ചെന്നൈക്ക് വീണ്ടും തിരിച്ചടി; ഹർഭജൻ സിങ് ഐപിഎല്ലിൽ നിന്ന് പിൻമാറി

ഐപിഎൽ 2020 തുടങ്ങും മുമ്പ് നിലവിലെ റണ്ണേഴ്സ് അപ്പായ ചെന്നൈ സൂപ്പർ കിങ്സിന് അടുത്ത തിരിച്ചടി. വെറ്ററൻ സ്പിന്നർ ഹർഭജൻ സിങ് ലീഗിൽ നിന്ന് പിൻമാറി. ഹർഭജൻ ടീമിനൊപ്പം യുഎഇയിലേക്ക് പോയിരുന്നില്ല. വ്യക്തിപരമായ കാരണങ്ങളാൽ ഈ വർഷം കളിക്കാനില്ലെന്ന് നേരത്തെ തന്നെ ടീമിനോട് വ്യക്തമാക്കിയിരുന്നു. എന്നാൽ തീരുമാനം പുനരാലോചിക്കാനാണ് ഹർഭജനോട് ടീം മാനേജ്മെൻറ് ആവശ്യപ്പെട്ടത്.

തൻെറ തീരുമാനത്തിൽ മാറ്റമില്ലെന്നും ഈ വർഷം ലീഗിൽ കളിക്കുന്നില്ലെന്നും താരം അറിയിച്ചതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. ഹർഭജൻ പിൻമാറിയതുമായി ബന്ധപ്പെട്ട് സിഎസ്കെ മാനേജ്മെൻറ് ഇത് വരെ ഔദ്യോഗിക പ്രഖ്യാപനം നടത്തിയിട്ടില്ല. എന്നാൽ ഹർഭജൻ ഉണ്ടാവാൻ സാധ്യതയില്ലെന്ന് ടീം മാനേജ്മെൻറ് നേരത്തെ തന്നെ മനസ്സിലാക്കിയിട്ടുണ്ടായിരുന്നു.

Also Read: ഗെയിലിനെയും ഗംഭീറിനെയും മറികടക്കാം; ഐപിഎൽ 2020ൽ കോലി തകർക്കുമോ ഈ റെക്കോർഡുകൾ?!

യുഎഇയിൽ പരിശീലനം തുടങ്ങാൻ പോവുന്ന ചെന്നൈ സൂപ്പർ കിങ്സിന് ഇത് കനത്ത തിരിച്ചടിയാവും. നേരത്തെ തന്നെ ഉപനായകൻ സുരേഷ് റെയ്ന ഐപിഎല്ലിൽ നിന്ന് പിൻമാറിയിരുന്നു. വ്യക്തിപരമായ കാരണങ്ങളാൽ തന്നെയാണ് റെയ്നയും ലീഗിൽ നിന്ന് പിൻമാറിയിരുന്നത്. ക്യാമ്പിലെ പത്തിലധികം പേർക്ക് കൊവിഡ് ബാധിക്കുകയും ചെയ്തിരുന്നു. പരിശീലനം ആരംഭിക്കാൻ ഇരിക്കെയാണ് ഹർഭജൻെറ പിൻമാറ്റം ഉറപ്പാവുന്നത്.