ഫാ ടോമിന്റെ മോചനത്തിന് വത്തിക്കാന്‍ ഇടപെടുന്നു

വത്തിക്കാന്‍: യെമനില്‍ ഭീകരര്‍ തട്ടിക്കൊണ്ടുപോയ ഫാ ടോം ഉഴുന്നാലിലിന്റെ മോചനത്തിനായി വത്തിക്കാന്‍. ഫെയ്സ്ബുക്കിലൂടെ പുറത്തുവന്ന ചിത്രം ഫാദറിന്റേതാണോയെന്നു വ്യക്തമല്ലെന്നും സന്ദേശങ്ങളുടെയും വിഡിയോയുടെയും കൃത്യതയില്‍ സംശയമുണ്ടെന്നും സലേഷ്യന്‍ സഭ അറിയിച്ചു.

അതിനിടെ, ഫാ.ടോമിന്റെ സുഹൃത്തുക്കള്‍ക്ക് ഫെയ്സ്ബുക് സന്ദേശം ലഭിച്ചു. യെമനി ഫ്രണ്ട് എന്നു പറഞ്ഞാണ് സന്ദേശം അയച്ചിരിക്കുന്നത്. ഇന്ത്യന്‍ സര്‍ക്കാരിന്റെ വാക്കുകള്‍ കള്ളത്തരമാണെന്നും സന്ദേശത്തില്‍ വ്യക്തമാക്കിയിട്ടുണ്ട്. ട്വിറ്ററില്‍ പോസ്റ്റ് ചെയ്ത ഒരു വിഡിയോയുടെ ലിങ്കും സന്ദേശത്തിലുണ്ട്. ഫാ.ടോമിന്റെ പേരില്‍ ഫെയ്സ്ബുക് പോസ്റ്റുകള്‍ വന്നു തുടങ്ങിയതോടെ അദ്ദേഹത്തിന്റെ സുഹൃത്തുക്കള്‍ ഇതാരാണെന്ന ചോദ്യമുന്നയിച്ചു മെസേജ് അയക്കുകയും ടൈംലൈനില്‍ പോസ്റ്റ് ഇടുകയും ചെയ്തിരുന്നു.

ഫാ. ടോം ഉഴുന്നാലിന്റെ അറിവോടെ അദ്ദേഹത്തിന്റെ യെമനിലെ സുഹൃത്താണ് ഇതു ചെയ്യുന്നതെന്നാണ് എല്ലാവര്‍ക്കും നല്‍കുന്ന മറുപടി. കഴിഞ്ഞ മാര്‍ച്ച്‌ നാലിനാണു കോട്ടയം സ്വദേശിയായ സലേഷ്യന്‍ വൈദികനായ ഫാ. ടോം ഉഴുന്നാലിനെ തെക്കന്‍ ഏഡനിലെ മിഷനറീസ് ഓഫ്് ചാരിറ്റീസ് സന്യാസിനീ സമൂഹത്തിന്റെ കേന്ദ്രത്തില്‍ നിന്നു ഭീകരര്‍ തട്ടിക്കൊണ്ടു പോയത്.