നാല് വിക്കറ്റ് വീഴ്ത്തിയിട്ടും കുടവയറൻ എന്ന വിളിയാണ് ബാക്കി; മലിംഗയെ ട്രോളി ആരാധകർ!

മാഞ്ചസ്റ്റർ: ഇംഗ്ലണ്ടിനെ അട്ടിമറിച്ച് ലോകകപ്പിൽ മിന്നുന്ന പ്രകടനം പുറത്തെടുത്തിരിക്കുകയാണ് ശ്രീലങ്ക. മുതിർന്ന താരം ലസിത് മലിംഗയുടെ ബോളിങ് പ്രകടനമാണ് ലങ്കയ്ക്ക് വിജയം സമ്മാനിച്ചത്. മത്സരത്തിലെ മാൻ ഓഫ് ദി മാച്ചും മലിംഗയായിരുന്നു. 35ാം വയസ്സിലും മലിംഗ കാഴ്ച വെക്കുന്ന പ്രകടനത്തിനെ അഭിനന്ദിച്ച് നിരവധി പേർ രംഗത്തെത്തിയിട്ടുണ്ട്.

എന്നാൽ മലിംഗയുടെ കുടവയറിൻെറ ഒരു ചിത്രമാണ് സോഷ്യൽ മീഡിയയിൽ ഇപ്പോൾ വൈറലാവുന്നത്. മലിംഗ ഷർട്ട് ഇടാതെ നിൽക്കുന്ന ചിത്രമാണ് ആരാധകർ വൈറലാക്കിയിരിക്കുന്നത്. ലങ്കയുടെ മുൻ നായകൻ മഹേള ജയവർധനെ അടക്കമുള്ളവർ ഈ ചിത്രം ഇൻസ്റ്റഗ്രാമിൽ പങ്കു വെച്ചിട്ടുണ്ട്.

കുടവയർ ഉണ്ടെങ്കിലെന്താ, നാല് വിക്കറ്റ് പിഴുതില്ലേ എന്നാണ് ആരാധകർ ചോദിക്കുന്നത്. ക്രിക്കറ്റിൽ ഇപ്പോൾ ഫിറ്റ്നസിലൊന്നും വലിയ കാര്യമില്ലെന്നും ചിലർ രസകരമായി ട്രോളുന്നു.