ഡൽഹിക്ക് അടുത്ത തിരിച്ചടി; ഇശാന്ത് ശർമ ഐപിഎല്ലിൽ നിന്ന് പിൻമാറി

സ്പിന്നർ അമിത് മിശ്രയ്ക്ക് പിന്നാലെ ഡൽഹി ക്യാപിറ്റൽസ് പേസർ ഇശാന്ത് ശർമയും ഐപിഎല്ലിൽ നിന്ന് പിൻമാറി. പരിക്ക് കാരണമാണ് ഇശാന്ത് ലീഗിൽ നിന്ന് ഒഴിവായത്. വാരിയെല്ലിനുള്ള പരിക്കാണ് ഇശാന്തിനെ പ്രതിസന്ധിയിലാക്കിയത്. ഇത് രണ്ടാമത്തെ കളിക്കാരനാണ് ഡൽഹി ടീമിൽ നിന്ന് പിൻമാറുന്നത്. അമിത് മിശ്രയ്ക്കും പരിക്ക് തന്നെയായിരുന്നു വില്ലൻ. തുടക്കത്തിലുള്ള ഒരു മത്സരത്തിനിടെ മിശ്രയ്ക്ക് മോതിരവിരലിന് പരിക്കേറ്റിരുന്നു.

32കാരനായ ടെസ്റ്റ് സ്പെഷ്യലിസ്റ്റ് പേസർ ഇശാന്ത് ശർമ ഐപിഎൽ 2020ൽ ഒരേയൊരു മത്സരം മാത്രമാണ് കളിച്ചത്. എസ്ആർഎച്ചിനെതിരെ നാലോവർ എറിഞ്ഞ അദ്ദേഹം 26 റൺസ് മാത്രമാണ് വഴങ്ങിയത്. വിക്കറ്റൊന്നും നേടിയിരുന്നില്ല. പരിചയ സമ്പന്നനായ രണ്ടാമത്തെ താരത്തെ നഷ്ടമായത് ഡൽഹിക്ക് കനത്ത തിരിച്ചടിയാണ്.

Also Read: ജയിച്ച പഞ്ചാബിനെ 'കളിച്ച്' തോല്‍പ്പിച്ചത് ഈ കളിക്കാര്‍; നെഞ്ചിടിപ്പ് മറച്ചുപിടിച്ചെന്ന് കൊല്‍ക്കത്തയുടെ നരെയ്ന്‍

ഇന്ത്യയുടെ വരാൻ പോവുന്ന ഓസ്ട്രേലിയൻ പര്യടനത്തിനുള്ള ടെസ്റ്റ് ടീമിലും ഇശാന്തിനെ പരിഗണിക്കുന്നത് പരിക്കിൽ നിന്ന് മോചിതനായതിന് ശേഷം മാത്രമായിരിക്കും. ഇശാന്തിന് പകരക്കാരനായി ഡൽഹി ടീമിലുള്ള പേസർമാരെയെല്ലാം പരീക്ഷിച്ചിരുന്നു. ഹർഷൽ പട്ടേലാണ് നിലവിൽ മികച്ച പ്രകടനവുമായി ടീമിൽ സ്ഥാനം ഉറപ്പാക്കിയിരിക്കുന്നത്. ഇശാന്തിന് പകരക്കാരനായി സ്ക്വാഡിൽ ഒരാളെ പരിഗണിക്കുകയാണെങ്കിൽ അത് നിലവിൽ നെറ്റ് പേസറായി ടീമിനൊപ്പമുള്ള പ്രദീപ് സാങ്വാൻ ആയിരിക്കും.