അഫ്‍‍ഗാനെതിരെ അപ്രതീക്ഷിത മാറ്റങ്ങൾക്ക് സാധ്യത; ഇന്ത്യയുടെ സാധ്യതാ ടീം ഇങ്ങനെ

മാഞ്ചസ്റ്റർ: ലോകകപ്പിൽ കളിച്ച മത്സരങ്ങളെല്ലാം ജയിച്ച് നിലവിൽ നാലാം സ്ഥാനത്താണ് ഇന്ത്യ. അവസാന മത്സരത്തിൽ പാകിസ്ഥാനെ 89 റൺസിനാണ് ഇന്ത്യ തകർത്തിട്ടത്. നാളെ താരതമ്യേന ദുർബലരായ അഫ്ഗാനിസ്ഥാനെതിരെയാണ് ഇന്ത്യയുടെ മത്സരം.

പരിക്ക് കാരണം ശിഖർ ധവാനെ ഇന്ത്യൻ ടീമിൽ നിന്ന് ഒഴിവാക്കിയിട്ടുണ്ട്. പകരം യുവതാരം ഋഷഭ് പന്താണ് ടീമിൽ ഇടം പിടിച്ചിട്ടുള്ളത്. പന്തിനെ നാളത്തെ ടീമിൽ ഉൾപ്പെടുത്താൻ സാധ്യതയുണ്ട്. കെഎൽ രാഹുൽ ഓപ്പണറായി എത്തുമ്പോൾ വിജയ് ശങ്കറിനെയാണ് നാലാം നമ്പറിൽ ഇറക്കിയിരുന്നത്.

ശങ്കറിന് കഴിഞ്ഞ ദിവസം പരിശീലനത്തിനിടെ പരിക്കേറ്റിരുന്നു. താരത്തെ ചിലപ്പോൾ നാളെ കളിപ്പിച്ചേക്കില്ല. പരിക്കേറ്റ ഭുവനേശ്വർ കുമാറും കളിക്കില്ല. പകരം മുഹമ്മദ് ഷമി ടീമിൽ ഇടം പിടിക്കും.

ഇന്ത്യയുടെ സാധ്യതാ ടീം ഇങ്ങനെ: കെഎൽ രാഹുൽ, രോഹിത് ശർമ, വിരാട് കോഹ്ലി, ഋഷഭ് പന്ത്, എംഎസ് ധോണി, ഹാർദിക് പാണ്ഡ്യ, കേദാർ ജാദവ്, കുൽദീപ് യാദവ്, യുസ്വേന്ദ്ര ചാഹൽ, മുഹമ്മദ് ഷമി, ജസ്പ്രീത് ബുംറ.