പിഴവുകള്‍ തിരുത്തി വീണ്ടും 'ഹരിവരാസനം' ആലപിക്കാൻ യേശുദാസ്

എരുമേലി: ശബരിമല ശ്രീധര്‍മ്മശാസ്താവിന്‍റെ ഉറക്കുപാട്ടായ ഹരിവരാസനത്തിൽ നിലവിലുള്ള തെറ്റുകള്‍ തിരുത്തി വീണ്ടും ആലപിക്കാനൊരുങ്ങി ഗായകൻ കെജെ യേശുദാസ്. വര്‍ഷങ്ങള്‍ക്കു മുമ്പ് ചിട്ടപ്പെടുത്തിയ പാട്ടില്‍ രണ്ടിടങ്ങളിൽ മാറ്റങ്ങള്‍ വരുത്തേണ്ടതുണ്ടെന്നും ഇത് പരിഹരിച്ച് ഗാനം വീണ്ടും റെക്കോര്‍ഡ് ചെയ്യുമെന്നും തിരുവിതാംകൂര്‍ ദേവസ്വം ബോര്‍ഡ് പ്രസിഡന്‍റ് എ പത്മകുമാര്‍ വിശദമാക്കിയിരുന്നു.

ഈ പിഴവുകള്‍ യേശുദാസിനെ ബോധ്യപ്പെടുത്താന്‍ സാധിച്ചെന്നും ഉടൻ ഗാനം റീ റെക്കോര്‍ഡ് ചെയ്യാനാണ് തീരുമാനമെന്നും എ പത്മകുമാര്‍ വ്യക്തമാക്കി. ഇതു യാഥാര്‍ഥ്യമായാല്‍ പഴയ ഗാനം പാടേ നീക്കി സംശുദ്ധമായ കീര്‍ത്തനം തന്നെ ശബരിമലയില്‍ മുഴങ്ങി കേൾക്കുമെന്നും പത്മകുമാര്‍ അറിയിച്ചു.

പിഴവുകള്‍ തിരുത്തി ആലപിക്കാൻ സാധിച്ചാല്‍ അത് സന്തോഷത്തോടെ നിര്‍വ്വഹിക്കാന്‍ താൻ തയ്യാറാണെന്ന് യേശുദാസ് മുൻപ് തന്നെ വ്യക്തമാക്കിയിരുന്നു. രണ്ടുവാക്കുകള്‍ സംയോജിച്ചപ്പോൾ അബദ്ധവശാൽ അതൊരു തെറ്റായ ഉച്ചാരണമായിമാറി. അത് പിഴവാണ്. അത് തിരുത്തണം. ശത്രു എന്നര്‍ഥമുള്ള 'അരി', നിഗ്രഹം എന്നര്‍ഥം വരുന്ന 'വിമര്‍ദ്ദനം' എന്നീ പദങ്ങള്‍ പിരിച്ച്‌ വേണമായിരുന്നു ഉച്ചരിക്കേണ്ടിയിരുന്നത്. ഇത് ഗാനത്തിൽ പാടിയിരിക്കുന്നത് അരിവി മര്‍ദ്ദനം എന്നാണ്.

1922ല്‍ ശാസ്താംകോട്ട കോന്നകത്ത് ജാനകി അമ്മ അഷ്ടക രൂപത്തിലാണ് ഹരിവരാസനം കീര്‍ത്തനം രചിച്ചത്. 1975ല്‍ മെരിലാന്‍ഡ് സുബ്രഹ്മണ്യം നിര്‍മ്മിച്ച്‌ ശ്രീകുമാരന്‍ തമ്പി സംവിധാനം ചെയ്ത സ്വാമി അയ്യപ്പന്‍ എന്ന സിനിമയ്ക്കു വേണ്ടി ദേവരാജന്‍ മാസ്റ്ററാണ് കീര്‍ത്തനം ചിട്ടപ്പെടുത്തിയത്. അന്ന് പക്ഷേ സുഗമമായ ആലാപനത്തിനായി ദേവരാജന്‍ മാസ്റ്റര്‍ ഓരോ വരിയിലും ഉണ്ടായിരുന്ന സ്വാമി ഒഴിവാക്കിയിരുന്നു.