രാജസ്ഥാനെതിരെ സർപ്രൈസ് തന്ത്രമൊരുക്കാൻ ധോണി, സഞ്ജുവിൻെറ മറുതന്ത്രം ഇങ്ങനെ...

സ്പിന്ന‍‍ർമാരെ വെച്ച് രാജസ്ഥാനെതിരെ തന്ത്രമൊരുക്കാനാവും എംഎസ് ധോണിയുടെ ശ്രമം. എന്നാൽ ക്യാപ്റ്റന് ചില തലവേദനകളുമുണ്ട്. മോയിൻ അലി പൂ‍ർണമായും ഫിറ്റാണെങ്കിൽ ധോണിത്ത് ഭയക്കാനില്ല.

രവീന്ദ്ര ജഡേജയും മിച്ചൽ സാൻറ്നറും മുംബൈക്കെതിരെ തിളങ്ങിയിരുന്നു. ഇരുവരും ചേ‍ർന്ന് 5 വിക്കറ്റാണ് വീഴ്ത്തിയത്. എന്നാൽ സ്പിന്ന‍ർമാർക്കെതിരെ കഴിഞ്ഞ മൂന്ന് സീസണിലായി രാജസ്ഥാൻെറ സഞ്ജു, ജെയ്സ്വാൾ, ബട്ട്ല‍ർ ത്രയം മികച്ച ഫോമിൽ കളിക്കുന്നവരാണ്.

ഒരു അധിക സ്പിന്നറെ ചെന്നൈ രംഗത്തിറക്കാനുള്ള സാധ്യതയും കാണുന്നുണ്ട്. ഇംപാക്ട് പ്ലെയറെന്ന നിലയിലും ചിലപ്പോൾ ഉപയോഗപ്പെടുത്തിയേക്കും. പേസർ ദീപക് ചാഹറിന് പകരം ലങ്കൻ സ്പിന്നർ മഹീഷ് തീക്ഷ്ണ ടീമിലെത്താനാണ് സാധ്യതയുള്ളത്.

പവർ പ്ലേയിൽ വിക്കറ്റെടുക്കുന്നതിൽ മിടുക്കനാണ് മഹീഷ്. താരത്തെ രംഗത്തിറക്കി രാജസ്ഥാൻ ബാറ്റിങ് നിരയെ വിറപ്പിക്കാനാവും ചെന്നൈയുടെ ശ്രമം. നാല് സ്പിന്നർമാരുമായി ചെന്നൈ വമ്പൻ തന്ത്രം ഒരുക്കുമോ എന്നാണ് കണ്ടറിയേണ്ടത്.

എംഎസ് ധോണിയുടെ 200ാം ഐപിെൽ മത്സരത്തിൽ മികച്ച വിജയമാണ് ചെന്നൈ ലക്ഷ്യമിടുന്നത്. പ്രധാന കളിക്കാരുടെ പരിക്കാണ് ചെന്നൈ നേരിടുന്ന വലിയ പ്രശ്നം. ബെൻ സ്റ്റോക്സ് പരിക്ക് കാരണം രാജസ്ഥാനെതിരെയും കളിക്കില്ല.

മോയിൻ അലി തിരിച്ചെത്തിയേക്കുമെന്നാണ് സൂചനകൾ. ദീപക് ചാഹ‍ർ കുറഞ്ഞത് ഒരാഴ്ചയെങ്കിലും മാറിനിൽക്കേണ്ടി വരും. മുംബൈക്കെതിരെ വെറ്ററൻ താരം അജിങ്ക്യ രഹാനെയെ രംഗത്തിറക്കിയാണ് ചെന്നൈ മത്സരം ജയിച്ചത്.

Also Read: രാജസ്ഥാനിൽ പരാഗിന് പകരം മലയാളി വെടിക്കെട്ട് വീരൻ, വമ്പൻ മാറ്റത്തിന് സഞ്ജുവും റോയൽസും തയ്യാറാകുമോ!!​

ചെന്നൈക്കെതിരെ രാജസ്ഥാൻ മറുപടി തന്ത്രവും ഉറപ്പായും തയ്യാറാക്കിയിട്ടുണ്ടാവും. ചെപ്പോക്കിൽ രണ്ട് ഗംഭീര സ്പിന്ന‍ർമാരുമായാണ് രാജസ്ഥാൻ ഇറങ്ങുന്നത്. ചാഹൽ ഈ സീസണിലും ഗംഭീര ഫോമിലാണ്. ആർ അശ്വിൻ മുൻ ചെന്നൈ താരം കൂടിയാണ്.

മാത്രമല്ല, പേസ‍ർ ട്രെൻറ് ബോൾട്ടും ചെന്നൈക്ക് വെല്ലുവിളിയാവും. ഋതുരാജ് ഗെയ്ക്വാദിനെ ബോൾട്ടായിരിക്കും ലക്ഷ്യമിടുക. നാല് തവണ നേ‍‍ർക്കുനേർ വന്നപ്പോൾ ഋതുരാജിനെ ബോൾട്ട് മൂന്ന് തവണ പുറത്താക്കിയിട്ടുണ്ട്.