രാത്രിയിൽ നഖം വെട്ടരുത്; കാരണം ഇതാണ്

ഇന്നത്തെ കാലത്ത് രാത്രിയും പകലുമൊന്നു നോക്കാതെ സമയം ലഭിക്കുന്നതിനസരിച്ച് ജോലികളെല്ലാം ചെയ്തു തീര്‍ക്കുന്നവരാണ് മിക്കവരും. പകൽ മുഴുവൻ തിരക്കിട്ട ജോലി കഴിഞ്ഞ് രാത്രി വിശ്രമിക്കുമ്പോളായിരിക്കും നഖം വളര്‍ന്നത് കാണുന്നത്. അപ്പോള്‍ തന്നെ വെട്ടിക്കളയാം എന്നു വിചാരിക്കും. ഇത് സാധാരണമാണ്.

എന്നാൽ വീട്ടിൽ പ്രായമുളളവരാരെങ്കിലും ഉണ്ടെങ്കിൽ അവര്‍ രാത്രി നഖം വെട്ടാൻ സമ്മതിച്ചെന്നു വരില്ല. രാത്രി നഖം വെട്ടാൻ പാടില്ലെന്നും ദോഷമാണെന്നുമൊക്കെ അവര്‍ പറഞ്ഞേക്കാം. എന്നാൽ ഇതിനു പിന്നിലെ തത്വമെന്താണെന്ന് പലര്‍ക്കും അറിയില്ല.

പണ്ടു കാലങ്ങളിൽ ഇന്നത്തെപ്പോലെ വൈദ്യുതിയും വെളിച്ചവുമൊന്നും ഇല്ലായിരുന്നു. ഇതോടൊപ്പം നഖം മുറിക്കാൻ നഖം വെട്ടി പോലും ചിലർക്ക് ഇല്ലായിരുന്നു. പകരം ബ്ലെയ്ഡ് പോലുള്ള മൂർച്ചയുള്ള സാധനങ്ങളായിരുന്നു നഖം വെട്ടാനായി ഉപയോഗിച്ചിരുന്നത്.

വെളിച്ചമില്ലാതെ നഖത്തിൻ്റെ അഗ്രം മുറിക്കുമ്പോൾ വിരലും കൈയുമൊക്കെ മുറിയാനുള്ള സാധ്യത കൂടുതലാണ്. ഇത് ഒഴിവാക്കാനായി ഉണ്ടാക്കിയ ഒരു തത്വമായിരുന്നു രാത്രിയിൽ നഖം മുറിക്കാൻ പാടില്ലെന്നുള്ളത്.