ഇത്തവണ പ്ലേ ഓഫിലേക്ക് ആരെല്ലാം; സാധ്യതകൾ ഇനി ഇങ്ങനെ

മുംബൈ: ഇന്ത്യൻ പ്രീമിയർ ലീഗ് അതിൻെറ ഏറ്റവും ആവേശകരമായ ഘട്ടത്തിലേക്ക് കടക്കുകയാണ്. പ്ലേ ഓഫിലേക്ക് കടക്കാൻ പോവുന്ന നാല് ടീമുകൾ ഏതെല്ലാമെന്ന് വൈകാതെ അറിയാം. രാജസ്ഥാൻ റോയൽസ്, കൊൽക്കത്ത നൈറ്റ് റൈഡേഴ്സ്, ചെന്നൈ സൂപ്പർ കിങ്സ്, സൺ റൈസേഴ്സ് ഹൈദരാബാദ് എന്നീ ടീമുകളാണ് കഴിഞ്ഞ സീസണിൽ ആദ്യ നാലിലെത്തിയത്. ഇത്തവണ സാധ്യതകൾ ഇനി ഇങ്ങനെയാണ്.

ചെന്നൈ സൂപ്പർ കിങ്സ്:

നിലവിൽ 11 മത്സരങ്ങളിൽ നിന്ന് 16 പോയിൻറുള്ള ചെന്നൈ പ്ലേ ഓഫ് ഏകദേശം ഉറപ്പിച്ച് കഴിഞ്ഞു. ഇനി ഒരു മത്സരം കൂടി ജയിച്ച് പ്ലേ ഓഫ് ഉറപ്പിക്കുന്ന എന്നതാണ് ചെന്നൈയുടെ ലക്ഷ്യം.

ഡൽഹി ക്യാപിറ്റൽസ്:

നിലവിൽ 11 മത്സരങ്ങളിൽ നിന്ന് 14 പോയിൻറാണ് ഡൽഹിക്കുള്ളത്. രണ്ട് മത്സരങ്ങൾ വിജയിച്ചാൽ തന്നെ ഡൽഹിക്ക് പ്ലേ ഓഫ് ഉറപ്പിക്കാം. കഴിഞ്ഞ ഏഴ് തവണയും ഡൽഹിക്ക് ഐപിഎൽ പ്ലേ ഓഫിൽ ഇടം പിടിക്കാനായിട്ടില്ല.

മുംബൈ ഇന്ത്യൻസ്:

പത്ത് മത്സരങ്ങളിൽ നിന്ന് പന്ത്രണ്ട് പോയിൻറുള്ള മുംബൈക്ക് രണ്ട് മത്സരങ്ങൾ കൂടി ജയിച്ചാൽ കാര്യങ്ങൾ എളുപ്പമാണ്. മുംബൈക്ക് ഇനിയും നാല് മത്സരങ്ങൾ ബാക്കിയുണ്ട്.

സൺ റൈസേഴ്സ് ഹൈദരാബാദ്:

പത്ത് മത്സരങ്ങളിൽ നിന്ന് ഹൈദരാബാദിന് പത്ത് പോയിൻറുണ്ട്. ഇനിയുള്ള നാലിൽ മൂന്നും അവർക്ക് ജയിക്കണം. മറ്റ് ടീമുകളുടെ മത്സരഫലവും ഹൈദരാബാദിന് നിർണായകമാണ്.

കിങ്സ് ഇലവൻ പഞ്ചാബ്:

പഞ്ചാബിന് നിലവിൽ 11 മത്സരങ്ങളിൽ നിന്ന് പത്ത് പോയിൻറുണ്ട്. ഇനിയുള്ള മൂന്ന് മത്സരങ്ങളും അവർക്ക് നിർണായകമാണ്. മൂന്നും വിജയിച്ചാൽ സുരക്ഷിതമായി പ്ലേ ഓഫിൽ ഇടം പിടിക്കാം.

കൊൽക്കത്ത നൈറ്റ് റൈഡേഴ്സ്:

11 മത്സരങ്ങളിൽ നിന്ന് വെറും എട്ട് പോയിൻറുള്ള കൊൽക്കത്തയ്ക്ക് കാര്യങ്ങൾ എളുപ്പമല്ല. ഇനിയുള്ള മൂന്ന് മത്സരങ്ങളും വിജയിച്ചാലും മറ്റ് മത്സരഫലം കൂടി നിർണായകമാണ്.

റോയൽ ചലഞ്ചേഴ്സ് ബാംഗ്ലൂർ:

കൊൽക്കത്തയുടെ അതേ അവസ്ഥയിലാണ് ബാംഗ്ലൂർ. 11 മത്സരങ്ങളിൽ നിന്ന് എട്ട് പോയിൻറാണുള്ളത്. ഇനിയൊരു പരാജയം കൂടി ഉണ്ടായാൽ പ്ലേ ഓഫ് കാണാതെ പുറത്താവും.

രാജസ്ഥാൻ റോയൽസ്:

11 മത്സരങ്ങളിൽ നിന്ന് എട്ട് പോയിൻറുള്ള രാജസ്ഥാനും ഇനിയൊരു തോൽവി പുറത്തേക്കുള്ള വഴി തെളിക്കും. മൂന്ന് മത്സരങ്ങൾ ജയിക്കണം. നെറ്റ് റൺ റേറ്റിലും രാജസ്ഥാൻ പിന്നിലാണ്.