ലോകകപ്പിൽ ഇന്ത്യ ന്യൂസിലൻറ് പോരാട്ടം 9ാം തവണ; കണക്കുകൾ ഇതാണ്

ന്യൂഡൽഹി: ഇന്ത്യയും ന്യൂസിലൻറും ലോകകപ്പിൽ നടന്ന പോരാട്ടങ്ങൾ ഏറെ ആവോശകരമായിരുന്നു. കിവികൾ അങ്ങനെ വിട്ടുകൊടുക്കുന്നവരല്ല ഒരിക്കലും. ഇത് വരെ ലോകകപ്പ് നേടിയിട്ടില്ലെങ്കിലും എക്കാലത്തും അപാര പോരാട്ട വീര്യം പ്രകടിപ്പിച്ചിട്ടുള്ളവരാണ് അവർ. 1975ലെ ആദ്യ ലോകകപ്പിൽ തന്നെ ഇന്ത്യയും ന്യൂസിലൻറും തമ്മിൽ ഏറ്റുമുട്ടിയിട്ടുണ്ട്.

ആദ്യവിജയം ന്യൂസിലൻറിനായിരുന്നു. നാല് വിക്കറ്റിനാണ് അന്ന് ന്യൂസിലൻറ് ഇന്ത്യയെ തോൽപ്പിച്ചത്. 1979ൽ ഇന്ത്യയുടെ തകർച്ച അൽപം കൂടി ദയനീയമായിരുന്നു. എട്ട് വിക്കറ്റിന് ഇന്ത്യ അടിയറവ് പറഞ്ഞു. 1987ൽ ഇരുടീമുകളും തമ്മിൽ രണ്ട് തവണയാണ് കളിച്ചത്. ഇരുമത്സരങ്ങളിലും ഇന്ത്യക്കായിരുന്നു വിജയം.

ആദ്യം 16 റൺസിനും പിന്നീട് 9 വിക്കറ്റിനും ഇന്ത്യ കിവീസിനെ തകർത്ത് വിട്ടു. 1992ൽ വീണ്ടും ഇന്ത്യ തോറ്റു. നാല് വിക്കറ്റിനായിരുന്നു പരാജയം. പിന്നീട് 1999ലെ ലോകകപ്പിലും ന്യൂസിലൻറ് ഇന്ത്യയെ അഞ്ച് വിക്കറ്റിന് തോൽപ്പിച്ചു. 2003ൽ ഗാംഗുലിയുടെ നേതൃത്വത്തിൽ ഇന്ത്യൻ ടീം തകർപ്പൻ വിജയമാണ് നേടിയത്. ഏഴ് വിക്കറ്റിനാണ് ഇന്ത്യ ന്യൂസിലൻറിനെ തോൽപ്പിച്ചത്.

ഈ ലോകകപ്പിൽ ആദ്യഘട്ടത്തിൽ ഇന്ത്യയും ന്യൂസിലൻറും തമ്മിൽ മത്സരം ഉണ്ടായിരുന്നു. എന്നാൽ മഴ കാരണം കളി ഉപേക്ഷിക്കുകയായിരുന്നു. ഇത് രണ്ടാം തവണയാണ് ഈ ലോകകപ്പിൽ ഇരുടീമുകളുടെയും പോരാട്ടം വരുന്നത്. ആകെയുള്ള എട്ട് മത്സരങ്ങളിൽ നാലെണ്ണം ന്യൂസിലൻറാണ് ജയിച്ചത്. മൂന്ന് മത്സരത്തിൽ ഇന്ത്യ വിജയിച്ചു. ഒരു മത്സരം ഉപേക്ഷിക്കുകയും ചെയ്തു.