ചരിത്ര പ്രസിദ്ധമായ ആറന്മുള വള്ള സദ്യക്ക് ഇന്ന് തുടക്കം

ആചാര പെരുമ കൊണ്ട് ചരിത്ര പ്രസിദ്ധമായ ആറന്മുള വള്ള സദ്യക്ക് ഇന്ന് തുടക്കമാകും. ആറന്മുള പാർഥസാരഥി ക്ഷേത്രത്തിലെ പ്രധാന വഴിപാടാണ് വള്ളസദ്യ. തിരുവിതാംകൂര്‍ ദേവസ്വം ബോര്‍ഡ് പ്രസിഡൻറ് എ. പദ്മകുമാര്‍ ഉദ്ഘാടനം നിർവഹിക്കും. ഞായറാഴ്ച ഉച്ചപൂജയ്ക്കു ശേഷം ആരംഭിക്കുന്ന വള്ളസദ്യ ഒക്ടോബര്‍ രണ്ടുവരെ തുടരും. ഇതുവരെ 325 വള്ളസദ്യ വഴിപാടുകളാണ് ബുക്ക് ചെയ്തിട്ടുള്ളത്.

ഒരു വള്ളസദ്യ നടത്തുന്നതിന് കുറഞ്ഞത് 250 പേര്‍ക്ക് 65,000 രൂപയാണ് തുക. കൂടാതെ കൂടുതലായി വരുന്ന ഓരോ 50 പേര്‍ക്ക് 6500 രൂപയും അടക്കേണ്ടതുണ്ട്. എല്ലാ ചെലവും അടങ്ങുന്നതാണ് ഈ തുക. വഴിപാട് നടത്തുന്ന ഭക്തന്‍ കരക്കാർക്ക് നല്‍കുന്ന ദക്ഷിണ ഒഴിച്ചുള്ള എല്ലാ ചെലവും പാക്കേജ് തുകയില്‍ ഉള്‍പ്പെടുത്തിയിട്ടുണ്ട്. ഇതില്‍ ക്ഷേത്രത്തിനുള്ളില്‍ സമര്‍പ്പിക്കുന്ന നെൽപറ, വെച്ചൊരുക്ക്, നാഗസ്വരം, സ്വീകരണം, മാല-പൂവ്, വെറ്റ -പുകയില, മുത്തുക്കുട, ഓഡിറ്റോറിയം-പന്തല്‍വാടക, സദ്യയുടെ തുക എല്ലാമടങ്ങും.

വള്ളസദ്യക്ക് തുടക്കം കുറിക്കുന്നതിനായി ആറന്മുള ശ്രീപാർഥസാരഥി ക്ഷേത്ര ശ്രീകോവിലിലെ കെടാവിളക്കില്‍ നിന്ന് മേല്‍ശാന്തി പകര്‍ന്നു നല്‍കിയ അഗ്‌നി ഇന്നലെ രാവിലെ 8.20നും 8.50നും മധ്യേയുള്ള ശുഭമുഹൂര്‍ത്തത്തില്‍ വിളക്കിലേക്ക് പകര്‍ന്നു. തുടര്‍ന്ന് ഇന്ന് രാവിലെ പ്രധാന അടുപ്പിലേക്ക് അഗ്‌നി പകരുന്നതോടെ വള്ള സദ്യയ്ക്ക് തുടക്കമാകും.