വിവാഹത്തിൽ താലിയുടെ മാഹാത്മ്യം

പ്രകൃതി-പുരുഷ സങ്കൽപത്തിൻ്റെ പ്രതീകമാണ് താലി. പഞ്ചത്തിൻ്റെ നിയതാവായ പരമാത്മാവാണു പുരുഷൻ. ആ പരമാത്മാവിൻ്റെ ശക്തിയാണു പ്രകൃതി അഥവാ സ്ത്രീ. ഈ പ്രകൃതിയും പരമാത്മാവും തമ്മിലുള്ള സംഗമമാണു താലി കൊണ്ടു സൂചിപ്പിക്കുന്നത്. സ്ത്രീയുടെ ജീവിതത്തിൽ താലിക്ക് സുപ്രധാനമായ സ്ഥാനമാണ് കല്പിക്കുന്നത്.

സ്ത്രീകളെ സംബന്ധിച്ചിടത്തോളം താലി നല്‍കുന്ന സുരക്ഷിതത്വബോധം വളരെ വലുതാണ്. സത്വ,രജ,തമോ ഗുണങ്ങള്‍ വഹിക്കുന്ന താലിചരടില്‍ വീഴുന്ന കെട്ടില്‍ മായാശക്തി സ്ഥിതിചെയ്യുന്നു.

വരന്‍ വധുവിൻ്റെ കഴുത്തില്‍ ചാര്‍ത്തുന്ന താലിക്ക് മംഗല്യസൂത്രം എന്നും പറയും. മംഗളം എന്നാല്‍ നന്മയെന്നര്‍ത്ഥം. മംഗളത്തില്‍നിന്നും മാംഗല്യം (വിവാഹം)എന്നര്‍ത്ഥമുണ്ടായി. സൂത്രമെന്നാല്‍ ചരടിനെ സൂചിപ്പിക്കുന്നു. പുരുഷനാല്‍ ഒരു സ്ത്രിയുടെ കഴുത്തില്‍ ചരട് കെട്ടുമ്പോള്‍ ധാരണാ ബലമനുസരിച്ച് ചരട് കെട്ടിയ പുരുഷനും ആ താലി കഴുത്തിൽ ഏറ്റുവാങ്ങിയ സ്ത്രീയും പരസ്പരം പുരുഷനും ശക്തിയുമായി ബന്ധിക്കപ്പെട്ടു എന്നര്‍ത്ഥം.

ആലിലയുടെ ആകൃതിയിലോ ത്രികോണ ആകൃതിയിലോ ഉള്ള താലി മഞ്ഞചരടില്‍ കൊരുത്താണ് ചാര്‍ത്തുന്നത്. ആലിലയുടെ ആകൃതിയിൽ തയാറാക്കുന്ന സ്വർണ്ണത്താലി തുമ്പില്‍ ബ്രഹ്മാവും താലി മദ്ധ്യത്തില്‍ വിഷ്ണുവും താലി മൂലത്തില്‍ മഹേശ്വരനും സ്ഥിതി ചെയ്യുന്നു എന്നാണ് ഹൈന്ദവസങ്കല്പം. ഇതു വ്യക്തമാക്കാനായി ആലിലത്താലിയിൽ ഓംകാരം കൊത്തിവയ്ക്കുന്നു. താലി ചരടില്‍ കെട്ടണമെന്നാണ് നിയമം. അതിനും കാരണമുണ്ട്. രജോഗുണ പ്രാധാന്യമുള്ള സ്ഥൂലം, സൂക്ഷ്മം, കാരണം എന്നീവ മൂന്നും, പ്രകൃതിയില്‍ ലഭ്യമായ നാരുകള്‍ കൊണ്ടുള്ള ചരടില്‍ കോര്‍ത്ത് കഴുത്തിനു പുറകില്‍ കെട്ടണം. ഈ കെട്ടിനാണ് പ്രാധാന്യം. (മൂന്നും അഞ്ചും ഏഴു നാരുകള്‍ കൂട്ടി ചേര്‍ത്ത് മഞ്ഞനിറം പിടിപ്പിച്ച ചരട് താലി കെട്ടാന്‍ ഉപയോഗിക്കുന്നതാണ് നല്ലത്).

ഏതൊരവസ്ഥയെയും നേരിടാനുള്ള മനഃശക്തി ഉണ്ടായിരിക്കണമെന്ന ദൃഢ സങ്കല്‍പത്തോടെ വേണം ഈ കെട്ട് മുറുക്കാന്‍. അതായത്, സ്ത്രീയുടെ കഴുത്തെന്ന പ്രാണസ്ഥാനത്തെ ചുറ്റിനില്‍ക്കുന്നതും, ത്രിഗുണാവസ്ഥകളും, താലിയിലെ ത്രിമൂര്‍ത്തി ഭാവവും കെട്ട് എന്ന ദൃഢനിശ്ചയവും ഒന്നിക്കുമ്പോള്‍ മംഗല്യസൂത്രം പ്രപഞ്ചശക്തിരൂപമായി മാറുന്നു.

കഴുത്ത് എന്നത് പ്രാണസ്ഥാനമാണ്.അപ്പോള്‍ പ്രാണസ്ഥാനത്തെ വലയം ചെയ്യുന്ന മൂന്ന് ഗുണങ്ങളും(ചരട്) ത്രിമൂര്‍ത്തികളും(താലി) മായാശക്തിയും(കെട്ട്)ഒന്നിച്ച് ചേരുമ്പോള്‍, താലി ചരട് പ്രപഞ്ചത്തിൻ്റെ സ്വരൂപമായി മാറുന്നു.