കര്‍ദ്ദിനാളിനെ കരിങ്കൊടി കാട്ടാന്‍ വൈദികര്‍

എറണാകുളം: അതിരൂപതയിലെ പ്രശ്നങ്ങള്‍ പരിഹരിക്കാതെ കര്‍ദ്ദിനാള്‍ ജോര്‍ജ് ആലഞ്ചേരി ഇടവകകളിലെയും സ്ഥാപനങ്ങളിലെയും പരിപാടികളില്‍ പങ്കെടുക്കരുതെന്നും പങ്കെടുത്താല്‍ സഹകരിക്കില്ലെന്ന് വൈദികര്‍. ഈ ആവശ്യം അംഗീകരിക്കാത്ത പക്ഷം കര്‍ദ്ദിനാളിനെ ബഹിഷ്‌ക്കരിക്കാനും അദ്ദേഹം പങ്കെടുക്കുന്ന മുഴുവന്‍ പൊതുചടങ്ങുകളിലും കരിങ്കൊടി ഉള്‍പ്പെടെ ഉയര്‍ത്തി പ്രതിഷേധിക്കാനാണ് തങ്ങളുടെ തീരുമാനമെന്നും വൈദികര്‍ മുന്നറിയിപ്പ് നല്‍കുന്നു.

പതിനാറോളം ഫെറോനകളില്‍ നിന്നുള്ള പ്രതിനിധികളായ 57ഓളം വൈദികരും സ്ഥലമിടപാടിനെതിരെ രംഗത്തുള്ള അതിരൂപത സുതാര്യതാ സമിതി ഭാരവാഹികളും പങ്കെടുത്ത അനൗദ്യോഗിക യോഗം കഴിഞ്ഞ ദിവസം കലൂര്‍ റിന്യൂവല്‍ സെന്ററില്‍ വച്ച്‌ ചേര്‍ന്നിരുന്നു. ഭൂമി വിവാദ വിഷയം ചര്‍ച്ച ചെയ്യാന്‍ ഏതാനും വൈദികരെ ചുമതലപ്പെടുത്തിയ സാഹചര്യത്തില്‍ പ്രശ്നങ്ങളെല്ലാം പരിഹരിച്ചെന്ന കര്‍ദ്ദിനാളിന്റെ പ്രഖ്യാപനം തികച്ചും അപഹാസ്യമായി പോയെന്നും യോഗം വിലയിരുത്തി.