ആരാണ് നൈഷ്ഠിക ബ്രഹ്മചാരി? അയ്യപ്പൻ നൈഷ്ഠിക ബ്രഹ്മചാരിയാണോ?

കൊച്ചി: ശബരിമല യുവതീപ്രവേശനവുമായി ബന്ധപ്പെട്ട ചര്‍ച്ചകളിൽ നിരന്തരം ഉയര്‍ന്നു കേള്‍ക്കുന്ന വാദമാണ് അയ്യപ്പന്‍റെ നൈഷ്ഠിക ബ്രഹ്മചര്യം. ശബരിമലയിൽ യുവതികളെ പ്രവേശിപ്പിക്കുന്നതിനെ എതിര്‍ക്കുന്നവരുടെ വാദമാണ് അയ്യപ്പൻ നൈഷ്ഠികബ്രഹ്മചാരിയായതിനാൽ സ്ത്രീകളെ പ്രവേശിപ്പിക്കാനാകില്ലെന്ന്. എന്നാൽ എന്താണ് നൈഷ്ഠികബ്രഹ്മചര്യം എന്നറിയാമോ

നിഷ്ഠ കൊണ്ട് ബ്രഹ്മചാരിയായ ആള്‍ എന്നു മാത്രമാണ് നൈഷ്ഠികബ്രഹ്മചാരി എന്ന വാക്കിന്‍റെ അര്‍ത്ഥമെന്ന് എഴുത്തുകാരിയായ ലക്ഷ്മി രാജീവ് വിശദീകരിക്കുന്നു. എല്ലാ ലൗകികസുഖങ്ങളും ഒഴിവാക്കി ജീവിക്കുന്നയാളാണ് ബ്രഹ്മചാരി. ഇതിൽ ലൈംഗികസുഖവും ഉള്‍പ്പെടും. നിഷ്ഠ കൊണ്ട് ബ്രഹ്മചാരിയായവനാണ് നൈഷ്ഠികബ്രഹ്മചാരി - ലക്ഷ്മി രാജീവ് സമയം മലയാളത്തോട് പറഞ്ഞു.

എന്നാൽ നൈഷ്ഠിക ബ്രഹ്മചാരി എന്നതിന് സ്ത്രീവിരോധി എന്ന് അര്‍ത്ഥമില്ലെന്ന് ലക്ഷ്മി രാജീവ് പറയുന്നു. പുരാണത്തിലെ ഏറ്റവും വലിയ ബ്രഹ്മചാരിയായിരുന്നു ഹനുമാൻ. എന്നാൽ ഹനുമാന് സീതാദേവിയോടുള്ള സ്നേഹം നമുക്കറിയാവുന്നതാണ്. ബ്രഹ്മചാരികളായ വേറെയും ദേവതമാരുണ്ട്. എന്നാൽ അയ്യപ്പൻ വേദങ്ങളിലുള്ള കഥാപാത്രമല്ല. കേരളത്തിലെ ഐതിഹ്യങ്ങളുടെ ഭാഗമാണ് എന്നിരുന്നാലും നൈഷ്ഠികബ്രഹ്മചാരി എന്നതുകൊണ്ട് സ്ത്രീവിരോധി എന്ന് അര്‍ഥമില്ലെന്നും അവര്‍ വിശദീകരിച്ചു.

നൈഷ്ഠികബ്രഹ്മചര്യം എന്ന വാക്കുപയോഗിച്ച് സ്ത്രീകളെ ശബരിമലയിൽ നിന്ന് വിലക്കുന്നതിലെ അയുക്തി എഴുത്തുകാരനും വിമര്‍ശകനുമായ ഡോ. സുനിൽ പി ഇളയിടവും ചൂണ്ടിക്കാണിക്കുന്നു. ഏത് തന്ത്രശാസ്ത്രം അനുസരിച്ചാണ് പ്രതിഷ്ഠ നൈഷ്ഠികബ്രഹ്മചാരിയായതിനാൽ സ്ത്രീകളെ വിലക്കുന്നതെന്ന് സുനിൽ പി ഇളയിടം ചോദിക്കുന്നു. കേരളത്തിലെ ക്ഷേത്രങ്ങളിലെ തന്ത്രവിദ്യകള്‍ വിശദീകരിക്കുന്ന തന്ത്രസമുച്ചയത്തിൽ ഏഴ് ദേവതകളാണുള്ളത്, ഇതിൽ അയ്യപ്പനില്ല. അതുകൊണ്ടുതന്നെ അയ്യപ്പന്‍റെ പ്രതിഷ്ഠ നൈഷ്ഠിക ബ്രഹ്മചാരിയാണോ എന്ന കാര്യത്തിൽ സുവ്യക്തതയില്ല. എന്നാൽ ശബരിമലയിൽ എല്ലാക്കാലത്തും സ്ത്രീകള്‍ പ്രവേശിച്ചിട്ടുണ്ടെന്നും അത് സുപ്രീം കോടതിയിൽ തെളിയിക്കപ്പെട്ടിട്ടുണ്ടെന്നും അദ്ദേഹം ചൂണ്ടിക്കാട്ടി.