ഇന്ന് മുഹറം 10; പ്രത്യേകതകളറിയാം

കാപ്പാട് മാസപ്പിറവി കണ്ടതോടെ കേരളത്തിൽ മുഹറം മാസത്തിന് സെപ്റ്റംബർ 10നാണ് തുടക്കമായത്. ഹിജറ കലണ്ടര്‍ പ്രകാരം 1440-ാം വര്‍ഷത്തിനാണ് തുടക്കമായത്. ഇതോടെ സെപ്റ്റംബര്‍ 20 വ്യാഴാഴ്ച്ച മുഹറം പത്തായി ആഘോഷിക്കുകയാണ്. മുഹറം എന്നാല്‍ നിഷിദ്ധമാക്കപ്പെട്ടത്, പവിത്രമായത് എന്നെല്ലാമാണ് അറബിയില്‍ അര്‍ത്ഥം. ഇസ്ലാമിക കലണ്ടര്‍ അനുസരിച്ച് ഒന്നാമത്തെ മാസമാണ് മുഹറം. ഇസ്ലാം നിയമമനുസരിച്ച് യുദ്ധം നിരോധിക്കപ്പെട്ട നാലുമാസങ്ങളില്‍ ഒന്നാണ് ഇത്. ഈ മാസത്തിലെ ഒമ്പതിനും പത്തിനും നോമ്പ് നോല്‍ക്കുന്നത് വളരെ പുണ്യമുള്ള കാര്യമായാണ് കണക്കാക്കപ്പെടുന്നത്.

മുഹറം മാസത്തില്‍ നോമ്പെടുക്കല്‍ വളരെ പുണ്യമുള്ള കാര്യമാണെന്ന് പ്രവാചകരുടെ വചനങ്ങളില്‍ നിന്നും വ്യക്തമാവുകയും പത്തിന് മാത്രമല്ല അതോടുകൂടി ഒമ്പതിനോ അസാധ്യമെങ്കില്‍ പതിനൊന്നിനോ നോമ്പനുഷ്ടിക്കല്‍ സുന്നത്താണെന്ന് കൂടി വ്യക്തമാക്കുന്ന രേഖകള്‍ ലഭ്യമാവുകയും ചെയ്തിട്ടുണ്ട്. അതോടൊപ്പം ആദ്യ പത്ത് മുഴുവൻ നോമ്പ് പുണ്യമുള്ള ദിനങ്ങളുമാണ്. ഒരു നോമ്പിന് മുപ്പത് നോമ്പിന്റെ പുണ്യം ലഭിക്കുമെന്നും പല മുന്‍കാല പണ്ഡിതരും പറഞ്ഞിട്ടുണ്ട്.

മുഹർറം 9, 10 ദിവസങ്ങളെ താസൂആ, ആശൂറാ എന്നാണ് വിളിക്കുന്നത്. ഇസ്ലാമിക ചരിത്രത്തിൽ സുപ്രധാനമായ ഒട്ടേറെ സംഭവങ്ങൾക്ക് സാക്ഷ്യം വഹിച്ച മാസമാണിത്.പ്രവാചകൻ മൂസയെയും അനുയായികളെയും ഫറോവയിൽ നിന്ന് രക്ഷിച്ച ദിനമെന്ന നിലക്കാണ് ജൂതവിഭാഗങ്ങളും മുസ്ലിംകളും ഇതിനെ പ്രാധാന്യത്തോടെ വീക്ഷിക്കുന്നത്. ഫറോവ കടലിൽ മുങ്ങിമരിക്കുന്നതും മുഹർറം 10 നാണ്.ഇസ്ലാമിക ചരിത്രത്തിലെ കർബല സംഭവും പ്രവാചക പൗത്രൻ ഹുസൈന്റെ രക്തസാക്ഷ്യവും ഈ ദിനത്തിലായിരുന്നു യൂസുഫ് നബി ജയിലിൽ നിന്ന് രക്ഷപ്പെട്ടതും യൂനുസ് നബി മത്സ്യ വയറ്റിൽനിന്ന് രക്ഷപ്പെട്ടതും ഈ മാസത്തിലാണ്.