CWG 2018: ഓസ്ട്രേലിയയെ നാണക്കേടിലാക്കി പന്ത് ചുരണ്ടൽ വിവാദം

ഗോൾഡ് കോസ്റ്റ്: പന്ത് ചുരണ്ടൽ വിവാദത്തിൻെറ അലയൊലികൾ കോമൺ വെൽത്ത് ഗെയിംസ് നടക്കുന്ന ഗോൾഡ് കോസ്റ്റിലും ഓസ്ട്രേലിയക്ക് നാണക്കേടുണ്ടാക്കുന്നു. രാജ്യത്തിൻെറ അഭിമാനം തന്നെയാണ് ഓസീസ് ക്രിക്കറ്റ് താരങ്ങൾ കളഞ്ഞു കുളിച്ചത്. ഗോൾഡ് കോസ്റ്റിലെ പ്രധാന ചർച്ച ക്രിക്കറ്റിലെ പന്ത് ചുരണ്ടൽ വിവാദം തന്നെയാണെന്ന് പിടിഎെ റിപ്പോർട്ട് ചെയ്യുന്നു.

"നിങ്ങൾ പന്ത് ചുരണ്ടൽ വിവാദത്തെ കുറിച്ച് വാർത്തകൾ നൽകുന്നുണ്ടോ ? ദയവായി ഇനി അതേ കുറിച്ച് കൂടുതൽ എഴുതാതിരിക്കൂ. അത് ഞങ്ങൾക്ക് വലിയ നാണക്കേടാണ്" ഓസ്ട്രേലിയയിലെ ഒരു ഇമിഗ്രേഷൻ ഓഫീസർ ഗെയിംസ് റിപ്പോർട്ട് ചെയ്യാനെത്തിയ മാധ്യമപ്രവർത്തകനോട് പറഞ്ഞത് ഇങ്ങനെയാണ്.

"സ്റ്റീവ് സ്മിത്ത് എല്ലാവരുടെയും പ്രിയ്യപ്പെട്ട താരമായിരുന്നു. അദ്ദേഹം കരയുന്നത് ഹൃദയ വേദനയോടെയാണ് ഞങ്ങൾ കണ്ടത്. വഴക്കാളിയായ വാർണർ ഇത് വരെ ചെയ്തതിന് പ്രതിഫലം ലഭിച്ചു എന്ന് കരുതിയാൽ മതി. പക്ഷേ സ്മിത്ത് അങ്ങനെയായിരുന്നില്ല..." ഇമിഗ്രേഷൻ ഓഫീസർ കൂട്ടിച്ചേർത്തു.

പന്ത് ചുരണ്ടൽ വിവാദം കൊണ്ടുണ്ടായ ചീത്തപ്പേര് കോമൺ വെൽത്ത് ഗെയിംസിൻെറ മികച്ച സംഘാടനത്തിലൂടെ ഇല്ലാതാക്കാനായിരക്കും ഓസ്ട്രേലിയയുടെ ശ്രമം.