'കെഎൽ രാഹുലിനെ ഓപ്പണർ ആക്കണം; കാർത്തിക് നാലാം നമ്പറിൽ വരട്ടെ'

ന്യൂഡൽഹി: ഓപ്പണർ ശിഖർ ധവാന് പരിക്കേറ്റത് ഇന്ത്യയുടെ ലോകകപ്പ് ടീമിന് വലിയ തിരിച്ചടിയാണ്. വിരലിന് പൊട്ടലേറ്റ ധവാന് മൂന്നാഴ്ചയെങ്കിലും വിശ്രമം വേണ്ടി വരുമെന്നാണ് റിപ്പോർട്ട്. കുറഞ്ഞത് മൂന്ന് മത്സരങ്ങളെങ്കിലും അദ്ദേഹത്തിന് നഷ്ടമാവുമെന്ന് ഉറപ്പാണ്.

ധവാന് പകരക്കാരനായി ആരെയും ടീമിൽ ഉൾപ്പെടുത്തിയിട്ടില്ല. ധവാന് പകരം കളിപ്പിക്കാൻ പറ്റുന്ന താരങ്ങൾ നിലവിലുള്ള ലോകകപ്പ് ടീമിൽ തന്നെ ഉണ്ടെന്നാണ് മുൻ ഇന്ത്യൻ വിക്കറ്റ് കീപ്പർ കിരൺ മോറെയുടെ അഭിപ്രായം. ഓപ്പണറായി കെ എൽ രാഹുലിനെ കളിപ്പിക്കണമെന്ന് അദ്ദേഹം അഭിപ്രായപ്പെട്ടു.

രാഹുൽ നിലവിൽ നാലാം നമ്പറിലാണ് കളിക്കുന്നത്. രാഹുലിന് പകരം നാലാം നമ്പറിൽ ദിനേശ് കാർത്തികിനെ കളിപ്പിക്കണമെന്നും മോറെ അഭിപ്രായപ്പെട്ടു.

നിലവിൽ ബിസിസിഐ മെഡിക്കൽ ടീമിൻെറ നിരീക്ഷണത്തിലാണ് ശിഖർ ധവാൻ. അദ്ദേഹം ഇംഗ്ലണ്ടിൽ തന്നെ തുടരാനാണ് ടീം മാനേജ്മെൻറിൻെറ തീരുമാനമെന്ന് ബിസിസിഐ വ്യക്തമാക്കി.

ഒരാഴ്ച ധവാൻെറ ആരോഗ്യസ്ഥിതി നിരീക്ഷിക്കാനാണ് തീരുമാനം. ആ ദിവസങ്ങൾക്കുള്ളിൽ ശരിയാവുകയാണെങ്കിൽ മറ്റൊരാളെയും പരിഗണിക്കില്ല.