ലോകകപ്പ് സെമിയിൽ ധോണി റൺ ഔട്ടായതിൻെറ ഷോക്കിൽ യുവാവ് മരിച്ചു

കൊൽക്കത്ത: ഇന്ത്യയും ന്യൂസിലൻറും തമ്മിലുള്ള ലോകകപ്പ് സെമിഫൈനൽ മത്സരത്തിൽ എംഎസ് ധോണി റൺ ഔട്ടായതിൻെറ ഷോക്കിൽ യുവാവ് അന്തരിച്ചു. കൊൽക്കത്തയിലെ സൈക്കിൾ ഷോപ്പ് ഉടമയായ ശ്രീകാന്ത് മെയ്ത്തിയാണ് ഹൃദയാഘാതം മൂലം മരിച്ചത്. ധോണി റൺ ഔട്ടായി പുറത്തായ ഉടനെയാണ് ദേഹാസ്വാസ്ഥ്യം ഉണ്ടായത്. ഉടൻ തന്നെ ആശുപത്രിയിലെത്തിച്ചെങ്കിലും അദ്ദേഹത്തെ രക്ഷിക്കാനായില്ല.

മൊബൈൽ ഫോണിൽ മത്സരം കണ്ട് കൊണ്ടിരിക്കുകയായിരുന്നു അദ്ദേഹം. "ധോണി പുറത്തായപ്പോൾ അദ്ദേഹം ഉച്ചത്തിൽ ആർത്ത് വിളിക്കുന്നത് കണ്ടു. പെട്ടെന്ന് തന്നെ ബോധരഹിതനായി താഴെ വീഴുകയായിരുന്നു. തൊട്ടടുത്തുള്ള കനകുൽ ആശുപത്രിയിൽ എത്തിച്ചെങ്കിലും രക്ഷപ്പെടുത്താൻ സാധിച്ചില്ല" തൊട്ടടുത്ത കടക്കരാനായ സച്ചിൻ ഘോഷ് പറഞ്ഞതായി ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു.

സെമിഫൈനലിൽ ന്യൂസിലൻറിനെതിരെ ഇന്ത്യ ബാറ്റ് ചെയ്യവേ എംഎസ് ധോണിയും രവീന്ദ്ര ജഡേജയും ബാറ്റ് ചെയ്യുമ്പോൾ ഇന്ത്യക്ക് പ്രതീക്ഷകളുണ്ടായിരുന്നു. എന്നാൽ ജഡേജ പുറത്തായതോടെ ഇന്ത്യൻ പ്രതീക്ഷകൾക്ക് മങ്ങലേറ്റു. ഒടുവിൽ ധോണിയും കൂടി പുറത്തായതോടെ പരാജയം ഉറപ്പായി. സെമിയിൽ ന്യൂസിലൻറിനോട് 18 റൺസിന് തോറ്റാണ് ഇന്ത്യ ലോകകപ്പിൽ നിന്ന് പുറത്തായത്.