IPL 2018: മികച്ച ടീം ഏതെന്ന് പ്രഖ്യാപിച്ച് കോഹ‍്‍ലി

ഹൈദരാബാദ്: എെപിഎല്ലിൽ നിർണായക മത്സരത്തിൽ സൺ റൈസേഴ്സ് ഹൈദരാബാദിനോട് തോറ്റ റോയൽ ചലഞ്ചേഴ്സ് ബാംഗ്ലൂരിൻെറ പ്ലേ ഓഫ് പ്രതീക്ഷകൾ പരുങ്ങലിലാണ്. മത്സരശേഷം സംസാരിച്ച ബാംഗ്ലൂർ ക്യാപ്റ്റൻ വിരാട് കോഹ‍്‍ലിയും തൻെറ ടീമിൻെറ പ്രകടനത്തിലുള്ള നിരാശ മറച്ച് വെച്ചില്ല. വിജയം തങ്ങൾ അർഹിച്ചിരുന്നില്ല എന്ന് തന്നെയാണ് മത്സരത്തെ വിലയിരുത്തി ഇന്ത്യൻ നായകൻ കൂടിയായ കോഹ‍്‍ലി പറഞ്ഞത്.

അതേസമയം എെപിഎൽ 11ാം എഡിഷണിലെ മികച്ച ടീമുകൾ ഏതെന്ന കാര്യത്തിലും കോഹ‍്‍ലി വിലയിരുത്തൽ നടത്തി. ബോളിങ് നിരയുടെ കാര്യത്തിൽ ലീഗിലെ ഏറ്റവും മികച്ച ടീം ഹൈദരാബാദ് ആണെന്ന് അദ്ദേഹം പറഞ്ഞു. എന്നാൽ ഓവർ ഓൾ പ്രകടനം കണക്കിലെടുത്താൽ ചെന്നൈ സൂപ്പർ കിങ്സും കിങ്സ് ഇലവൻ പഞ്ചാബുമാണ് മികച്ച ടീമുകളെന്നും കോഹ‍്‍ലി അഭിപ്രായപ്പെട്ടു.