പരിക്കേറ്റിട്ടും വെള്ളം കുടിക്കാതെ നോമ്പ് നോറ്റ് ഹഷിം അംല

ഓവൽ: ലോകകപ്പ് ഉദ്ഘാടന മത്സരത്തിൽ ദക്ഷിണാഫ്രിക്കക്കായി ഓപ്പണറായി ഇറങ്ങിയത് ഹഷിം അംലയാണ്. പരിചയസമ്പന്നനായ താരം പക്ഷേ മത്സരത്തിൻെറ തുടക്കത്തിൽ തന്നെ പരിക്കേറ്റ് മടങ്ങേണ്ടി വന്നു. ഇംഗ്ലീഷ് പേസർ ജോഫ്ര ആർച്ചറിൻെറ ബൗൺസർ അംലയുടെ ഹെൽമറ്റിനെ പ്രകമ്പനം കൊള്ളിച്ചു. ദക്ഷിണാഫ്രിക്കൻ ഇന്നിങ്സിൻെറ നാലാം ഓവറിലായിരുന്നു സംഭവം.അഞ്ച് റൺസെടുത്ത് ബാറ്റ് ചെയ്യുകയായിരുന്ന അംലയുടെ മുഖത്തിന് നേരെയാണ് ആർച്ചറിൻെറ ബൗൺസർ വന്നത്. മണിക്കൂറിൽ 144 കിലോമീറ്റർ വേഗതയിൽ വന്ന പന്താണ് അംലയുടെ ഹെൽമറ്റിൽ ഇടിച്ച് കയറിയത്. ഹെൽമറ്റ് ഇട്ടതിനാൽ മാത്രം താരം രക്ഷപ്പെടുകയായിരുന്നു. റിട്ടയർ ചെയ്ത് അംല വൈകാതെ തന്നെ ഫീൽഡ് വിട്ടു.

എന്നാൽ പരിക്കറ്റ് ഫീൽഡ് വിട്ടപ്പോഴും അംല വെള്ളം കുടിക്കാൻ വിസമ്മതിച്ചു. റമദാൻ മാസമായതിനാൽ നോമ്പ് നോറ്റാണ് അംല കളിക്കാൻ ഇറങ്ങിയത്. ഇതിനാലാണ് വെള്ളം വേണ്ടെന്ന് പറഞ്ഞത്. അംലയെ പ്രശംസിച്ച് നിരവധി പേർ ട്വീറ്റ് ചെയ്യുന്നുണ്ട്.