കത്തോലിക്കര്‍ക്കും വനിത പുരോഹിതർ

വത്തിക്കാന്‍ സിറ്റി: കത്തോലിക്ക പള്ളികളില്‍ ഡീക്കന്മാരായി ഇനി വനിതകളെ നിയമിക്കാൻ മാ‍ർപാപ്പ. ഇതു സംബന്ധിച്ച് പഠിച്ച് റിപ്പോര്‍ട്ടു നല്‍കാന്‍ പ്രത്യേക കമ്മിഷനെ ചുമതലപ്പെടുത്തി. ജോണ്‍പോള്‍ രണ്ടാമന്‍ മാര്‍പ്പാപ്പ ഇതു സംബന്ധിച്ച് പഠനം നടത്തിച്ചെങ്കിലും 1994-ല്‍ ഈ നിര്‍ദ്ദേശം തള്ളിയിരുന്നു. ഫ്രാന്‍സിസ് മാര്‍പ്പാപ്പ ഇക്കാര്യത്തില്‍ സമിതിയുടെ ശുപാര്‍ശ വരട്ടെയെന്ന നിലപാടിലാണ്.

നിയുക്ത സമിതിയിലെ 13 അംഗങ്ങളില്‍ ആറുപേരാണ് വനിതകള്‍. നിലവില്‍, പള്ളികളിലെ മുഖ്യപുരോഹിതന്റെ തൊട്ടുതാഴെയുള്ള പദവിയില്‍ നിയോഗിക്കാനാണ് ആലോചന.

ഇവര്‍ക്ക് കുര്‍ബാന നടത്താനോ, കുമ്പസാരിപ്പിക്കാനോ അധികാരമില്ല. എന്നാല്‍ മുഖ്യ പുരോഹിതന്റെ അഭാവത്തില്‍ ഒട്ടേറെ കാര്യങ്ങള്‍ക്ക് മേല്‍നോട്ടം വഹിക്കാന്‍ അധികാരം കിട്ടും. മാമോദിസ, വിവാഹം, അന്ത്യശുശ്രൂഷ തുടങ്ങിയവ നടത്താം. വിവാഹം കഴിക്കാനും ഇവര്‍ക്ക് അനുമതിയുണ്ടാകും. ശുപാര്‍ശ നല്‍കാന്‍ സമിതിക്ക് സമയപരിധിയൊന്നും നിശ്ചയിട്ടില്ലെന്ന് വത്തിക്കാന്‍ പത്രക്കുറിപ്പില്‍ അറിയിച്ചു. സ്‌പെയിന്‍ ആര്‍ച്ച് ബിഷ്പ് ലൂയിസ് ലദാറിയയാണ് സമിതി അദ്ധ്യക്ഷന്‍.