ലോകകപ്പിന് ശേഷമുള്ള ഇന്ത്യയുടെ നാട്ടിലെ മത്സരങ്ങൾ പ്രഖ്യാപിച്ചു

ന്യൂഡൽഹി: ലോകകപ്പ് ക്രിക്കറ്റിന് ശേഷം 2019-20 വർഷത്തിൽ നാട്ടിൽ നടക്കാൻ പോവുന്ന ഇന്ത്യയുടെ മത്സരക്രമം ബിസിസിഐ പ്രഖ്യാപിച്ചു. അഞ്ച് ടെസ്റ്റ് മത്സരങ്ങളും 9 ഏകദിനങ്ങളും 12 ട്വൻറി20 മത്സരങ്ങളുമാണുള്ളത്. ദക്ഷിണാഫ്രിക്കക്കെതിരെയുള്ള ഗാന്ധി - മണ്ഡേല ട്രോഫ്രിക്കായുള്ള ഫ്രീഡം പരമ്പരയാണ് ആദ്യത്തേത്.

സെപ്തംബർ 15ന് പരമ്പര ആരംഭിക്കും. ദക്ഷിണാഫ്രിക്കക്കെതിരെ ഇന്ത്യ മൂന്ന് ടെസ്റ്റ് മത്സരങ്ങളും മൂന്ന് ട്വൻറി20 മത്സരങ്ങളും കളിക്കും. ഇതിന് ശേഷം നവംബർ മൂന്നിന് ബംഗ്ലാദേശിനെതിരായ പരമ്പര ആരംഭിക്കും. രണ്ട് ടെസ്റ്റ് മത്സരങ്ങളും മൂന്ന് ട്വൻറി20യുമാണ് ബംഗ്ലാദേശിനെതിരെ കളിക്കുക.

ഡിസംബറിൽ വെസ്റ്റ് ഇൻഡീസ് ഇന്ത്യയിൽ പര്യടനം നടത്തും. ജനുവരിയിൽ സിംബാവെക്കെതിരെയാണ് മൂന്ന് ട്വൻറി20 മത്സരങ്ങളുടെ പരമ്പര. പിന്നീട് ഓസ്ട്രേലിയയുമായി കളിക്കും. ഇതിന് ശേഷം ദക്ഷിണാഫ്രിക്ക വീണ്ടും ഇന്ത്യയിൽ പര്യടനത്തിനെത്തും.