Kohli Captaincy: രോഹിത് ഏകദിന നായകസ്ഥാനത്തേക്ക് ? നായകസ്ഥാനം ഷെയർ ചെയ്യാൻ നീക്കം!

ന്യൂഡൽഹി: ഏകദിനത്തിലും ടെസ്റ്റിലും രണ്ട് ക്യാപ്റ്റൻമാരെ ഇന്ത്യ അധികകാലം പരീക്ഷിച്ചിട്ടില്ല. എന്നാൽ മത്സരങ്ങൾ ഏറി വരുന്ന ഇക്കാലത്ത് അത്തരം ഒരു മാറ്റത്തിലേക്ക് ടീം പോയേക്കുമെന്നാണ് ബിസിസിഐയുമായി ബന്ധപ്പെട്ട് പുറത്ത് വരുന്ന പുതിയ റിപ്പോർട്ടുകൾ. ലോകകപ്പ് സെമിഫൈനലിൽ ഇന്ത്യൻ ടീം പരാജയപ്പെട്ടതിന് ശേഷം നിരവധി ചർച്ചകൾ നടക്കുന്നുണ്ട്. അക്കൂട്ടത്തിൽ പ്രധാനപ്പെട്ട ഒന്നാണ് ക്യാപ്റ്റൻസി ഷെയർ ചെയ്യൽ.

സെമിഫൈനലിൽ ന്യൂസിലൻറിനോട് 18 റൺസിന് തോറ്റാണ് ഇന്ത്യ പുറത്തായത്. പരാജയത്തിൻെറ ഉത്തരവാദിത്വം ക്യാപ്റ്റൻ വിരാട് കോഹ‍്‍ലി, കോച്ച് രവി ശാസ്ത്രി, സെലക്ഷൻ കമ്മിറ്റി, ബാറ്റിങ് കോച്ച് എന്നിവർക്കെല്ലാം ഉണ്ട്. ഇന്ത്യൻ ടീമിൽ ഏറ്റവും മികച്ച പ്രകടനം കാഴ്ച വെച്ചത് ലോകകപ്പിലെ ടോപ് സ്കോററായി മാറിയ രോഹിത് ശർമയാണ്. കഴിഞ്ഞ കുറച്ച് കാലങ്ങളായി കോഹ‍്‍ലി നയിക്കുന്ന ടീമിൻെറ ഉപനായകനാണ് രോഹിത് ശർമ.

അടുത്ത ട്വൻറി20 ലോകകപ്പിനായി ടീമിനെ ഒരുക്കിയെടുക്കുക എന്നതാണ് ടീം മാനേജ്മെൻറിൻെറ പുതിയ ദൗത്യം. അതിന് മുമ്പായി ഏകദിനത്തിൽ രോഹിത് ശർമയെയും ടെസ്റ്റിലും ട്വൻറി20യിലും വിരാടിനെയും നായകനാക്കി ഒരു പുതിയ ഫോർമുലയ്ക്ക് ബിസിസിഐ പദ്ധതിയിടുന്നുണ്ടെന്ന് വാർത്താ ഏജൻസിയായ ഐഎഎൻഎസ് റിപ്പോർട്ട് ചെയ്യുന്നു.

"രോഹിത് ശർമ ഏകദിന ടീമിൻെറ ക്യാപ്റ്റൻ സ്ഥാനം ഏറ്റെടുക്കാൻ പറ്റിയ ഏറ്റവും നല്ല സമയമിതാണ്. ടീം മാനേജ്മെൻറിൻെറയും മറ്റും എല്ലാ സഹകരണവും അതിനുണ്ടാവും. ടീമിന് അടുത്ത ലോകകപ്പിന് മുമ്പ് ഒരു പുതിയ മുഖം നൽകാനാണ് ലക്ഷ്യമിടുന്നത്. ചില മേഖലകളിൽ മാറ്റം വേണമെന്ന് നമുക്കറിയാം. രോഹിത് ഏകദിന നായകനാവാൻ യോജിച്ച താരമാണ്," ബിസിസിഐ അധികൃതർ ഐഎഎൻസിനോട് പറഞ്ഞു.

ലോകകപ്പ് പരാജയവുമായി ബന്ധപ്പെട്ട് ബിസിസിഐ ഉന്നതാധികാര സമിതി റിവ്യൂ മീറ്റിങ് വിളിച്ചിട്ടുണ്ട്. വിനോദ് റായ് അധ്യക്ഷതയിൽ നടക്കാൻ പോവുന്ന യോഗത്തിൽ ഇത്തരം കാര്യങ്ങളിൽ വിശദമായ ചർച്ചകൾ നടക്കും. ലോകകപ്പ് ജേതാവായ ഇംഗ്ലണ്ടിന് ടെസ്റ്റിലും പരിമിത ഓവർ ക്രിക്കറ്റിലും രണ്ട് നായകൻമാരാണുള്ളത്. ടെസ്റ്റിൽ ജോ റൂട്ടാണ് ടീമിനെ നയിക്കുന്നതെങ്കിൽ പരിമിത ഓവർ ക്രിക്കറ്റിൽ ഓയിൻ മോർഗനാണ് നായകൻ.