'ഫീൽഡിൽ അയാൾക്ക് നേട്ടങ്ങളുണ്ടാവാം; ജീവിതത്തിൽ അയാൾ സത്യസന്ധനല്ല'

ന്യൂഡൽഹി: ഇന്ത്യൻ ഉപനായകൻ രോഹിത് ശർമ ലോകകപ്പിൽ തകർപ്പൻ ഫോമിലാണ്. ആദ്യ മത്സരത്തിൽ ദക്ഷിണാഫ്രിക്കക്കെതിരെ സെഞ്ച്വറിയോടെയാണ് അദ്ദേഹം തുടങ്ങിയത്. പാകിസ്ഥാനെതിരെയും രോഹിത് സെഞ്ച്വറി നേടി. ക്രിക്കറ്റിൽ അപൂർവ നേട്ടങ്ങളോടെ മുന്നോട്ട് പോവുമ്പോൾ മുൻകാമുകിയും ബോളിവുഡ് നടിയുമായ സോഫിയ ഹയാത്ത് താരത്തിനെതിരെ രംഗത്തെത്തിയിരിക്കുകയാണ്.

രോഹിതിൻെറ നേട്ടങ്ങളെ കുറിച്ചുള്ള ഒരു ആരാധകൻെറ ട്വീറ്റിനാണ് ഹയാത്ത് മറുപടി നൽകിയിരിക്കുന്നത്. രോഹിത് ആരാധകനും വിരാട് കോഹ്ലി ആരാധകനും തമ്മിലുള്ള ട്വീറ്റിനിടയിലാണ് സോഫിയ ഇടപെട്ടത്. അനുഷ്ക ആരാധകർ ഇല്ലെങ്കിൽ വിരാട് കോഹ്ലിക്ക് ആരാധകർ ഇല്ലെന്ന് കളിയാക്കിയുള്ളതായിരുന്നു രോഹിത് ആരാധകൻെറ ട്വീറ്റ്.

എന്നാൽ കോഹ്ലി ഇന്ത്യയിലെ ഏറ്റവും ധനികനായ രണ്ടാമത്തെ സെലബ്രിറ്റിയാണെന്നും ഏഴാമത്തെ പ്രശസ്ത കായികതാരമാണെന്നും ചൂണ്ടിക്കാട്ടി കോഹ്ലി ആരാധകൻെറ മറുപടി എത്തി. സോഫിയ ഹയാത്തിനെ ഡേറ്റ് ചെയ്തതാണോ രോഹിതിൻെറ നേട്ടം എന്ന ചോദ്യവും വന്നു. സോഫിയയെ ടാഗ് ചെയ്തായിരുന്നു ട്വീറ്റ്.

ഇതിനുള്ള മറുപടിയിലാണ് രോഹിത് ജീവിതത്തിൽ സത്യസന്ധനല്ലെന്ന് സോഫിയ ഹയാത്ത് തുറന്നടിച്ചത്. "ഫീൽഡിൽ പന്തുകൾ നേരിടുന്നത് മാത്രമാണ് അയാളുടെ നേട്ടം. ഞാൻ ഒരാളെ വിലമതിക്കുന്നത് അയാളുടെ സത്യസന്ധതയെ അടിസ്ഥാനമാക്കിയാണ്. രോഹിതിന് അതില്ല. ജീവിതത്തിൽ അയാളുടെ കഥ തന്നെ മറ്റൊന്നാണ്," രോഹിതിൻെറ മുൻ കാമുകിയായ സോഫിയ ഹയാത്ത് ട്വീറ്റ് ചെയ്യുന്നു.