ഗെയിലിൻെറ ജഴ‍്‍സിയിൽ നമ്പർ പരീക്ഷണം; 301 എന്നെഴുതിയതിന് പിന്നിലെ കാരണം ഇതാണ്!

ട്രിനിഡാഡ്: ഇന്ത്യക്കെതിരായ മൂന്നാം ഏകദിനത്തിൽ വെസ്റ്റ് ഇൻഡീസ് വെടിക്കെട്ട് ബാറ്റ്സ്മാൻ ക്രിസ് ഗെയിൽ ജഴ്സിയിൽ പുതിയ പരീക്ഷണവുമായാണ് ഇറങ്ങിയത്. ട്രിനിഡാഡിലെ ക്വൂൻസ് പാർക്ക് ഓവലിൽ നടക്കുന്ന മത്സരം ഗെയിലിൻെറ അവസാന അന്താരാഷ്ട്ര മത്സരമായിരിക്കും എന്നാണ് സൂചന.

വെസ്റ്റ് ഇൻഡീസ് ക്രിക്കറ്റിൽ രണ്ട് അപൂർവ റെക്കോർഡുകൾ കൂടി സ്വന്തമാക്കിയാണ് ഗെയിൽ വിടവാങ്ങാൻ ഒരുങ്ങുന്നത്. വിൻഡീസിനായി ഏകദിനത്തിൽ ഏറ്റവും കൂടുതൽ റൺസ് നേടിയിട്ടുള്ളത് ഗെയിലാണ്. ഏകദിനത്തിൽ ടീമിനായി ഏറ്റവും കൂടുതൽ മത്സരങ്ങൾ കളിച്ചതും അദ്ദേഹമാണ്. ഇന്ത്യക്കെതിരായ രണ്ടാം ഏകദിനത്തിൽ തൻെറ 300ാം മത്സരത്തിനാണ് ഗെയിൽ ഇറങ്ങിയിരുന്നത്. 299 മത്സരങ്ങൾ കളിച്ചിട്ടുള്ള വിൻഡീസ് ക്രിക്കറ്റ് ഇതിഹാസം ബ്രയാൻ ലാറയെയാണ് അദ്ദേഹം മറികടന്നിരുന്നത്.

Read More: പ്രിയപ്പെട്ട ഇടംകയ്യൻ ആരെന്ന് ഐസിസി; ഈ പേര് ഇല്ലാതെ എന്ത് ലിസ്റ്റെന്ന് ആരാധകർ!

ട്രിനിഡാഡിൽ 301ാം ഏകദിനത്തിനാണ് ഗെയിൽ ഇറങ്ങിയത്. ഇതിനാലാണ് 301 എന്നെഴുതിയ ജഴ്സി നമ്പറുമായി അദ്ദേഹം കളിക്കളത്തിലെത്തിയത്. അവിസ്മരണീയ ബാറ്റിങ് വെടിക്കെട്ടുമായാണ് ഗെയിൽ ക്രീസ് വിട്ടത്. 41 പന്തിൽ നിന്ന് അദ്ദേഹം 72 റൺസെടുത്തു. എട്ട് ഫോറും അഞ്ച് സിക്സറും അടങ്ങിയതാണ് ഇന്നിങ്സ്. ഖലീൽ അഹമ്മദാണ് ഒടുവിൽ ഗെയിലിനെ പുറത്താക്കിയത്. പുറത്തായ ഗെയിലിനെ ഇന്ത്യൻ താരങ്ങൾ കയ്യടിയോടെയാണ് മടക്കി അയച്ചത്.