ടീമിലേക്ക് എപ്പോൾ വേണമെങ്കിലും വിളി പ്രതീക്ഷിക്കാമെന്ന് ചാഹറിനോട് ശാസ്ത്രി

ന്യൂഡൽഹി: ശിഖർ ധവാൻെറ പരിക്ക് ഇന്ത്യയുടെ ലോകകപ്പ് ടീമിന് വലിയ തിരിച്ചടിയാണ് നൽകിയത്. ധവാന് പകരക്കാരനായി ആരെയും പ്രഖ്യാപിച്ചിട്ടില്ലെങ്കിലും റിസർവ് ലിസ്റ്റിൽ നിന്ന് ഋഷഭ് പന്തിനോട് ഇംഗ്ലണ്ടിലെത്താൻ ആവശ്യപ്പെട്ടിട്ടുണ്ട്. അതേ സമയം ഇനിയൊരു ബോളർക്ക് പരിക്കേൽക്കുകയാണെങ്കിൽ ദീപക് ചാഹറായിരിക്കും പരിഗണിക്കപ്പെടുകയെന്നാണ് സൂചന. ഐസിസി ലോകകപ്പിൽ ഇന്ത്യയുടെ നെറ്റ് ബോളർമാരിൽ ഒരാളായിരുന്നു ചാഹർ. ഖലീൽ അഹമ്മദ്, നവദീപ് സെയ്നി, ആവേശ് ഖാൻ എന്നിവരും നെറ്റ് ബോളർമാരായിരുന്നു.

"ടീമിൽ ആർക്കെങ്കിലും പരിക്കേൽക്കുകയാണെങ്കിൽ എപ്പോൾ വേണമെങ്കിലും വിളി വരാം. അതിനാൽ തയ്യാറായി ഇരിക്കുക," ഇംഗ്ലണ്ടിൽ നിന്ന് മടങ്ങുമ്പോൾ പരിശീലകൻ രവി ശാസ്ത്രി തന്നോട് ഇങ്ങനെ പറഞ്ഞുവെന്ന് ചാഹർ ടൈംസ് ഓഫ് ഇന്ത്യയോട് പറഞ്ഞു. ചെന്നൈ സൂപ്പർ കിങ്സിനായി ഐപിഎല്ലിൽ മികച്ച പ്രകടനം കാഴ്ച വെച്ചിട്ടുള്ള താരമാണ് ചാഹർ.