ലോകകപ്പിലേത് അവസാന മത്സരമോ, ധോണി വിരമിക്കുന്നുവെന്ന് റിപ്പോര്‍ട്ട്

ന്യൂഡല്‍ഹി: മുതിര്‍ന്ന ഇന്ത്യന്‍ താരം മഹേന്ദ്ര സിങ് ധോണി രാജ്യാന്തര ക്രിക്കറ്റില്‍ നിന്ന് വിരമിക്കുന്നതായി റിപ്പോര്‍ട്ടുകള്‍. ഇംഗ്ലണ്ടില്‍ നടക്കുന്ന ലേകകപ്പ് ക്രിക്കറ്റിന് പിന്നാലെ താരം ഇന്ത്യയുടെ നീലക്കുപ്പായം ഉപേക്ഷിക്കുമെന്നാണ് പുറത്തുവരുന്ന വാര്‍ത്തകള്‍. ഈ ലോകകപ്പിലെ ഇന്ത്യയുടെ അവസാന മത്സരം ധോണിയുടെ ക്രിക്കറ്റ് ജീവിതത്തിലെ അവസാന ഇന്നിങ്സാകുമോയെന്നാണ് ആരാധകര്‍ ഒന്നടങ്കം ഉറ്റുനോക്കുന്നത്. അതേസമയം സമയം ധോണിയോ ബിസിസിഐയോ ഇക്കാര്യത്തില്‍ ഇതുവരെ പ്രതികരിച്ചിട്ടില്ല.

ബിസിസിഐയെ ഉദ്ധരിച്ച് വാര്‍ത്താ ഏജന്‍സിയായ പിടിഐയാണ് ധോണിയുടെ വിരമിക്കല്‍ വാര്‍ത്ത പുറത്തുവിട്ടത്. ‘ധോണിയുടെ കാര്യമായതുകൊണ്ട് തന്നെ ഇക്കാര്യത്തില്‍ യാതൊരു ഉറപ്പും പറയാനാകില്ല. നേരത്തേ ടീമിന്‍റെ എല്ലാ ഫോർമാറ്റുകളുടെയും ക്യാപ്റ്റന്‍ സ്ഥാനത്ത് നിന്ന് ധോണി ഒഴിവായത് ഇത്തരത്തില്‍ പെട്ടെന്നുള്ള തീരുമാനമായിരുന്നു. അതുകൊണ്ടുതന്നെ ധോണിയുടെ കാര്യത്തിൽ കൃത്യമായൊരു പ്രവചനം സാധ്യമല്ല. എങ്കിലും ഈ ലോകകപ്പിനുശേഷം ധോണി ഇന്ത്യൻ ടീമില്‍ തുടരാൻ സാധ്യത വളരെ വിരളമാണ്.’– പിടിഐയുടെ റിപ്പോർട്ടിൽ പറയുന്നു.

2004 ലാണ് ഇന്ത്യന്‍ കുപ്പായത്തില്‍ മഹേന്ദ്ര സിങ് ധോണി അരങ്ങേറിയത്. അധികം വൈകാതെ ഇന്ത്യ കണ്ട എക്കാലത്തെയും മികച്ച നായകന്മാരുടെ പട്ടികയില്‍ മുന്‍പന്തിയിലെത്താന്‍ അദ്ദേഹത്തിന് സാധിച്ചു. ട്വന്‍റി ട്വന്‍റി, ഏകദിന, ചാമ്പ്യന്‍സ് ട്രോഫി കിരീടങ്ങള്‍ നേടിയ ഏക നായകന്‍ കൂടിയാണ് ധോണി. ഇതുവരെ 348 ഏകദിനങ്ങളിലാണ് ധോണി ഇന്ത്യയ്ക്ക് വേണ്ടി പാഡണിഞ്ഞിട്ടുള്ളത്. ഇതില്‍ നിന്ന് 10 സെ‍ഞ്ചുറിയും 72 അർധസെഞ്ചുറിയും അടക്കം 10,723 റൺസാണ് ധോണി സ്വന്തം പേരില്‍ കുറിച്ചിരിക്കുന്നത്. ടീമിലെത്തിയ ആദ്യകാലത്ത് പാക്കിസ്ഥാനെതിരെ പുറത്താകാതെ നേടിയ 183 റൺസാണ് കരിയറിലെ ഉയർന്ന സ്കോർ.

ഇന്ത്യയുടെ എക്കാലത്തെയും മികച്ച വിക്കറ്റ് കീപ്പറായ ധോണിയുടെ പേരിൽ ഏകദിനത്തിൽ മാത്രം 317 ക്യാച്ചുകളും 122 സ്റ്റംപിങ്ങുകളുമുണ്ട്. നിര്‍ണായക മത്സരങ്ങളിലെ അവസാന ഘട്ടത്തില്‍ പാറ പോലെ ഉറച്ചുനിന്ന് ടീമിലെ വിജയത്തിലെത്തിക്കുന്നതിനാല്‍ തന്നെ ഏകദിനത്തിലെ ബെസ്റ്റ് ഫിനിഷര്‍ എന്ന് കൂടി ധോണിയെ വിശേഷിപ്പിക്കാറുണ്ട്. എന്നാല്‍ കഴിഞ്ഞ രണ്ട് മത്സരങ്ങളിലെ റണ്ണെടുക്കുന്നതിലെ മെല്ലെപ്പോക്ക് ധോണിക്ക് വലിയ വിമര്‍ശനം നേടിക്കൊടുത്തിരുന്നു. ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കറും സൗരവ് ഗാംഗുലിയും അടക്കമുള്ളവര്‍ വിമര്‍ശനവുമായി രംഗത്തെത്തി. ആരാധകരും വലിയ വിമര്‍ശനമാണ് ഉയര്‍ത്തിയത്. ഇതിന് പിന്നാലെയാണ് വിരമിക്കലുമായി ബന്ധപ്പെട്ട വാര്‍ത്തകള്‍ പുറത്ത് വരുന്നത്.