സഞ്ജു സാംസൺ ഇന്ത്യക്കായി മൂന്ന് ഫോർമാറ്റിലും കളിക്കുന്നില്ലേ? ചോദിക്കുന്നത് ക്രിക്കറ്റ് ഇതിഹാസം!!

ഇന്ത്യയുടെ ദേശീയ ടീമിൽ മൂന്ന് ഫോർമാറ്റിലും സഞ്ജു സാംസൺ കളിക്കുന്നില്ലെന്നത് അത്ഭുതമാണെന്ന് ഓസ്ട്രേലിയൻ ക്രിക്കറ്റ് ഇതിഹാസം ഷെയ്ൻ വോൺ. ചെന്നൈ സൂപ്പർ കിങ്സിനെതിരായ സഞ്ജുവിൻെറ അർധശതകത്തിന് ശേഷമാണ് വോൺ ഇക്കാര്യം ചോദിച്ചത്. മത്സരത്തിൽ നിന്ന് 32 പന്തിൽ നിന്ന് 74 റൺസാണ് മലയാളി ക്രിക്കറ്റർ നേടിയത്.

"സഞ്ജു സാംസൺ എന്തൊരു ഗംഭീര പ്ലെയറാണ്. ഏറെക്കാലത്തിന് ശേഷം കണ്ടിട്ടുള്ളവരിൽ വല്ലാതെ ആകർഷിപ്പിക്കുന്ന താരമാണ് സഞ്ജു. അവൻ ഇന്ത്യക്കായി മൂന്ന് ഫോർമാറ്റിലും കളിക്കുന്നില്ലെന്ന് മനസ്സിലാക്കുമ്പോൾ വല്ലാത്ത അത്ഭുതമാണ് തോന്നുന്നത്," രാജസ്ഥാൻ റോയൽസിൻെറ ഇൻസ്റ്റഗ്രാം ലൈവിൽ വോൺ പറഞ്ഞു.

Also Read: ധോണിയെ ചതിച്ചത് നാല് കളിക്കാര്‍, തോല്‍വിയുടെ കാരണം പറഞ്ഞ് ഫ്‌ളമിങ്; ഡല്‍ഹി തന്ത്രം നടപ്പാക്കി

"അയാൾ അത്രയ്ക്ക് മികച്ച കളിക്കാരനാണ്. എല്ലാം ഒത്തുചേർന്നിട്ടുണ്ട്. ക്വാളിറ്റിയും ക്ലാസും സമ്മേളിക്കുന്ന ക്രിക്കറ്ററാണ് സഞ്ജു," വോൺ കൂട്ടിച്ചേർത്തു. സ്ഥിരതയാർന്ന പ്രകടനത്തിലൂടെ രാജസ്ഥാനെ കിരീടനേട്ടത്തിലേക്ക് സഞ്ജു നയിക്കട്ടെയെന്ന് വോൺ ആശംസിച്ചു. മൂന്ന് ഫോർമാറ്റിലും യുവതാരം ഇന്ത്യക്കായി കളിക്കുന്നത് കാണാൻ താൻ കാത്തിരിക്കുകയാണെന്നും അദ്ദേഹം പറഞ്ഞു.

ചെന്നൈക്കെതിരായ മത്സരത്തിലെ പ്രകടനത്തിന് ശേഷം ഇതിഹാസതാരം സച്ചിൻ ടെണ്ടുൽക്കർ അടക്കമുള്ളവർ സഞ്ജുവിനെ പുകഴ്ത്തിയിരുന്നു. ഇന്ത്യയിൽ ഇന്നുള്ള ഏറ്റവും മികച്ച യുവബാറ്റ്സ്മാൻ സഞ്ജുവാണെന്നാണ് ഗംഭീർ അഭിപ്രായപ്പെട്ടത്.