World Cup 2019: ഇന്ത്യ vs ബംഗ്ലാദേശ് മത്സരത്തിന് തെളിഞ്ഞ കാലാവസ്ഥ, ടോസ് നിർണായകം

ബെർമ്മിങ്ങാം: ലോകകപ്പിൽ ഇന്ന് ഏഷ്യൻ ശക്തികളായ ഇന്ത്യയും ബംഗ്ലാദേശും തമ്മിൽ ഏറ്റുമുട്ടുന്നു. ഇന്നത്തെ മത്സരം വിജയിച്ചാൽ ഇന്ത്യക്ക് സെമിഫൈനൽ ബർത്ത് ഉറപ്പിക്കാം. നിലവിൽ ഓസ്ട്രേലിയ മാത്രമാണ് സെമി ഉറപ്പിച്ചിട്ടുള്ളത്. 7 മത്സരങ്ങളിൽ നിന്ന് 11 പോയിൻറുമായി ഇന്ത്യ രണ്ടാം സ്ഥാനത്താണ്. ബംഗ്ലാദേശ് 7 മത്സരങ്ങളിൽ നിന്ന് 7 പോയിൻറുമായി 7ാം സ്ഥാനത്താണ്.

ഇന്ത്യയുമായുള്ള ഇന്നത്തെ മത്സരവും പാകിസ്ഥാനെതിരെ അടുത്ത മത്സരവും ജയിച്ചാൽ മാത്രമേ ബംഗ്ലാദേശിന് സെമി സാധ്യതകൾ ഉള്ളൂ. ബെർമ്മിങ്ങാമിലെ എഡ്ജ്ബാസ്റ്റൺ സ്റ്റേഡിയത്തിലാണ് ബംഗ്ലാദേശിനെതിരായ മത്സരം നടക്കുന്നത്. തെളിഞ്ഞ കാലാവസ്ഥയാണ് ഇന്ന് ബെർമ്മിങ്ങാമിൽ പ്രതീക്ഷിക്കുന്നത്. മഴയ്ക്ക് സാധ്യതയൊന്നും കാണുന്നില്ല.

ലോകകപ്പിൻെറ തുടക്കത്തിൽ ചില മത്സരങ്ങളിൽ മഴ വെല്ലുവിളിയായിരുന്നു. നാല് മത്സരങ്ങളാണ് മഴ മൂലം ഉപേക്ഷിച്ചിരുന്നത്. ഇന്ത്യയും ന്യൂസിലൻറും തമ്മിലുള്ള മത്സരവും മഴ മൂലം ഒഴിവാക്കിയിരുന്നു. എന്നാലിന്നത്തെ മത്സരത്തിന് കാലാവസ്ഥാപരമായി യാതൊരു ബുദ്ധിമുട്ടും പ്രതീക്ഷിക്കുന്നില്ല.

ടോസ് മത്സരത്തിന് നിർണായകമായിരിക്കും. ടോസ് നേടുന്ന ടീം ആദ്യം ബാറ്റിങ് തെരഞ്ഞെടുക്കാനാണ് കൂടുതൽ സാധ്യത. റണ്ണൊഴുകുന്ന പിച്ചാണ് എഡ്ജ്ബാസ്റ്റണിലേത്. സാക്കിബ് അൽ ഹസനും മുഷ്ഫിഖുർ റഹീമുമൊക്കെ അടങ്ങുന്ന ബംഗ്ലാദേശിൻെറ ബാറ്റിങ് നിര ശക്തമാണ്. മികച്ച പോരാട്ടം തന്നെയാണ് ബെർമ്മിങ്ങാമിൽ പ്രതീക്ഷിക്കുന്നത്.