ബുംറക്ക് മുമ്പ് ടെസ്റ്റിൽ ഹാട്രിക് രണ്ട് ഇന്ത്യൻ താരങ്ങൾക്ക് മാത്രം; ട്വിറ്ററിൽ അഭിനന്ദന പ്രവാഹം

ജമൈക്ക: ജസ്പ്രീത് ബുംറ ഇന്ത്യൻ ക്രിക്കറ്റിലെ എക്കാലത്തെയും മികച്ച ബോളർമാരുടെ പട്ടികയിൽ മുൻനിരയിൽ തന്നെ ഇടംപിടിക്കുകയാണ്. പരിമിത ഓവർ ക്രിക്കറ്റിൽ ഡെത്ത് ഓവർ സ്പെഷ്യലിസ്റ്റായാണ് ബുംറ തുടക്കത്തിൽ ഇന്ത്യക്ക് നേട്ടങ്ങൾ സമ്മാനിച്ചിരുന്നത്. 2019 ലോകകപ്പ് ആവുമ്പോഴേക്ക് ഇന്ത്യൻ ടീമിലെ എക്സ് ഫാക്ടർ ആയി ബുംറ മാറിത്തുടങ്ങിയിരുന്നു.

ഏകദിനത്തിലും ടി20യിലും കഴിവ് തെളിയിച്ചതിന് ശേഷമാണ് താരം ടെസ്റ്റിൽ അരങ്ങേറിയത്. വൈകാതെ തന്നെ ടെസ്റ്റ് ടീമിലെ മാറ്റിനിർത്താനാവാത്ത സാന്നിധ്യമായി അദ്ദേഹം മാറിയിരിക്കുന്നു. ലോകകപ്പിലെ ഫോം തുടർന്ന ബുംറ വെസ്റ്റ് ഇൻഡീസിനെതിരെ ഒന്നാം ടെസ്റ്റിൽ ഒരിന്നിങ്സിൽ അഞ്ച് വിക്കറ്റുകൾ പിഴുത് വിൻഡീസിനെ തകർത്തു.

വെറും 100 റൺസിനാണ് ബുംറയുടെയും ഇശാന്തിൻെറയും ബോളിങ് മികവിൽ ഇന്ത്യ വിൻഡീസിനെ ചുരുട്ടിക്കെട്ടിയത്. രണ്ടാം ഇന്നിങ്സിൽ ബുംറ കൊടുങ്കാറ്റ് പോലെയാണ് വിൻഡീസ് ബാറ്റിങ് നിരയ്ക്ക് നേരെ ആഞ്ഞടിച്ചത്. മത്സരത്തിൻെറ 9ാം ഓവറിൽ ഡാരൻ ബ്രാവോ, ഷംറാ ബ്രൂക്സ്, റോസ്റ്റൺ ചേസ് എന്നിവരാണ് ബുംറയുടെ ഹാട്രിക് ഇരകളായത്.

Read More: ബുംറക്ക് ഹാട്രിക്ക്, വിഹാരിക്ക് സെഞ്ച്വറി: വിൻഡീസിനെതിരെ ഇന്ത്യക്ക് ആധിപത്യം

ടെസ്റ്റിൽ ഇന്ത്യക്കായി ഹാട്രിക് നേടുന്ന മൂന്നാമത് ബോളറാണ് ബുംറ. ഈ നേട്ടം കൈവരിക്കുന്ന രണ്ടാമത് ഇന്ത്യൻ പേസറുമായിരിക്കുകയാണ് അദ്ദേഹം. 2001ലാണ് ആദ്യമായി ഒരു ഇന്ത്യൻ ക്രിക്കറ്റർ ടെസ്റ്റിൽ ആദ്യമായി ഹാട്രിക് നേടുന്നത്. കൊൽക്കത്തയിലെ ഈഡൻ ഗാർഡനിൽ നടന്ന ഓസ്ട്രേലിയക്കെതിരെയായിരുന്നു ഹർഭജൻ ടെസ്റ്റിൽ ഹാട്രിക് നേടിയത്.

പിന്നീട് അഞ്ച് വർഷങ്ങൾക്ക് ശേഷം ഇർഫാൻ പഠാൻ ഇന്ത്യക്കായി ഹാട്രിക് നേടി. 2006ൽ കറാച്ചിയിൽ നടന്ന മത്സരത്തിൽ പാകിസ്ഥാനെതിരെയാണ് പഠാൻ ഹാട്രിക് നേടിയിരുന്നത്. ശേഷം 13 വർഷത്തിന് ശേഷമാണ് ഒരു ഇന്ത്യൻതാരം വീണ്ടും ഹാട്രിക് നേടുന്നത്. ജമൈക്കയിൽ വെസ്റ്റ് ഇൻഡീസിനെതിരെ അങ്ങനെ ബുംറ വീണ്ടും ചരിത്രത്തിൻെറ ഭാഗമാവുകയാണ്.

മുൻ താരങ്ങൾ അടക്കം നിരവധി പേർ ജസ്പ്രീത് ബുംറയെ അഭിനന്ദിച്ച് രംഗത്തെത്തിയിട്ടുണ്ട്.

ട്വിറ്ററിൽ നിന്നുള്ള പ്രതികരണങ്ങൾ: