പാപനാശത്തിനായി ശിവരാത്രി

സര്‍വ്വ പാപങ്ങളും തീര്‍ക്കുന്നതാണ് ശിവരാത്രി വ്രതം. ശിവപ്രീതിക്ക് ഏറ്റവും നല്ല ദിവസവും ഇത് തന്നെയെന്നാണ് കണ്കകാക്കപ്പെടുന്നത്. ഗുരുശാപം, സ്ത്രീ ശാപം തുടങ്ങിയ മഹാപാപങ്ങള്‍ പോലും ശിവരാത്രി വ്രതം മൂലം ഇല്ലാതാവുന്നു എന്നാണ് വിശ്വാസം. പൂർവ പിതാമഹന്മാരുടെ ആത്മാക്കൾക്ക് മോക്ഷം ലഭിക്കുന്നതിനായി അന്നേ ദിവസം ബലി കർമങ്ങൾ അനുഷ്ഠിക്കുന്നതും ആചാരമാണ്.

ശിവരാത്രിയെക്കുറിച്ച് ഐതിഹ്യങ്ങള്‍ ഏറെയുണ്ട്. പാലാഴിമഥനസമയത്ത് ഉയര്‍ന്നുവന്ന വിഷം ലോകനാശനത്തിന് കാരണമാകുമെന്ന് കമ്ട മഹാദേവന്‍ അത് പാനം ചെയ്തു. കൊടി വിഷം ഉള്ളില്‍ ചെന്ന് ശിവന്‍റെ ജീവന് ഹേതുവാകുമോ എന്ന് ഭയന്ന് പത്നിയായ പാര്‍വതി കഴുത്തില്‍ അമര്‍ത്തിപ്പിടിച്ചു. വിഷം പുറത്തേക്ക് വരാതിരിക്കാന്‍ മഹാവിഷ്ണു വായയും അടച്ചു. അങ്ങനെ നീലനിറമാര്‍ന്ന വിഷം കണ്ഠത്തില്‍ കുടുങ്ങിയാണ് ശിവന് നീലകണ്ഠൻ എന്ന പേര് പോലും ലഭിച്ചത്.

അന്ന് പാർവതി ശിവന് ആപത്തൊന്നും സംഭവിക്കാതിരിക്കാന്‍ ഉറക്കമൊഴിച്ചു പ്രാര്‍ത്ഥിച്ചുവത്രേ. അതിന്‍റെ ഓര്‍മ്മയ്ക്കായാണ് ശിവരാത്രി ഉറക്കംവെടിഞ്ഞ് വ്രതമെടുത്ത് ആഘോഷിക്കുന്നത് എന്നാണ് ഒരു ഐതിഹ്യം.

ഉറക്കമൊഴിഞ്ഞുള്ള വ്രതമാണ് ശിവരാത്രിയുടെ പ്രത്യേകത. ശിവസ്തുതികളും മന്ത്രവും ജപവുമായാണ് രാത്രി ശിവഭക്തര്‍ ഉറക്കമൊഴിഞ്ഞിരിക്കുന്നത്. വ്രതമെടുക്കുന്നവര്‍ പകല്‍ അരിഭക്ഷണം കഴിക്കുകയില്ല. കേരളത്തില്‍‍ ആലുവ, വൈക്കം, തൃശൂര്‍, തൃപ്രങ്ങോട്ട്, കല്ലേക്കുളങ്ങര, തിരുനക്കര എന്നിവിടങ്ങളിലെ ശിവക്ഷേത്രങ്ങളില്‍ ശിവരാത്രി ആഘോഷം പ്രധാനമാണ്.