മനോഹരം ഈ ഇടങ്കയ്യൻെറ ശൈലി; ദേവ്ദത്തിന് ഇന്ത്യൻ ഇതിഹാസത്തിൻെറ പ്രശംസ!

റോയൽ ചലഞ്ചേഴ്സ് ബാംഗ്ലൂരിൻെറ ഇടങ്കയ്യൻ ഓപ്പണർ ദേവ്ദത്ത് പടിക്കലിനെ പുകഴ്ത്തി മുൻ ഇന്ത്യൻ നായകൻ സൗരവ് ഗാംഗുലി. ഈ ഇടങ്കയ്യൻ ബാറ്റ്സ്മാൻെറ ശൈലി കണ്ടിരിക്കാൻ എന്തൊരു ഭംഗിയാണെന്നാണ് ബിസിസിഐ പ്രസിഡൻറ് കൂടിയായ ഗാംഗുലി ട്വിറ്ററിൽ കുറിച്ചത്. എസ്ആർഎച്ചിനെതിരെ ഐപിഎൽ അരങ്ങേറ്റത്തിനിറങ്ങിയ ദേവ്ദത്ത് അർധശതകം നേടി ടീമിന് മികച്ച തുടക്കമാണ് നൽകിയത്.

42 പന്തിൽ നിന്ന് 56 റൺസെടുത്ത ദേവ്ദത്തിൻെറ ബാറ്റിൽ നിന്ന് എട്ട് ഫോറുകളാണ് പിറന്നത്. പ്രാദേശിക ക്രിക്കറ്റിൽ കർണാടകയ്ക്ക് വേണ്ടി കളിക്കുന്ന താരം മലപ്പുറത്തെ എടപ്പാളുകാരനാണ്. സയ്യിദ് മുഷ്താഖ് അലി ടി20 ടൂർണമെൻറിൽ ടോപ് സ്കോററായതോടെയാണ് ദേവ്ദത്ത് ദേശീയതലത്തിൽ ക്രിക്കറ്റിൽ ശ്രദ്ധിക്കപ്പെട്ടത്.



Also Read: മലയാളി പയ്യൻ പൊളി ഡാ, എബിഡി കിടുക്കി; ഉമേഷ് അണ്ണന് ഒരു മാറ്റവുമില്ല; ഐപിഎൽ ട്രോളുകൾ!!

ഫസ്റ്റ് ക്ലാസ് ക്രിക്കറ്റിലും ലിസ്റ്റ് എയിലും ടി20യിലും അരങ്ങേറ്റത്തിൽ ഫിഫ്ടി നേടി തുടങ്ങിയിട്ടുള്ള താരം ഇവിടെയും പതിവ് തെറ്റിച്ചില്ല. ഇടങ്കയ്യൻ ബാറ്റ്സ്മാൻെറ ശൈലി യുവരാജിനെ ഓർമ്മിപ്പിക്കുന്നവെന്ന് ആരാധകർ ട്വിറ്ററിൽ വിശേഷിപ്പിക്കുന്നുണ്ട്. 36 പന്തിൽ നിന്നായിരുന്നു താരം അർധശതകം തികച്ചത്. ഐപിഎല്ലിലെ ആദ്യമത്സരത്തിൽ ആർസിബിക്ക് വിജയം സമ്മാനിക്കുന്നതിൽ ദേവ്ദത്ത് നിർണായകപങ്കാണ് വഹിച്ചത്.