Old Trafford Manchester: മാഞ്ചസ്റ്ററിൽ മഴയ്ക്ക് സാധ്യത; നാളെ റിസർവ് ദിനം, കളി നടക്കാതെ വന്നാൽ ഇന്ത്യ ഫൈനലിൽ

മാഞ്ചസ്റ്റർ: ഇന്ത്യയും ന്യൂസിലൻറും തമ്മിലുള്ള ആദ്യഘട്ടത്തിലെ മത്സരം മഴ മൂലം ഉപേക്ഷിച്ചിരുന്നു. നോട്ടിങ്ങാമിൽ നടക്കേണ്ടിയിരുന്ന മത്സരം ഒരു പന്ത് പോലും എറിയാതെയാണ് ഒഴിവാക്കിയത്. മാഞ്ചസ്റ്ററിലെ ഓൾഡ് ട്രാഫോർഡിൽ ഇരുടീമുകളും സെമി കളിക്കാനെത്തുമ്പോൾ വീണ്ടും മഴ ഭീഷണിയാവുകയാണ്. രാവിലെ തന്നെ മഴയ്ക്ക് സാധ്യതയുണ്ടെന്നും മത്സരം വൈകിയേക്കുമെന്നും റിപ്പോർട്ടുകളുണ്ടായിരുന്നു.

ഉച്ചയോടെ ചെറിയ മഴയ്ക്ക് ഉറപ്പായും സാധ്യതയുണ്ടെന്ന് ബ്രിട്ടീഷ് കാലാവസ്ഥാ വിഭാഗം അറിയിക്കുന്നു. വൈകീട്ട് മൂന്ന് മണിയോടെ മഴ കനക്കാൻ സാധ്യതയുണ്ടെന്നും റിപ്പോർട്ടുണ്ട്. മഴ ഇടക്കിടെ കളിയെ തടസ്സപ്പെടുത്താൻ സാധ്യതയുണ്ട്. ചൊവ്വാഴ്ച മാഞ്ചസ്റ്ററിൽ മൂടിക്കെട്ടിയ കാലാവസ്ഥയാണ് പ്രതീക്ഷിക്കുന്നത്.

ഇന്ന് മത്സരം നടക്കാതെ പോയാൽ എന്ത് ചെയ്യും ?

ഗ്രൂപ്പ് ഘട്ടത്തിലെ പോലെയല്ല, സെമിഫൈനലിൽ ഒരു റിസർവ് ദിനം കൂടിയുണ്ട്. ഇന്ന് അഥവാ കളി നടക്കാതെ പോയാൽ നാളെ മത്സരം വീണ്ടും നടത്തും. അഥവാ ഇന്ന് കളി തുടങ്ങി എവിടെയാണോ അവസാനിക്കുന്നത് അവിടെ മുതൽ നാളെ കളിക്കും. എന്നാൽ ബുധനാഴ്ചയും മാഞ്ചസ്റ്ററിൽ അത്ര തെളിഞ്ഞ കാലാവസ്ഥയല്ല പ്രതീക്ഷിക്കുന്നത്. കനത്ത മഴയ്ക്ക് സാധ്യതയുണ്ടെന്നാണ് കാലാവസ്ഥാ റിപ്പോർട്ട്.

റിസർവ് ദിനവും മത്സരം നടക്കാഞ്ഞാൽ ഇന്ത്യ ഫൈനലിലെത്തും

ഇന്നും നാളെയും മത്സരം നടക്കിതിരിക്കുകയാണെങ്കിൽ ഇന്ത്യയായിരിക്കും ഫൈനലിലെത്തുക. ലീഗ് സ്റ്റേജിലെ പോയിൻറ് പട്ടികയിൽ ഇന്ത്യ ഒന്നാം സ്ഥാനക്കാരായിരുന്നു. ഇന്ത്യക്ക് 15 പോയിൻറും ന്യൂസിലൻറിന് 11 പോയിൻറുമാണുള്ളത്. മത്സരം നടത്താൻ സാധിക്കാതെ പോയാൽ പോയിൻറ് പട്ടികയിൽ മുന്നിലുള്ള ഇന്ത്യ ഫൈനലിലെത്തും.