സച്ചിൻെറ 27 വർഷം പഴക്കമുള്ള ലോകകപ്പ് റെക്കോർഡ് തകർത്ത് അഫ്ഗാൻ താരം

ന്യൂഡൽഹി: ക്രിക്കറ്റ് ഇതിഹാസം സച്ചിൻ ടെണ്ടുൽക്കർ 27 വർഷം മുമ്പ് സ്ഥാപിച്ച റെക്കോർഡ് മറി കടന്ന് അഫ്ഗാനിസ്ഥാൻ യുവതാരം ഇക്രം അലി. വെസ്റ്റ് ഇൻഡീസിനെതിരെ ഇന്നലെ നടന്ന മത്സരത്തിലാണ് താരത്തിൻെറ റെക്കോർഡ് പ്രകടനം. ഐസിസി ലോകകപ്പിൽ 18ാം വയസ്സിൽ ഒരു താരം നേടുന്ന ഏറ്റവും ഉയർന്ന സ്കോറാണ് ഇക്രം അലി നേടിയത്.

92 പന്തിൽ നിന്ന് ഇക്രം അലി 86 റൺസാണ് നേടിയത്. 18 വയസ്സും 272 ദിവസവുമാണ് അദ്ദേഹത്തിൻെറ പ്രായം. സച്ചിൻ ടെണ്ടുൽക്കർ 18ാം വയസ്സിൽ 1992 ലോകകപ്പിൽ 84 റൺസാണ് നേടിയിരുന്നത്. വെസ്റ്റ് ഇൻഡീസിനെതിരെ നടന്നത് ഈ ലോകകപ്പിൽ അഫ്ഗാനിസ്ഥാൻെറ അവസാന മത്സരമായിരുന്നു. ഇക്രമിൻെറ ബാറ്റിങ് പ്രകടനത്തിനും പക്ഷേ ടീമിനെ രക്ഷിക്കാനായില്ല. 23 റൺസിന് അഫ്ഗാനിസ്ഥാൻ പരാജയപ്പെട്ടു. ഈ ലോകകപ്പിൽ ഒരു മത്സരം പോലും വിജയിക്കാതെയാണ് ടീം പുറത്ത് പോവുന്നത്.

കുമാർ സംഗക്കാര പ്രിയപ്പെട്ട ക്രിക്കറ്റ് താരം

സച്ചിനെ പോലുള്ള ഒരു ഇതിഹാസ താരത്തിൻെറ റെക്കോർഡ് മറികടക്കാനായതിൽ ഏറെ സന്തോഷമുണ്ടെന്ന് ഇക്രം പറഞ്ഞു. എന്നാൽ ടെണ്ടുൽക്കറെ പോലെ തന്നെ താൻ ആരാധിക്കുന്ന ക്രിക്കറ്ററാണ് ലങ്കൻ വിക്കറ്റ് കീപ്പർ കുമാർ സംഗക്കാരയെന്നും ഇക്രം പറഞ്ഞു. ബാറ്റിങിന് ഇറങ്ങുമ്പോൾ എപ്പോഴും മാതൃകയാക്കാൻ ആഗ്രഹിക്കുന്ന താരം സംഗക്കാരയാണെന്നും അദ്ദേഹം കൂട്ടിച്ചേർത്തു.