്യം മാറുകയും ചെയ്തു. ഒൻപതു വർഷങ്ങൾ കൊണ്ട് പാർവ്വതി 108 ഷഷ്ഠി വ്രതം അനുഷ്ടിച്ചു എന്നാണ് വിശ്വാസം.

വിധി പ്രകാരമുള്ള സുബ്രഹ്മണ്യ പൂജയും ഷഷ്ഠിവ്രതവുമാണ് ഉദിഷ്ടകാര്യ സിദ്ധിയ്ക്ക് വേണ്ടി അനുഷ്ഠിക്കേണ്ടത്. ഷഷ്ഠി വ്രതത്തിന്റെ നാളുകളിൽ അതിരാവിലെ എഴുന്നേറ്റ് കുളിച്ച് സുബ്രഹ്മണ്യ ക്ഷേത്ര ദർശനം നടത്തുന്നതും പൂജ നടത്തുന്നതും ഉത്തമമാണ്. സന്താനസൗഖ്യം, സർപ്പദോഷശാന്തി, ത്വക്ക് രോഗ ശാന്തി എന്നിവയ്ക്കും ഷഷ്ഠി വ്രതം അനുഷ്ഠിക്കാം. വൃശ്ഛികമാസത്തിലാരംഭിച്ച് തുലാം മാസത്തിലവസാനിക്കുന്ന രീതിയിൽ ഒൻപത് വർഷങ്ങൾ കൊണ്ട് 108 ഷഷ്ഠി എന്ന നിലയിലും വ്രതമനുഷ്ടിക്കാം എന്നാണ് പ്രധാന വിശ്വാസം.

വ്രതത്തിന്റെ തലേ ദിവസം ഒരുനേരമേ ഭക്ഷണം പാടുള്ളൂ. കൂടാതെ വ്രതം അനുഷ്ഠിക്കുന്നവർ കഴിവതും നല്ല കാര്യങ്ങൾ മാത്രം ചിന്തിക്കുകയും പറയുകയും വേണം. ഷഷ്ഠിദിവസം ഉപവാസമാണ് ഉത്തമം എങ്കിലും ആരോഗ്യപരമായി ഇത് സാധിക്കാത്തവർക്ക് ക്ഷേത്രത്തിൽ നിന്നുള്ള ഉച്ചപൂജയുടെ നിവേദ്യം വാങ്ങി കഴിക്കാം. വ്രതത്തിന്റെ നാളിൽ അരിയാഹാരം ഒരു നേരമേ കഴിക്കാവൂ. ആ ദിവസം മുഴുവൻ ഷണ്മുഖനാമ കീർത്തനം ഭക്തിപുരസ്സരം ചൊല്ലുന്നതും ഉത്തമം ആണ്. തികഞ്ഞ ശ്രദ്ധയും ഭക്തിയും ഷഷ്ഠി വ്രതത്തിന് നിർബന്ധമാണ്. കൂടാതെ വ്രതദിവസവും തലേദിവസവും പകലുറങ്ങുകയോ ആഡംബരം കാണിക്കുകയോ ചെയ്യരുത്. വ്രതം അനുഷ്ഠിക്കുന്നവർ വെറും നിലത്തേ കിടക്കാവൂ എന്നും പറയപ്പെടുന്നുണ്ട്.