വാർണർക്ക് വെടിക്കെട്ട് സെഞ്ച്വറി; ബംഗ്ലാ കടുവകളെ അടിച്ചിട്ട് ഓസീസ്

നോട്ടിങ്ങാം: ഡേവിഡ് വാർണറുടെ വെടിക്കെട്ട് സെഞ്ച്വറി മികവിൽ ബംഗ്ലാദേശിനെതിരെ ഓസ്ട്രേലിയക്ക് കൂറ്റൻ സ്കോർ. 50 ഓവറിൽ 5 വിക്കറ്റ് നഷ്ടത്തിൽ ഓസ്ട്രേലിയ 381 റൺസാണെടുത്തത്. ഈ ലോകകപ്പിലെ ഏറ്റവും ഉയർന്ന രണ്ടാമത്തെ സ്കോറാണിത്.

വാർണർ 147 പന്തിൽ നിന്ന് 166 റൺസാണെടുത്തത്. അഞ്ച് സിക്സറും പതിനാല് ഫോറുകളും അടങ്ങിയ തകർപ്പൻ ഇന്നിങ്സായിരുന്നു വാർണറുടേത്. ക്യാപ്റ്റൻ ആരോൺ ഫിഞ്ച് 51 പന്തിൽ നിന്ന് 53 റൺസെടുത്തു. ഉസ്മാൻ ഖ്വാജ 89 റൺസെടുത്തു.

ഓസീസ് ഇന്നിങ്സ് 49 ഓവറിലെത്തിയപ്പോൾ മഴ മത്സരം തടസ്സപ്പെടുത്തിയിരുന്നു. എന്നാൽ മത്സരം 50 ഓവർ തന്നെ നടക്കും. ഇന്നിങ്സ് ബ്രേക്കിൻെറ സമയം കുറയ്ക്കാനാണ് തീരുമാനം.

ഈ ലോകകപ്പിൽ ഇത് വരെ ഓസ്ട്രേലിയ ഇന്ത്യയോട് മാത്രമാണ് പരാജയപ്പെട്ടത്. നിലവിൽ അഞ്ച് മത്സരങ്ങളിൽ നിന്ന് എട്ട് പോയിൻറുമായി മൂന്നാം സ്ഥാനത്താണ്. ബംഗ്ലാദേശ് 5 മത്സരങ്ങളിൽ നിന്ന് 5 പോയിൻറുമായി അഞ്ചാമതാണ്.

സാക്കിബ് അൽ ഹസൻ അടക്കമുള്ള താരങ്ങളുടെ മികവിൽ ബംഗ്ലാദേശ് ഈ ലോകകപ്പിലെ ഏറ്റവും മികച്ച ടീമുകളിൽ ഒന്നാണ്. സെമിഫൈനലിൽ കടക്കാനായി ഏറ്റവും ശക്തമായ പ്രകടനം തന്നെയായിരിക്കും അവർ കാഴ്ച വെക്കുക.