Ganesh Chaturthi 2022: സർവാഭീഷ്ട സിദ്ധിക്ക് വിനായക ചതുര്‍ത്ഥി വ്രതം അനുഷ്ഠിക്കേണ്ടത് ഇങ്ങനെ

സര്‍വ്വ വിഘ്നങ്ങളെയും നിവാരണം ചെയ്യുന്ന ഗണപതി ഭഗവാൻ്റെ ജന്മദിനമാണ് വിനായക ചതുര്‍ത്ഥി (Vinayaka Chaturthi 2022). ചിങ്ങമാസത്തിലെ ശുക്ല പക്ഷ ചതുര്‍ത്ഥിയാണ് വിനായക ചതുര്‍ത്ഥി ആയി ആചരിക്കുന്നത്. ഈ ദിവസം ഗണേശ പൂജ നടത്തിയാൽ സര്‍വ്വ തടസങ്ങളും ഭഗവാൻ നീക്കുമെന്നാണ് വിശ്വാസം. ഉദ്ധിഷ്ടകാര്യത്തിന് ചതുര്‍ത്ഥി വ്രതം അനുഷ്ഠിച്ചാൽ ഫലസിദ്ധി ഉണ്ടാകുമെന്നും ആചാര്യന്മാര്‍ പറയപ്പെടുന്നു.

വിനായക ചതുര്‍ത്ഥി ദിവസത്തിൽ വ്രതം ആചരിക്കാൻ ആഗ്രഹിക്കുന്നവര്‍ തലേദിവസം തന്നെ മത്സ്യമാസാംദികള്‍ ഒഴിവാക്കുക. ഒരുനേരം മാത്രം അരയാഹാരം ഭക്ഷിക്കുന്നതാണ് ഉത്തമം. ഈ ദിനം ഫലമൂലാദികള്‍, പാൽ എന്നിവ ഭക്ഷിക്കുക.

എന്താണ് വിനായക ചതുർത്ഥി, ഐതീഹ്യം അറിയാം

ചതുര്‍ത്ഥി ദിനത്തിൽ ബ്രാഹ്മ മുഹൂര്‍ത്തത്തിൽ തന്നെ എഴുന്നേൽക്കുക. സ്നാനശേഷം ഗണപതി ഗായത്രി മന്ത്രം 108 തവണ ജപിക്കുക. എല്ലാ ദിവസവും ഗണപതി ഗായത്രി ജപിക്കുന്നത് വളരെ ഉത്തമമാണെന്നും ആചാര്യന്മാര്‍ പറയുന്നു.

ഗണപതി ഗായത്രി മന്ത്രം

''ഓം ഏക ദന്തായ വിദ് മഹേ വക്രതുണ്ഡായ ധീമഹി തന്നോ ദന്തി : പ്രാചോദയത്'' (ഉദ്ദിഷ്ഠകാര്യ സിദ്ധിക്ക്)

''ഓം ലംബോദരായ വിദ് മഹേ വക്ര തുണ്ഡായ ധീമഹി തന്നോ ദന്തിഃ പ്രചോദയാത്'' (വിഘ്‌നങ്ങൾ നീങ്ങാൻ )

ഗായത്രി ജപത്തിന് ശേഷം ഗണപതി ക്ഷേത്രദര്‍ശനം നടത്തുക. വിഘ്നങ്ങളെല്ലാം അകറ്റണേ ഭഗവാനെ എന്ന് പ്രാര്‍ത്ഥിച്ചു കൊണ്ട് ഒരു നാളികേരം ഉടയ്ക്കുക. സര്‍വ്വഐശ്വര്യങ്ങളും നൽകുന്ന ഗണപതിഹോമത്തിൽ പങ്കുചേരുന്നതും ഫലസിദ്ധി നേടിത്തരും. ഹോമ പുക ശ്വസിക്കുന്നതും അനുഗ്രഹദായകമാണ്. ശേഷം വഴിപാടുകള്‍ നടത്തുക.

ദുരന്തനിവാരണത്തിനും പാപമുക്തിക്കും കറുകമാല, കാര്യസിദ്ധിക്കും വിവാഹ തടസ നിവാരണത്തിനും മുക്കുറ്റി മാല, കാര്യവിജയത്തിന് ദ്വാദശ മന്ത്രാര്‍ച്ചന, ഐശ്വര്യസിദ്ധിക്കായി സഹസ്രനാമാര്‍ച്ചന തുടങ്ങിയ വഴിപാടുകള്‍ കഴിക്കുക. ഭക്ഷണ പ്രിയനായ ഗണപതി ഭഗവാന് ഉണ്ണിയപ്പം, മോദകം തുടങ്ങിയ മധുരപരഹാരങ്ങള്‍ നിവേദിച്ചാൽ മനോസുഖം, മനസമാധാനം, കാര്യസിദ്ധി തുടങ്ങിയവയ്ക്ക് വളരെ പ്രയോജനകരമാണ്.

ചതുര്‍ത്ഥി ദിനത്തിലും ഒരുനേരം മാത്രം അരിയാഹാരം ഭക്ഷിക്കുക. സന്ധ്യയ്ക്ക് വീണ്ടും ക്ഷേത്രദര്‍ശനം നടത്തി ഗ്രഹത്തിൽ മടങ്ങിയെത്തി ഗണപതി സ്തോത്രങ്ങള്‍ പാരായണം ചെയ്യുക. ഈ ദിവസം ചന്ദ്രനെ ദര്‍ശിക്കാതെ ശ്രദ്ധിക്കണം. ഗണപതി 12 മന്ത്രങ്ങൾ അടങ്ങിയ ഗണേശ ദ്വാദശ മന്ത്രം ജപിക്കുന്നത് വളരെ ഉത്തമമാണ്. ചതുര്‍ത്ഥി ദിനത്തിൽ ഈ മന്ത്രം ജപിച്ച് ഗണേശനെ സ്തുതിച്ചാൽ സര്‍വ്വാഭീഷ്ടസിദ്ധി ഫലമാകും.

ഗണേശ ദ്വാദശ മന്ത്രം

ഓം വക്രതുണ്ഡായ നമ:
ഓം ഏകദന്തായ നമ:
ഓം കൃഷ്ണപിംഗാക്ഷായ നമ:
ഓം ഗജവക്ത്രായ നമ:
ഓം ലംബോധരായ നമ:
ഓം വികടായ നമ:
ഓം വിഘ്നരാജായ നമ:
ഓം ധ്രൂമ്രവര്‍ണ്ണായ നമ:
ഓം ഫാലചന്ദ്രായ നമ:
ഓം വിനായകായ നമ:
ഓം ഗണപതയേ നമ:
ഓം ഗജാനനായ നമ:

വിനായക ചതുര്‍ത്ഥി; ആശംസ സന്ദേശങ്ങള്‍ ഇങ്ങനെ

ഗണേശ മന്ത്രങ്ങൾ

''ഏകദന്തം മഹാകായം തപ്തകാഞ്ചന സന്നിഭം
ലംബോദരം വിശാലാക്ഷം വന്ദേഹം ഗണനായകം''

''ചിത്രരത്ന വിചിത്രാംഗം ചിത്രമാലാ വിഭൂഷിതം
കാമരൂപധരം ദേവം വന്ദേഹം ഗണനായകം ''

''അംബികാ ഹൃദയാനന്ദം മാതൃഭിർ പരിവേഷ്ടിതം
ഭക്തപ്രിയം മദോന്മത്തം വന്ദേഹം ഗണനായകം''

''സര്‍വ്വവിഘ്നഹരം ദേവം സര്‍വ്വവിഘ്നവിവര്‍ജ്ജിതം
സര്‍വ്വസിദ്ധിപ്രദാതാരം വന്ദേഹം ഗണനായകം ''

''ഗജാനനം ഭൂത ഗണാതി സേവിതം
കപിത്ഥജംഭൂ ഫല സാര ഭക്ഷിതം
ഉമാസുതം ശോക വിനാശ കാരണം
നമാമി നമാമി വിഘ്‌നേശ്വര പാദ പങ്കജം ''

''വക്രതുണ്ട മഹാകായ സൂര്യകോടി സമപ്രഭ.
നിര്‍വിഘ്നം കുരുമേ ദേവ സര്‍വ്വ കാര്യേഷു സര്‍വ്വധാ''

ചതുര്‍ത്ഥി ദിനത്തിന് പിറ്റേന്ന് (പഞ്ചമി) സ്നാനം ചെയ്ത് ശുദ്ധിയായി ക്ഷേത്രദര്‍ശനം നടത്തുക. ശേഷം തീര്‍ത്ഥ സേവിച്ച് പാരണ ഉണ്ടാകുന്നതാണ്. ഇത്തരത്തിലാണ് ഗണേശ ചതുര്‍ത്ഥ വ്രതം അനുഷ്ഠിക്കുന്നത്.