ഇനി അവൻ എന്നാണ് പഠിക്കുക ? ഇന്ത്യൻ താരത്തിനെതിരെ ട്വിറ്ററിൽ രൂക്ഷവിമർശനം

ന്യൂഡൽഹി: ലോകകപ്പിന് ശേഷം നടന്ന ആദ്യ ട്വൻറി20യിലും ഇന്ത്യൻ ബാറ്റിങ് നിര വലിയ തിരിച്ചുവരവൊന്നും നടത്തിയില്ല. വെസ്റ്റ് ഇൻഡീസിനെ ഇന്ത്യ നാല് വിക്കറ്റിന് പരാജയപ്പെടുത്തിയപ്പോഴും ബോളിങ് നിരയുടെ മികവിലാണ് ടീം ജയിച്ചത്. രോഹിത് ശർമ, വിരാട് കോഹ്ലി, മനീഷ് പാണ്ഡെ തുടങ്ങിയ താരങ്ങളാണ് ഭേദപ്പെട്ട പ്രകടനം കാഴ്ച വെച്ചത്.

മത്സരത്തിന് മുമ്പ് ഇന്ത്യൻ നായകൻ വിരാട് കോഹ്ലി പ്രതീക്ഷയോടെ സംസാരിച്ചത് ഋഷഭ് പന്തിനെ കുറിച്ചാണ്. വെസ്റ്റ് ഇൻഡീസ് പര്യടനം പന്തിനുള്ള അവസരമാണെന്നായിരുന്നു കോഹ്ലി പറഞ്ഞത്. എംഎസ് ധോണിക്ക് പകരം പന്തിനെയാണ് ടീം ഒന്നാം വിക്കറ്റ് കീപ്പറായി കളിപ്പിക്കുന്നത്. വിക്കറ്റ് കീപ്പർ എന്ന നിലയിൽ പന്ത് മികച്ച പ്രകടനമാണ് കാഴ്ച വെച്ചതെങ്കിലും ബാറ്റിങിൽ വീണ്ടും പണി പാളി.


നാലാമനായി ഇറങ്ങിയ പന്ത് വിക്കറ്റ് വലിച്ചെറിയുകയായിരുന്നു. രോഹിത് പുറത്തായപ്പോഴാണ് പന്ത് ക്രീസിലെത്തിയത്. അപ്പോൾ ടീം 32ന് 2 എന്ന നിലയിലായിരുന്നു. 81 പന്തിൽ നിന്ന് ഇന്ത്യക്ക് ജയിക്കാൻ 64 റൺസാണ് വേണ്ടിയിരുന്നത്. സിംഗിൾ എടുത്ത് കളിച്ചാലും ടീമിന് ജയിക്കാൻ സാധിക്കും. എന്നാൽ ആദ്യ പന്തിൽ തന്നെ ഋഷഭ് പന്ത് സിക്സറിനാണ് ശ്രമിച്ചത്. ഗോൾഡൻ ഡക്കായി പുറത്താവുകയും ചെയ്തു.

Read More: ലോകകപ്പ് സെമിയിൽ ധോണിയെ 7ാമനായി ഇറക്കിയതാര് ? വൻ വെളിപ്പെടുത്തലുമായി ബംഗാർ

ലോകകപ്പ് സെമിഫൈനലിലും ന്യൂസിലൻറിനെതിരെ പന്ത് ഇതേ പോലൊരു ഷോട്ടിന് ശ്രമിച്ചാണ് പുറത്തായത്. ഏതായാലും പക്വതയില്ലാതെ ഇങ്ങനെ ആവർത്തിച്ച് കളിക്കുന്നതിൽ ആരാധകർക്ക് വലിയ തൃപ്തിയൊന്നുമില്ല. എന്നാണ് ഒരു അന്താരാഷ്ട്ര മത്സരത്തിൽ പന്ത് പക്വതയോടെ കളിക്കാൻ പഠിക്കുകയെന്നാണ് ആരാധകരുടെ ചോദ്യം.

ട്വിറ്ററിൽ നിന്നുള്ള ചില പ്രതികരണങ്ങൾ കാണാം:




"ഋഷഭ് പന്ത് വല്ലാതെ നിരാശപ്പെടുത്തുന്നു. മത്സരത്തെ കുറേക്കൂടി ബഹുമാനത്തോടെ അയാൾ കണ്ട് തുടങ്ങേണ്ടിയിരിക്കുന്നു. സാഹചര്യങ്ങൾക്ക് അനുസരിച്ചും എതിരാളികളെ മനസ്സിലാക്കിയും കളിക്കണം. കിട്ടുന്ന അവസരങ്ങൾ നന്നായി ഉപയോഗപ്പെടുത്തണം. മികച്ച പ്രകടനം കാഴ്ച വെക്കാതെ പ്രതിഭ മാത്രം ഉണ്ടെന്ന് പറഞ്ഞിട്ട് കാര്യമില്ല," ഒരാളുടെ ട്വിറ്റർ പ്രതികരണം ഇങ്ങനെയാണ്.