സര്‍വ്വ സൗഭാഗ്യ സിദ്ധിക്ക് കുമാര ഷഷ്ഠി വ്രതം അനുഷ്ഠിക്കാം

ഇന്ന് കുമാരഷഷ്ഠി. ജീവിതത്തിൽ എല്ലാവിധ ഐശ്വര്യങ്ങളും നേടിത്തരുന്ന വ്രതമായ കുമാരഷഷ്ഠി വ്രതം ഈ ദിവസം അനുഷ്ഠിക്കുന്നത് വളരെ ഉത്തമമാണ്. സന്താനങ്ങൾക്ക് ക്ഷേമം, സർവൈശ്വര്യം, സർവകാര്യസിദ്ധി എന്നിവയാണ് കുമാരഷഷ്ഠി വ്രതത്തിൻ്റെ ഫലം.

മാസത്തിലെ കറുത്തവാവിനു ശേഷമുള്ള വെളുത്തപക്ഷ ഷഷ്ഠി ദിവസമാണ് വ്രതം അനുഷ്ഠിക്കേണ്ടത്. ഷഷ്ഠി ദിനത്തിൽ സുബ്രഹ്മണ്യ ഭഗവാൻ ഭൂമിയിൽ അവതരിച്ചു എന്നാണ് വിശ്വാസം. ഷഷ്ഠിവ്രതത്തിന് 5 ദിവസം മുൻപ് തന്നെ വ്രതം ആരംഭിക്കേണ്ടതുണ്ട്. എന്നാൽ ഷഷ്ഠിയുടെ തലേ ദിവസമായ പഞ്ചമിനാളിൽ ഒരിക്കലോടെ ഷഷ്ഠിദിനത്തിൽ മാത്രം വ്രതം അനുഷ്ഠിക്കുന്നവരും കുറവല്ല.
എങ്ങനെ വ്രതം അനുഷ്ടിക്കാം

വ്രത ദിനങ്ങളിൽ കുളിച്ച് ശുദ്ധിയായ ശേഷം മാത്രമേ ഭക്ഷണം കഴിക്കാവൂ. രാവിലെയും വൈകിട്ടും സുബ്രഹ്മണ്യനാമ ഭജനവും ഒരിക്കലൂണും അഭികാമ്യമാണ്. ഷഷ്ഠിയുടെ ദിവസം ഉപവാസത്തോടെ സുബ്രഹ്മണ്യ ക്ഷേത്രത്തിൽ ദർശനവും വഴിപാടുകളും മറ്റും നടത്തി അവിടെ തന്നെ കഴിച്ചു കൂട്ടുക. ഉച്ചസമയത്ത് നടക്കുന്ന ഷഷ്ഠി പൂജ വന്ദിച്ച് അവിടെ നേദിച്ച പടച്ചോറും കഴിച്ച് വ്രതം പൂർത്തിയാക്കാം. സന്ധ്യയ്ക്ക് സുബ്രഹ്മണ്യ ഭജനവും ഷഷ്‌ഠി സ്‌തുതിയും ചൊല്ലണം. പിറ്റേന്നു തുളസീതീർത്ഥം സേവിച്ചാണ് പാരണവിടേണ്ടത്.


കുമാരഷഷ്ടി ഐതീഹ്യം

ഒരിക്കൽ പാർവ്വതീ ദേവിയോടു പിണങ്ങി സുബ്രഹ്മണ്യൻ സർപ്പാകൃതി പൂണ്ട് ഒളിച്ചിരുന്നു. പുത്രനെ കാണാത്തതിൽ ദുഃഖിതയായ ദേവി 108 ഷഷ്ഠിവ്രതം അനുഷ്ഠിച്ച് പുത്രനെ തിരിച്ചു കൊണ്ടു വന്നു എന്നാണ് ഒരു ഐതീഹ്യ കഥ. ഇനി മറ്റൊരു കഥയിൽ താരകാസുര നിഗ്രഹത്തിനായി ദേവന്മാരും ഷഷ്ഠി വ്രതമനുഷ്ഠിച്ച് സുബ്രഹ്മണ്യനെ പൂജിച്ചു എന്നും പ്രതിപാദിച്ചിട്ടുണ്ട്.


വ്രതഫലം ആര്‍ക്കൊക്കെ

ജാതകവശാൽ ചൊവ്വ അനിഷ്ടസ്ഥാനത്തു നിൽക്കുന്നവരും ചൊവ്വാ ദോഷം അനുഭവിക്കുന്നവരും ഷഷ്ടി വ്രതം അനുഷ്ഠിക്കുന്നത് ഉത്തമമാണ്. സന്താനങ്ങളുടെ ഇഷ്ടം നേടാനും അവരുടെ ഉയര്‍ച്ചയ്ക്കും വ്രതദിനങ്ങളിൽ പ്രഭാത സ്നാനത്തിനു ശേഷം 10 തവണ സുബ്രഹ്മണ്യ ഗായത്രി ജപിക്കുന്നത് ഉത്തമമാണ്.

സുബ്രഹ്മണ്യ മന്ത്രം

|| ഷഡാനനം ചന്ദന ലേപിതാംഗം |

| മഹാത്ഭുതം ദിവ്യ മയൂര വാഹനം |

| രുദ്രസ്യ സൂനും സുരലോക നാഥം |

| ബ്രമണ്യ ദേവം ശരണം പ്രബദ്യേ |

| ആശ്ചര്യവീരം സുകുമാരരൂപം |

| തേജസ്വിനം ദേവഗണാഭിവന്ദ്യം |

| ഏണാങ്കഗൗരീ തനയം കുമാരം |

| സ്കന്ദം വിശാഖം സതതം നമാമി |

| സ്കന്ദായ കാർത്തികേയായ |

| പാർവതി നന്ദനായ ച |

| മഹാദേവ കുമാരായ |

| സുബ്രഹ്മണ്യയായ തേ നമ ||