ഡെൽഹിയെ നാണം കെടുത്തി, ധോണിപ്പട ഐപിഎൽ പ്ലേ ഓഫിൽ

പ്ലേ ഓഫിലെത്താന്‍ ജയം അനിവാര്യമായ ഒരു മത്സരത്തില്‍ ഡല്‍ഹി ക്യാപിറ്റല്‍സിനെ (delhi capitals) 77 റണ്‍സിന് തോല്‍പ്പിച്ച് ചെന്നൈ സൂപ്പര്‍ കിംഗ്‌സ് (chennai super kings) അവസാന നാലില്‍ ഇടംനേടി. ആദ്യം ബാറ്റു ചെയ്ത സിഎസ്‌കെ 3 വിക്കറ്റ് നഷ്ടത്തില്‍ 223 റണ്‍സെടുത്തപ്പോള്‍ ഡല്‍ഹിക്ക് 9 വിക്കറ്റ് നഷ്ടത്തില്‍ 146 റണ്‍സെടുക്കാനേ സാധിച്ചുള്ളൂ. സിഎസ്‌കെ 14 കളികളില്‍ നിന്നും 17 പോയിന്റുമായും ഡല്‍ഹി ഇത്രയും മത്സരത്തില്‍ നിന്ന് 10 പോയിന്റുമായും ഗ്രൂപ്പ് മത്സരങ്ങള്‍ അവസാനിപ്പിച്ചു.
ടോസ് നേടി ആദ്യം ബാറ്റിംഗിനിറങ്ങിയ സിഎസ്‌കെയ്ക്ക് ഡെവണ്‍ കോണ്‍വെയും (Devon Conway) റിതുരാജ് ഗെയ്ക്വാദും (Ruturaj Gaikwad) ചേര്‍ന്ന് 14.3 ഓവറില്‍ 141 റണ്‍സിന്റെ വമ്പന്‍ കൂട്ടുകെട്ടാണ് നല്‍കിയത്. ടൂര്‍ണമെന്റിന്റെ ചരിത്രത്തില്‍ ചെന്നൈയുടെ നാലാമത്തെ ഉയര്‍ന്ന ഓപ്പണിംഗ് കൂട്ടുകെട്ടാണിത്. 2022 ല്‍ ഇതേ ജോഡി സണ്‍റൈസേഴ്സ് ഹൈദരാബാദിനെതിരെ 182 റണ്‍സ് നേടിയതാണ് പട്ടികയില്‍ മുന്നില്‍.

Also Read : ഹെറ്റ്മെയറിനോടാ കളി!! ഉടക്കാൻ വന്ന സാം കറന് രാജസ്ഥാൻ താരം നൽകിയത് കിടില‌ൻ മറുപടി

7 സിക്സറുകള്‍ പറത്തിയ റിതുരാജ് ഗെയ്ക്ക്‌വാദ് 79 റണ്‍സെുടത്ത് പുറത്തായി. കളിയുടെ 19-ാം ഓവറിലാണ് 52 പന്തില്‍ 87 റണ്‍സെടുത്ത കോണ്‍വെ പുറത്താകുന്നത്. 9 പന്തില്‍ 22 റണ്‍സെടുത്ത ശിവം ദുബെയും 7 പന്തില്‍ 20 റണ്‍സെടുത്ത രവീന്ദ്ര ജഡേജയും തിളങ്ങി. ഇന്നിംഗ്സിന്റെ അവസാന ഘട്ടത്തില്‍ ബാറ്റിംഗിനിറങ്ങിയ ധോണി 5 റണ്‍സെടുത്ത് പുറത്താവാതെ നിന്നു.

Also Read : കുറച്ച് നേരം ഇരുന്നു നോക്കാം, ചിലപ്പോ ബിരിയാണി കിട്ടിയാലോ!! വൈറൽ പോസ്റ്റുമായി സഞ്ജു സാംസൺ

മറുപടി ബാറ്റിംഗിനിറങ്ങിയ ഡല്‍ഹിക്ക് തുടക്കത്തിലേ വിക്കറ്റുകള്‍ നഷ്ടമായത് തിരിച്ചടിയായി. കഴിഞ്ഞ മത്സരത്തില്‍ തിളങ്ങിയ പൃഥ്വി ഷാ 5 റണ്‍സെടുത്തും റിലീ റോസോ റണ്ണെടുക്കാതേയും മടങ്ങിയപ്പോള്‍ ഫില്‍ സാള്‍ട്ട് 3 റണ്‍സെടുത്തും പുറത്തായി. ഒരറ്റത്ത് പിടിച്ചുനിന്ന ഡേവിഡ് വാര്‍ണര്‍ 58 പന്തില്‍ 86 റണ്‍സെടുത്ത് ആക്രമിച്ചു കളിച്ചു. എന്നാല്‍, വാര്‍ണര്‍ക്ക് കാര്യമായ പിന്തുണ ലഭിച്ചില്ല. സിഎസ്‌കെയ്ക്ക് വേണ്ടി ദീപക് ചാഹര്‍ മൂന്ന് വിക്കറ്റ് വീഴ്ത്തിയപ്പോള്‍ മതീഷ് പതിരണ, മഹീഷ് തീക്ഷണ എന്നിവര്‍ രണ്ട് വിക്കറ്റുവീതം സ്വന്തമാക്കി.

Read Latest Sports News and Malayalam News