എല്ലാവരും പ്രശംസിച്ചു; പക്ഷേ രോഹിതിൻെറ സെഞ്ച്വറിയെ കോഹ‍്‍ലി വിശേഷിപ്പിച്ചത് ഇങ്ങനെ

ലണ്ടൻ: ലോകകപ്പിലെ ഇന്ത്യയുടെ ആദ്യമത്സരത്തിൽ രോഹിത് ശർമ നേടിയ സെഞ്ച്വറിയെ പ്രശംസ കൊണ്ട് മൂടുകയാണ് ക്രിക്കറ്റ് ലോകം. രോഹിതിൻെറ സാധാരണ സെഞ്ച്വറികളിൽ നിന്ന് അൽപം വ്യത്യസ്തമായ ഇന്നിങ്സായിരുന്നു ദക്ഷിണാഫ്രിക്കക്കെതിരെ കണ്ടത്.

പക്വതയോടെ കളിച്ച രോഹിത് ടീം വിജയിക്കും വരെ പുറത്താവാതെ നിൽക്കുകയും ചെയ്തു. ഉപനായകൻെറ പ്രകടനത്തിൽ ഏറ്റവും ആഹ്ലാദം പ്രകടിപ്പിച്ചത് ക്യാപ്റ്റൻ വിരാട് കോഹ‍്‍ലി തന്നെയാണ്. രോഹിത് സെഞ്ച്വറി നേടിയപ്പോൾ ആവേശത്തോടെ കയ്യടിക്കുന്ന വിരാടിനെ കാണാമായിരുന്നു.

രോഹിത് ശർമയുടെ ഏകദിനത്തിലെ ഏറ്റവും മികച്ച പ്രകടനം ഇതാണെന്നാണ് കോഹ‍്‍ലി പറഞ്ഞത്. "എൻെറ അഭിപ്രായത്തിൽ രോഹിതിൻെറ ഏറ്റവും മികച്ച ഏകദിന ഇന്നിങ്സ് ഇതാണ്. ലോകകപ്പിലെ ആദ്യ മത്സരത്തിൻെറ സമ്മർദ്ദങ്ങളെ അതിജീവിച്ചാണ് അദ്ദേഹം ഈ പ്രകടനം കാഴ്ച വെച്ചത്," കോഹ‍്‍ലി പറഞ്ഞു. മത്സരത്തിൽ 122 റൺസാണ് രോഹിത് നേടിയത്.