തൃശൂർ പൂരത്തിന് ഇന്ന് കൊടിയേറും

തൃശൂര്‍: തൃശൂര്‍ പൂരത്തിന്‌ ഇന്ന് കൊടിയേറും. രാവിലെ 11.30നും 12നും ഇടയില്‍ തിരുവമ്പാടി ക്ഷേത്രത്തിലും ഉച്ചയ്‌ക്ക്‌ 12.15നു പാറമേക്കാവ്‌ ക്ഷേത്രത്തിലും തിരുവുത്സവത്തിന് അരങ്ങുണര്‍ത്തിക്കൊണ്ട് കൊടിയേറ്റ് നടക്കും. തിരുവമ്പാടിയില്‍ രാവിലെ 11.30ന്‌ ഭൂമിപൂജ നടക്കും. തുടര്‍ന്നു കൊടിമരത്തില്‍ കൊടിക്കൂറ കെട്ടി നാട്ടുകാര്‍ ചേര്‍ന്ന്‌ കൊടി ഉയര്‍ത്തും. തുടര്‍ന്ന്‌ നടുവിലാല്‍, നായ്‌ക്കനാല്‍ എന്നിവിടങ്ങളിലും കൊടിയേറും.

പാറമേക്കാവില്‍ 12.15 നും 12.30 നും ഇടയിലാണ്‌ കൊടിയേറ്റ് നടക്കുക. ഉച്ചയ്‌ക്ക്‌ രണ്ടരയ്‌ക്ക്‌ ക്ഷേത്രത്തില്‍ നിന്ന്‌ പൂരം പുറപ്പാടിന് ആരംഭമാകും. ശ്രീമൂലസ്‌ഥാനത്ത്‌ മേളം കൊട്ടിക്കലാശിച്ച്‌ നടുവില്‍ മഠത്തിലെത്തി ആറാട്ടോടെ ഭഗവതി തിരിച്ചെഴുന്നളളും. തേക്കിന്‍കാട്‌ മൈതാനിയില്‍ കൊടിയുയര്‍ത്തുമ്പോള്‍ ഇരുവിഭാഗവും ശബ്ദമുഖരിതമായ ചെറു വെടിക്കെട്ട് നടത്തും. 25 നാണ്‌ തൃശൂര്‍പൂരം. പൂരത്തോട് അബന്ധിച്ചുളള പൂരം പ്രദര്‍ശനവും ആരംഭിച്ചിട്ടുണ്ട്.