പാപമോക്ഷത്തിനും ഐശ്വര്യലബ്ധിക്കും ജന്മാഷ്ടമി വ്രതം

ലോകത്തിലെ നന്മയ്ക്ക് അപചയം സംഭവിച്ചപ്പോള്‍ ധര്‍മ്മം പുനസ്ഥാപിക്കാൻ മഹാവിഷ്ണു സാക്ഷാൽ ശ്രീകൃഷ്ണനായി അവതരിച്ച ദിനമാണ് ജന്മാഷ്ടമി. ചിങ്ങമാസത്തിൽ രോഹിണി നക്ഷത്രവും അഷ്ടമി തിഥിയും ഒത്തുചേര്‍ന്ന അപൂര്‍വ്വ ദിനത്തിലാണ് ഭഗവാൻ ശ്രീകൃഷ്ണൻ അവതരിക്കുന്നത്. ഈ വര്‍ഷത്തിലെ അഷ്ടമി തിഥി ഓഗസ്റ്റ് 23 ന് രാവിലെ 8.09 ന് ആരംഭിച്ച് 24 ന് രാവിലെ 8.32 ന് അവസാനിക്കും. 23-ാം തീയതിയാണ് ശ്രീകൃഷ്ണ ജയന്തി ആഘോഷം. ഭഗവാൻ ശ്രീകൃഷ്ണൻ്റെ ജന്മദിവസം വ്രതം അനുഷ്ഠിച്ചാൽ മോക്ഷപ്രാപ്തി ലഭിക്കുമെന്നാണ് വിശ്വാസം.

വ്രതാനുഷ്ഠാനം ഇങ്ങനെ

ജന്മാഷ്ടമി ദിനത്തിൻ്റെ തലേന്ന് സപ്തമി തിഥിയിൽ തന്നെ ജന്മാഷ്ടമി വ്രതാനുഷ്ഠാനം ആരംഭിക്കും. അതിരാവിലെ എഴുന്നേറ്റ് കുളിച്ച് ക്ഷേത്ര ദര്‍ശനം നടത്തുന്നതോടെ വ്രതം തുടങ്ങും. ഈ ദിവസം ആഹാരകാര്യങ്ങളിൽ ശ്രദ്ധ നൽകണം. മത്സ്യമാംസാദികള്‍, അരിയാഹാരം എന്നിവ ഒഴിവാക്കുക. പാല്, പഴവര്‍ഗങ്ങള്‍ തുടങ്ങിയവ ഭക്ഷണത്തിൽ ഉള്‍പ്പെടുത്തുന്നതാണ് ഉചിതം.

രാവിലെയും വൈകുന്നേരവും ക്ഷേത്രദര്‍ശനം നടത്തണം. പാൽപ്പായസം, തൃക്കൈവെണ്ണ, ഉണ്ണിയപ്പം, ത്രിമധുരം, കദളിപ്പഴം, തുളസിമാല എന്നിവ വഴിപാടായി സമര്‍പ്പിക്കുന്നത് ഭഗവൽപ്രീതിക്ക് അനുകൂലമാണ്. കൂടാതെ ഭാഗ്യസൂക്ത അര്‍ച്ചന, രാജഗോപാല മന്ത്രാര്‍ച്ചന, വിഷ്ണുസഹസ്രനാമ അര്‍ച്ചന, സന്താനഗോപാല മന്ത്രാര്‍ച്ചന എന്നിവ വഴിപാടായി കഴിക്കുന്നതും ഉത്തമമാണ്. ജന്മാഷ്ടമി ദിനത്തിൽ നെയ്‍വിളക്ക് സമര്‍പ്പിച്ചാൽ കുടുംബ ജീവിത ഭദ്രത കൈവരും എന്നാണ് വിശ്വാസം.

ക്ഷേത്ര ദര്‍ശനം പൂര്‍ത്തിയാക്കി വീട്ടിലെത്തിയ ശേഷം വിഷ്ണു സഹസ്രനാമം, വിഷ്ണു ഗായത്രി മന്ത്രം എന്നിവ ജപിക്കുക. വ്രതദിവസം ഭഗവാൻ ശ്രീകൃഷ്ണൻ്റെ മൂലമന്ത്രമായ ഓം നമോ ഭഗവതേ വാസുദേവായ ജപിച്ചാൽ ദോഷകാഠിന്യം കുറയുമെന്നാണ് വിശ്വാസം.

സപ്തമി ദിനത്തിൽ ആരംഭിച്ച് അഷ്ടമി ദിനത്തിൽ തുടര്‍ന്ന് നവമി ദിവസം രാവിലെ അവസാനിപ്പിക്കാം. നവമി ദിവസം പുലര്‍ച്ചെ കുളിച്ച് ക്ഷേത്രദര്‍ശനം നടത്തി തുളസി തീർ‍ത്ഥം സേവിച്ചശേഷം മാത്രമേ വ്രതം അവസാനിപ്പിക്കാവൂ.

Read More: കൃഷ്ണ ജന്മാഷ്ടമി; ഐതീഹ്യം അറിയാം


ഈ ദിവസം നടത്തേണ്ട വഴിപാടുകൾ; ഫലങ്ങൾ

1. ഭാഗ്യസൂക്ത അര്‍ച്ചന

ക്ഷേത്രങ്ങളിൽ ഭക്തൻ്റെ ഭാഗ്യലബ്ധിക്കായി നടത്തിവരുന്ന വഴിപാടാണ് ഭാഗ്യസൂക്ത അര്‍ച്ചന. ക്ഷേത്രദര്‍ശനം കഴിഞ്ഞ് ഇഷ്ടദേവതയെ മനസിൽ വിചാരിച്ച് ഭാഗ്യസൂക്തം ജപിക്കുന്നതും ഉത്തമമാണ്.

ഭാഗ്യസൂക്തം
''ഓം പ്രാതരഗ്നിം പ്രാതരിന്ദ്രം ഹവാമഹേ പ്രാതര്‍മ്മിത്രാ വരുണാ പ്രാതരശ്വിനാ. പ്രാതര്‍ഭഗം പൂഷണം ബ്രാഹ്മണസ്പതിം പ്രാതസ്സോമമുത രുദ്രം ഹുവേമ.

പ്രാതര്‍ജ്ജിതം ഭഗമുഗ്രം ഹുവേമ വയം പുത്രമദിതേര്‍യ്യോ വിധര്‍ത്താ. ആദ്ധ്രശ്ചിദ്യം മന്യമാനസ്തുരശ്ചിദ്രാജാ ചിദ്യം ഭഗം ഭക്ഷീത്യാഹ.

ഭഗ പ്രണേതര്‍ഭഗ സത്യ രാധോ ഭഗേമാം ധിയമുദവ ദദന്ന: ഭഗ പ്ര ണോ ജനയ ഗോഭിരശ്വൈര്‍ഭഗ പ്രനൃഭിര്‍ നൃവന്തസ്യാമ.

ഉതേദാനീം ഭഗവന്തസ്യാമോത പ്രപിത്വ ഉത മദ്ധ്യേ അഹ്നാം. ഉതോദിതാ മഘവന്‍ സൂര്‍യ്യസ്യ വയം ദേവാനാം സുമതൗ സ്യാമ.

ഭഗ ഏവ ഭാഗവാന്‍ അസ്തു ദേവാസ്തേന വയം ഭഗവന്തസ്സ്യാമ. തന്ത്വാ ഭഗ സര്‍വ്വ ഇജ്ജോഹവീമി സ നോ ഭഗ പുര ഏതാ ഭവേഹ.

സമദ്ധ്വരായോഷസോ നമന്ത ദധിക്രാവേവ ശുചയേ പദായ. അര്‍വ്വാചീനം വസുവിദം ഭഗന്നോരഥമിവാശ്വാ വാജിന ആവഹന്തു.

അശ്വാവതീര്‍ഗ്ഗോമതീര്‍ന്ന ഉഷാസോ വീരവതീസ്സദമുച്ഛന്തു ഭദ്രാ: ഘൃതം ദുഹാനാ വിശ്വത: പ്രപീനായൂയം പാത സ്സ്വസ്തിഭിസ്സദാ ന:

യോ മാഅഗ്നേ ഭാഗിനം സന്തമഥാഭാഗഞ്ചികീര്‍ഷതി. അഭാഗമഗ്നേ തം കുരു മാമഗ്നേ ഭാഗിനം കുരു''


2. രാജഗോപാല മന്ത്രാര്‍ച്ചന

ക്ഷേത്രത്തിൽ ഭക്തൻ്റെ സമ്പൽസമൃദ്ധിക്കായി നടത്തി വരുന്ന വഴിപാടാണ് രാജഗോപാല മന്ത്രാര്‍ച്ചന. തൊഴിൽപരമായ ക്ലേശങ്ങള്‍ക്കും ഉദ്യോഗ ഉന്നതിക്കും ഈ മന്ത്രാര്‍ച്ചന ഉത്തമാണ്.

3. വിഷ്ണുസഹസ്രനാമ അര്‍ച്ചന

ക്ഷേത്രങ്ങളിൽ ഭക്തന് ഐശ്വര്യലബ്ധിക്കായി നടത്തിവരുന്ന വഴിപാടാണ് വിഷ്ണുസഹസ്രനാമ അര്‍ച്ചന. ഭഗവാൻ വിഷ്ണുവിൻ്റെ 1000 പേരുകള്‍ ഉച്ഛരിച്ചുകൊണ്ടുള്ള സ്തുതിയാണ് വിഷ്ണുസഹസ്രനാമം. നിത്യവും വിഷ്ണു സഹസ്രനാമം ജപിച്ചാൽ കാര്യസിദ്ധി, പരീക്ഷാവിജയം, തുടങ്ങിയവയാണ് ഫലങ്ങള്‍.

4. സന്താനഗോപാല മന്ത്രാര്‍ച്ചന

ക്ഷേത്രങ്ങളിൽ ഭക്തന് സന്താനലബ്ധിക്കായി നടത്തിവരുന്ന വഴിപാടാണ് സന്താനഗോപാല മന്ത്രാര്‍ച്ചന. അഷ്ടമി ദിനത്തിൽ സന്താനഗോപാല മന്ത്രം ജപിച്ചാൽ സന്താന ലബ്ധി ഉണ്ടാകുമെന്നാണ് വിശ്വാസം. ഈ മന്ത്രം 41 പ്രാവശ്യമാണ് ജപിക്കേണ്ടത്.

സന്താനഗോപാല മന്ത്രം
''ദേവകീസുത ഗോവിന്ദ വാസുദേവ ജഗത്പതേ
ദേഹിമേ തനയം കൃഷ്ണ ത്വാമഹം ശരണം ഗത''

വിഷ്ണു ഗായത്രി മന്ത്രം അറിയാം

എല്ലാ ദിവസവും വിഷ്ണു ഗായത്രിമന്ത്രം ജപിച്ചാൽ കുടുംബത്തിൽ ഐക്യവും ഐശ്വര്യവും സാമ്പത്തിക ഉന്നമനവും ഉണ്ടാകുമെന്നാണ് വിശ്വാസം. നിത്യവും ഒൻപത് പ്രാവശ്യം വിഷ്ണു ഗായത്രിമന്ത്രം ജപിക്കുക.

''ഓം നാരായണായ വിദ്‍മഹേ വാസുദേവായ ധീമഹി തന്നോഃ വിഷ്ണു പ്രചോദയാത്''