ഹാർദിക് പാണ്ഡ്യയ്ക്ക് കഷ്ടകാലം, ജയിച്ചിട്ടും പിന്നാലെ പണികിട്ടി; മുംബൈ ഇന്ത്യൻസ് നായകന് തിരിച്ചടിയായത് ഇക്കാര്യം

മുംബൈ ഇന്ത്യൻസിന്റെ (Mumbai Indians) ക്യാപ്റ്റനായി എത്തിയത് മുതൽ ഹാർദിക് പാണ്ഡ്യയെ (Hardik Pandya) കഷ്ടകാലം വിടാതെ പിന്തുടരുകയാണ്. ക്യാപ്റ്റൻസിയിൽ എടുത്ത പല തീരുമാനങ്ങളും പാളിയതിനൊപ്പം ബാറ്റിങ്ങിലും ബോളിങ്ങിലും ഫോം കണ്ടെത്താൻ സാധിക്കാതിരുന്നത് കാര്യങ്ങൾ കൂടുതൽ ദുഷ്കരമാക്കി. ആദ്യ ആറ് കളികളിൽ നാലിലും തോറ്റിരുന്ന മുംബൈ ഇന്ത്യൻസ് ഇന്നലെ നടന്ന ആവേശകരമായ കളിയിൽ പഞ്ചാബ് കിങ്സിനെ വീഴ്ത്തിയിരുന്നു. എന്നാൽ അതിന് പിന്നാലെ മുംബൈ നായകൻ ഹാർദിക്കിന് മറ്റൊരു തിരിച്ചടിയും നേരിടേണ്ടി വന്നു.പഞ്ചാബ് കിങ്സിനെതിരായ മത്സരത്തിൽ ഓവർ നിരക്കിൽ വരുത്തിയ വീഴ്ചയാണ് മുംബൈ നായകന് പണി വാങ്ങിക്കൊടുത്തത്. നിശ്ചിത സമയത്തിനുള്ളിൽ ഓവറുകൾ പൂർത്തിയാക്കാൻ സാധിക്കാതിരുന്ന മുംബൈ നായകന് 12 ലക്ഷം രൂപയാണ് പിഴ ലഭിച്ചിരിക്കുന്നത്. ഈ സീസണിൽ ഇതാദ്യമായാണ് മുംബൈ ഓവർ നിരക്കിൽ വീഴ്ച വരുത്തുന്നത്, അതുകൊണ്ടാണ് പിഴത്തുക 12 ലക്ഷത്തിൽ ഒതുങ്ങിയത്. പഞ്ചാബ് കിങ്സിനെതിരായ മത്സരത്തിൽ കുറഞ്ഞ ഓവർ നിരക്ക് മൂലം അവസാന രണ്ട് ഓവറുകളിൽ ഒരു അധിക ഫീൽഡറെ ഇന്നർ സർക്കിളിനുള്ളിൽ നിർത്തിയാണ് മുംബൈ ഇന്ത്യൻസ് പന്തെറിഞ്ഞത്. എന്നിട്ടും വിജയം നേടാനായി എന്നത് അവർക്ക് ഇരട്ടി‌ സന്തോഷം നൽകുന്നുണ്ട്.


അതേ സമയം 2024 സീസൺ ഐപിഎല്ലിൽ പ്രതീക്ഷിച്ച പ്രകടനം പുറത്തെടുക്കാൻ ഹാർദിക് പാണ്ഡ്യയ്ക്ക് സാധിക്കുന്നില്ല എന്നതാണ് വാസ്തവം. ഈ സീസണിൽ ഇതുവരെ കളിച്ച ഏഴ് മത്സരങ്ങളിൽ നിന്ന് ഒരു അർധസെഞ്ചുറി പോലും നേടാൻ അദ്ദേഹത്തിന് കഴിഞ്ഞിട്ടില്ല. ഏഴ് കളികളിൽ ആകെ 141 റൺസ് മാത്രമാണ് ഈ സ്റ്റാർ ഓൾ റൗണ്ടറുടെ സമ്പാദ്യം. ബോളിങ്ങിലും ദയനീയമാണ് കാര്യങ്ങൾ. ആകെ നാല് വിക്കറ്റുകൾ മാത്രമാണ് അദ്ദേഹത്തിന് നേടാനായത്. റൺസ് വിട്ടുകൊടുക്കുന്നതിൽ ഒരു പിശുക്കും കാണിക്കാത്ത അദ്ദേഹത്തിന്റെ എക്കോണമി 11.00 ആണ്.

Also Read: ആ താരത്തിന് രാജസ്ഥാൻ റോയൽസ് ഈ പുതിയ റോൾ നൽകണം; ഇത് നടന്നാൽ സഞ്ജുവും ടീമും വേറെ ലെവലാകുമെന്ന് ഉറപ്പ്

സീസണിലെ പാതിമത്സരങ്ങൾ പൂർത്തിയാകുമ്പോൾ പോയിന്റ് പട്ടികയിൽ ഏഴാമതാണ് മുംബൈ ഇന്ത്യൻസിന്റെ സ്ഥാനം. മൂന്ന് വിജയങ്ങളും നാല് പരാജയങ്ങളും അക്കൗണ്ടിലുള്ള മുംബൈയുടെ പോക്കറ്റിൽ ആറ് പോയിന്റാണുള്ളത്. ഈ മാസം 22 ന് രാജസ്ഥാൻ റോയൽസിനെതിരെയാണ് മുംബൈ ഇന്ത്യൻസിന്റെ അടുത്ത മത്സരം.

Also Read: കാര്യങ്ങൾ മാറിയത് അവിടെ നിന്നാണെന്ന് സഞ്ജു സാംസൺ; മത്സരശേഷം രാജസ്ഥാൻ റോയൽസ് നായകൻ പറഞ്ഞത് ഇക്കാര്യങ്ങൾ

ഈ സീസണിൽ ഉജ്ജ്വല ഫോമിലുള്ള‌ സഞ്ജുവിന്റെ രാജസ്ഥാൻ, പോയിന്റ് പട്ടികയിൽ ഒന്നാം സ്ഥാനത്തുള്ള ടീമാണ്. ഈ സീസണിൽ മുൻപ് രാജസ്ഥാനെതിരെ കളിച്ചപ്പോൾ മുംബൈ ഇന്ത്യൻസ് തോൽവി നേരിട്ടിരുന്നു. അതിന് കണക്കുതീർക്കുക എന്ന ലക്ഷ്യവും ഈ കളിയിൽ മുംബൈക്കുണ്ട്.